Mwanda wa 113
Mpoolo e mu Looma
TALA nkano i ku maboko a Mpoolo, na tala dingi musalayi a beena Looma kwete kumulama. Mpoolo mukwatshibwe mu lukano mu Looma. Atengyela pabakyebe kumwatshila kitshibilo kwi Keezare a mu Looma. Pabaadi mu lukano, bantu babaadi na mushindo wa kwenda mu kumumona.
Mafuku apela kunyima kwa Mpoolo kufika ku Looma batumine eyi bwashi bakata ba beena Yuuda bafikye kwadi. Beena Yuuda bebungi babaadi mu Looma babafikile. Mpoolo baadi mwibalambukishe pabitale Yesu na bufumu bw’Efile Mukulu. Bangi abakuminyine abo nkufika bu beena Kidishitu, kadi bangi tambakumine nya.
Mpoolo balambukishe bangi basalayi babaadi na mudimo wa kumulama. Mpoolo baadi mulamibwe mu lukano munda mwa bipwa bibidi, mwamwa baadi mulambukishe booso babaadi abafiki kwadi. Byabya, mpa na ba mu nshibo ya Keezare babapushile mukandu wibuwa wa Bufumu, na bangi ba kwabadi abo nkufika bu beena Kidishitu.
Kadi uno muntu mwenyi mushale ku mesa kwete kufunda nnanyi? We kumutundula su? Oolo, nyi Timotee. Timotee baadi naamu mu lukano mwanda wa kulungula mukandu wibuwa wa Bufumu, kadi binobino taadi mulungantu. Na bafiki pano bwa kukwasha Mpoolo. Ouku kikwete kufunda Timotee su? Tubande kutala.
Okyotentekyesha kibundji kya Fidipe na kya Efeeze kyatwikeele bamone mu Mwanda wa 110 su? Mpoolo baadi mukwashe bwa kukita tukongye twa beena Kidishitu mu bino bibungi. Binobino, nsaa ibaadi mu lukano, Mpoolo baadi kwete kufundila baba beena Kidishitu mikanda. Yaaya mikanda ayisanganyibwa mu Bible, na abeyitamina bu mukanda wa Beena-Efeeze na wa Beena-Fidipe. Mpoolo kwete kulungula Timotee myanda yadya kufundila bakwabo beena Kidishitu ba ku Fidipe.
Beena Fidipe babaadi bakitshine Mpoolo myanda ibuwa. Babaadi abamutumina bintu mwamwa mu lukano, na Mpoolo kwete kwibatumbula mwanda wa byabya bintu. Epafrodite naye winyi baadi mufikye na byabya bintu. Kadi baadi mukumbe ngofu pepi na kufwa. Binobino taadi bibuwa na kwete kwilumbuula bwa kwalukiila kwaye. Na akyebe kutwala ino mikanda ya Mpoolo na Timotee ku Fidipe palukiila.
Mpoolo pabaadi mu lukano, bafundile ingi mikanda ibidi i mu Bible. Umune baadi mwiufundile beena Kidishitu ba mu kibundji kya Kolose. Ouku byabewitaminaa su? Mbu mukanda wa Beena-Kolose. Ungi, nyi mukanda ubaadi mufundile kuuku aaye a p’eshimba abetamina bu Filemone baadi mushaale dingi mu Kolose. Wawa mukanda ubaadi awisamba pabitale Onezime mufubi a Filemone.
Onezime baadi musukye Filemone aye nkwenda ku Looma. Pangi, Onezime baadi mupushe shi Mpoolo e mu lukano kwakwa ku Looma. Aye nkwenda mu kumutala, na Mpoolo nkulambukisha Onezime. Mu mafuku apeela Onezime naamu nkufika mwina Kidishitu. Binobino Onezime benyongola mwanda baadi musukye. Byabya ouku kikwete Mpoolo kufundila Filemone mu uno mukanda su?
Mpoolo kwete kufundila Filemone bwashi afwile Onezime lusa. Mpoolo bafundile shi: ‘Namwalusha koodi, anka binobino ta kii penda bu mufubi oobe nya. Taadi mukwetu mwina Kidishitu ebuwa.’ Onezime pabalukiila ku Kolose batwala ino mikanda, umune beutwadila beena Kolose, ungi beutwadila Filemone. Twi balombeene kupwandikisha muloo ubaadi nawo Filemone pabapushishe shi mufubi aaye taadi mwina Kidishitu.
Mpoolo pabafundiile beena Fidipe na Filemone, baadi na ungi mukandu wibuwa. Balungwile beena Fidipe shi: ‘Natumu Timotee kwanudi. Anka kunyima kwa mafuku apela nafiki mu kwinutala.’ Na kwi Filemone bafundile shi: ‘Ndumbulwile mbalo ya kulala.’
Mpoolo pabatuukile mu lukano bayile mukutala bakwabo balume na bakashi beena Kidishitu ba mu ma mbalo ebungi. Kadi kunyima, abakwatshile dingi Mpoolo bamwela mu lukano mu Looma. Yaaya nsaa baadi awuku shi akyebe kwipayibwa. Byabya aye nkufundila Timote bwashi afikye kwadi bukidi. Aye nkufunda shi: ‘Ne mulame lukumino lwande kwi Efile Mukulu, na Efile Mukulu akyebe kumpa bwedi.’ Bipwa bipela kunyima kwa lufu lwa Mpoolo, beena Looma abaadi babutule Yeelusaleme.
Kadi mu Bible mwi myanda ibungi. Yehowa Efile Mukulu baadi mulungule Yowano mutumibwa bwashi afunde ino myanda, aye nkufunda dingi mukanda wa Bifumbulwe. Uno mukanda wa mu Bible awisamba pabitale myanda ayikyebe kufika ku mpala. Tubande kutala myanda ayikyebe kukitshika mafuku aafiki.
Bikitshino 28:16-31; Beena-Fidipe 1:13; 2:19-30; 4:18-23; Beena-Ebreeyi 13:23; Filemone 1-25; Beena-Kolose 4:7-9; 2 Timotee 4:7-9.