Mwanda wa 104

Yesu balukiila mwiyilu

MUNDA mwa mafuku, Yesu baadi mwileeshe kwi balondji baaye misango ibungi. Ungi musango balondji 500 babamumwene. Pabebatukiile, ouku kibaadi Yesu mwibalungule? Baadi mwisambe pabitale bufumu bw’Efile Mukulu. Yehowa batumine Yesu pa nsenga bwa kulongyesha bantu pabitale Bufumu. Na batungunukile na kwibikita mpa na kunyima kwa kusanguka ku bafwe.

Ouku akilesha bufumu bw’Efile Mukulu? Oolo, Bufumu bw’Efile Mukulu nyi guvernema aaye e mwiyilu, na Yesu nyi Musangudibwe n’Efile Mukulu bwa kwikala nfumu. Bu byatwikalanga bamone, pa kudiisha basha nsala, kupasha basha mikumbo, mpa na kubuusha bafwe, Yesu balesheshe shi aye nfumu ebuwa!

Byabya apakekala Yesu bu nfumu mwiyilu munda mwa bipwa kinunu, nsenga ayikekala naminyi? Nsenga ishima ayikaluluka mpaladiso ebuwa. Takukekala dingi ngoshi, buntomboshi, mikumbo sunga lufu. Atuwuku bino mwanda Efile Mukulu bapangile nsenga bwashi ikale mpaladiiso, mbalo ilombeene bantu kushala na muloo. Nyi bwakinyi bakitshine lupango lwa Edene ku kibangilo. Na Yesu akakitshi mwaye mooso bwashi akikyebe Efile Mukulu bwa nsenga kikitshikye.

Binobino nsaa ibalombana bwashi Yesu alukiile mwiyilu. Yesu baadi mu mwekyele balondji baaye munda mwa mafuku 40. Byabya tababaadi dingi na mushindo wa kupela shi baadi na muwa. Anka, kumpala kwa kwilekena na balondji baaye, bebalungwile shi: ‘Tanukatukanga mu Yeelusaleme mpa na panupete kikudi kiselele.’ Kikudi kiselele nyi mbukome bw’Efile Mukulu, twi balombeene kwibupwandikisha na lupapi alupuku, abukyebe kukwasha balondji ba Yesu bwashi bakite akikyebe Efile Mukulu. Ku nfudiilo Yesu nkwamba shi: ‘Anukekala tumonyi twande mpa na ku nfudiilo kwa nsenga.’

Kunyima kwa Yesu kwakula bino, kubakitshikile kintu kya kukanya. Babangile kukamina mwiyilu, nka bu byokwete kumona pano mu kifwatulo. Akupu ekumbi dibamushikiile, balondji tababaadi na mushindo wa kumona Yesu dingi nya. Yesu bakamiine mwiyilu aye nkubanga kukunkusha balondji baaye.

1 Beena-Kodinto 15:3-8; Bifumbulwe 21:3, 4; Bikitshino 1:1-11.