Mwanda wa 100
Yesu e mwifuba dya Getesemane
KUNYIMA kwabo kukatuka ku nshibo ya kunundu, Yesu na batumibwa baaye babende mwifuba dya Getesemane. Kumpala babaadi abafiki misusa ibungi mu dino efuba. Binobino Yesu ebalungula bwashi tabalalanga, kadi bekale abatekye. Akupu, bende kwibula kapindji, beele mpala pashi bwa kuteka.
Kapindji kapela, Yesu balukila bwa kutala batumibwa baaye. Opwandikisha shi bakwete kukita kinyi? Mbalaale! Mu misusa isatu Yesu bebalungulanga shi tabitungu bekadikye balaale, anka nsaa yooso ibaadi alukiila baadi ebasangana mbalaale. Mususa wa nfudiilo ubalukiila, Yesu bebepusha shi: ‘Bwakinyi anulala mu ino nsaa? Nsaa ibakumbana yandya kupanyibwa ku maasa a balwishi bande.’
Mu yaya nsaa baapusha tulee twa kisaka kya bantu. Tala! Bantu bakwete kufika na mpete na tubongye! Mbatwale myengye ya kaalo bwa kwibamunyikila. Nsaa ibabefubwila pepi, muntu umune bakatuka munkatshi mwabo bende mutadiile kwi Yesu. Bamufifya ku milomo, bu byokwete kumona pano. Uno muntu nyi Yudase Iskaryote! Bwakinyi afifya Yesu ku milomo?
Yesu bamwipwishe shi: ‘Yudase, na kunfifya kwa milomo nyi kompaana?’ Kufifya kwa ku milomo ndjo kitundwilo. Kubaadi akukwasha bantu babaadi na Yudase bwashi baukye Yesu, muntu abakwete kukimba. Byabya, beshikwanyi ba Yesu babefubwila pepi naaye bwa kumukwata. Kadi Mpyeele takumina kwibatadiila bwashi bakwate Yesu kushi’bo kulwa ngoshi nya. Basomona kimpulu kibaadi nakyo bwa kutapa muntu e pepi naaye. Kimpulu kibatupilwa mutwe wa yawa muntu kibamutshibi etwi. Kadi Yesu bakwata etwi dya yawa muntu bedyalusha.
Yesu balungula Mpyeele shi: ‘Alusha kimpulu kyobe pa mbalo yaakyo. Wele meeshi shi ntshi mulombeene kwidila kwi Nshaami, bwashi antumine binunu bya mikeyilu bwa kunkwasha su?’ Oolo, mukumbeene kwibatuma! Kadi Yesu tatekye Efile Mukulu bwashi atume mwikeyilu su ngumune nya, mwanda auku shi nsaa ibaapu kulombana yashi beshikwanyi baaye bamukwate. Ndjo bebatadiila bwashi bende naaye. Tubande kutala akikyebe kukitshikila Yesu binobino.
Mateo 26:36-56; Luuka 22:39-53; Yowano 18:1-12.