Nshalelo asankisha Efile Mukulu

1, 2. Temuna bantu babaabadi abamono kwi Yehowa bu bakuuku baaye ba p’eshimba.

MUNTU kinyi oodi mulombeene kusangula bu kuuku oobe? Kushi mpaka okuminaa kwikala kuuku a muntu e na mweneno a myanda umune no’be, mukumine myanda yoodi mukumiine, na ataa na muulo myanda yomonaa shi i na muulo. Na wekala na muloo wa kusangula muntu e na ngikashi ibuwa, bu kululama na kalolo.

² Munda mwa bipwa bibungi bishaale, Efile Mukulu baadi musangule bangi bantu bwashi bekale bakuuku baaye ba p’eshimba. Bu kileshesho, Yehowa baadi mwitanyine Abrahame bu kuuku aye. (Badika Yeeshaya 41:8; Jaake 2:23.) Efile Mukulu bayitanyine Daavide bu “muntu asangasha eshimba dyande” mwanda baadi na ngikashi ya muntu akuminaa Yehowa. (Bikitshino 13:22, Kilombeno kipya) Na dingi Yehowa baadi amba shi mutemuki Danyele nyi “muntu mufudibwe bikata.”​—Danyele 9:23.

3. Bwakinyi Yehowa asangulaa bangi bantu bwashi bekale bakuuku baaye?

³ Bwakinyi Yehowa baadi aata Abrahame, Daavide, na Danyele bu bakuuku baaye? Oolo, balungwile Abrahame shi: “Mwanda we muteemeshe eyi dyande.” (Kibangilo 22:18) Byabya Yehowa efubwilaa pepi na baaba abakitaa kyebatekye na kwiyisha kooso. Balungwile beena Isaleele shi: “Teemeshaayi eyi dyande, ami namu neekal’Efile Mukulu eenu, n’anwe anwikala mwilo wande.” (Yeelemiya 7:23) Su bokokyela akyamba Yehowa, obe namu we mukumbeene kwikala kuuku aaye!

YEHOWA ANYINGISHAA BAKUUKU BAAYE

4, 5. Yehowa aleshaa bukome bwaye bwa kukwasha bafubi baaye naminyi?

⁴ Banda kunangushena pabitale mushindo ukumbeene nkukwasha kwikala kwa bu kuuku a Efile Mukulu. Bible amba shi Yehowa kwete kukimba mushindo wa “kunyingisha bano batuule lukulupilo lwabo mwadi.” (2 Myanda 16:9) Mushindo kinyi ukumbeene Yehowa nkunyingisha? Ungi mushindo wadi mulombeene kwibikita mbeuleshe mu Misambo 32:8, (EEM) mwatubadika shi: “Nakyebe kukulambukisha na kukulêsha eshinda dyodya kutambukila. Nakakupa elango. Dingi meso ande aakekala podi.”

⁵ Ano mayi aalesha shi Yehowa kwete kwitulama na kifulo kikashaa! Akyebe nkupa mayi a nkukunkusha na nkulama pokwete kwiatumikila. Efile Mukulu akyebe nkukwasha bwashi wekale munyingye poodi mu bitompwanga. (Badika Misambo 55:22.) Su ofubila Yehowa n’eshimba dimune, we mukumbeene kwikala na lukulupilo bu lwa mufundji a misambo bambile shi: “Nee na Yehowa kumpala kwande ngub’oso; byaadi ku yande ilume, ntshii kuponeshwa.” (Misambo 16:8; 63:8) Ky’eyendo Yehowa mukumbeene nkukwasha bwashi wekale na nshalelo amusankisha. Kadi, bu byouku, kwi mwishikwanyi a Efile Mukulu e na lukalo lwa nkukutshisha kwikala na yawa nshalelo.

MPAKA YA SATANA

6. Satana baadi mwambe kinyi pabitale bantu?

⁶ Shapitre 11 ekalanga muleshe mushindo ubaadi Satana mwele mpaka pabitale matalwa a Efile Mukulu a kwikala nfumu. Satana bambile shi Efile Mukulu baadi mudimbe na shi Yehowa baadi mukutwe kululama paaye kupela kuleka Adame na Eeva bwashi bekale abasangula abo banabene shi kintu kampanda kibuwa sunga shi kibubi. Kunyima kwa Adame na Eeva kukita mulwisho na pababangile bantu kuwula pa nsenga, Satana baadi mwele mpaka pabitale akitumu bantu bwashi bafubile Efile Mukulu. Satana baadi nka bu amba shi: “Bantu tabafubila Efile Mukulu mwanda mbamufule nya. Ntadiile, otale su ntankaka muntu ooso bwashi akutombokyele.” Mwanda ubakitshikiile Yoobo aulesha shi binangu bya Satana bibaadi byabya. Yoobo baadi muntu kinyi, na mushindo kinyi ubaadi ino mpaka ya Satana imutale?

7, 8. (a) Bwakinyi Yoobo baadi mwilekeene na bangi bantu booso ba aa mafuku? (b) Mushindo kinyi ubaadi Satana mwele mpaka pabitale kibaadi akitumu Yoobo mu kufubila Efile Mukulu?

⁷ Yoobo baadi na muwa takudi bipwa pepi na 3600. Baadi muntu ebuwa, mwanda Yehowa bambile shi: “Pa nsenga poso ta pe muntu e byadi, mwand’ê mmululame, t’ê na matope. Annêmekâ na kwilama ku kukita kwa bubi.” (Yoobo 1:8, EEM) Yoobo baadi asankisha Efile Mukulu.

⁸ Satana baadi mwele mpaka pabitale kibaadi akitumu Yoobo mu kufubila Efile Mukulu. Diabulu balungwile Yehowa dingi shi: “Twe mumulame mu lupango, aye, nshibo yaaye na bintu byaaye byooso su? We musampe mifubo yaaye, na bisaka byaaye bya nyema abiifiimeena mwiumbo. Anka kumiina kwol’eyaasa dyoobe, okume pa kyooso kyaadi nakyo. Naakushinkamiisha’shi akutshipi patooka.”​—Yoobo 1:10, 11.

9. Mushindo kinyi ubakitshine Yehowa bwa kwalula ku mpaka ya Satana, na bwakinyi?

⁹ Byabya, Satana baadi adimbiila Yoobo shi baadi afubila Efile Mukulu mwanda wa bintu bibaadi Efile Mukulu amupa. Diabulu bambile dingi shi su Yoobo batompibwa, akyebe kutombokyela Efile Mukulu. Yehowa bakitshine kinyi bwa kwalula pabitale ino mpaka ya Satana? Bu bibabidi shi mwanda ngutale ki mwishimba dya Yoobo, Yehowa baadi mutadiile Satana bwashi atompe Yoobo. Byabya, abikyebe kumweneka patooka su Yoobo mufule Efile Mukulu sunga shi ta mumufule.

ABATOMPO YOOBO

10. Yoobo bapetele bitompwanga kinyi, na nkinyi kibakitshine?

¹⁰ Satana baadi mutompe Yoobo musango umune mu mishindo ilekene. Abayibile ingi nyema yaaye, ingi abo nkwiyipa na dingi nkwipa bafubi baaye bebungi. Bino bibaadi bilwishe bupeta bwaye booso. Kunyima kwa byabya byooso, Yoobo baadi mutompibwe dingi ngofu kukila pabafikile kipapi kikata, akyo nkwipa baana baaye ekumi. Kadi, sunga mbibapetele ino myanda yooso ya malwa, “Yoobo tabaakitshiine mulwisho. Tabaatopekyele Efile Mukulu mu mwanda su ngumune.”​—Yoobo 1:22.

11. (a) Nkinyi kibaadi Satana mufunde Yoobo bwa musango wa kabidi, na nkinyi kibakitshine Yehowa? (b) Yoobo bakitshine kinyi pabakumbile mukumbo wi bukopo?

¹¹ Satana tabalekyele kumutompa nya. Pangi baadi mwele binangu shi sunga Yoobo anyingiila pa kushimisha kwa bupeta bwaye, bafubi baaye, na baana baaye, mmukumbeene kutombokyela Efile Mukulu su bakumbu. Yehowa balekyele Satana bwashi aase Yoobo mukumbo wi butete na ukile bukopo. Sunga mbyabya, Yoobo tamushimishe lukumino lwaye mwi Efile Mukulu nya. Kadi, baadi mwambe n’eshimba dimune shi: “Mpa na pankafwila ntankasumbushena kululama kwande.”​—Yoobo 27:5, NWT.

12. Mushindo kinyi ubaadi Yoobo mwalule ku mpaka ya Satana?

¹² Yoobo tabaadi auku shi Satana nyi baadi amufwishila yaaya nkalakasho yooso nya. Bu byashibaadi auku myanda yooso itale ino mpaka ya Satana pabitale bufumu bwa Yehowa, Yoobo baadi atshinyi shi pangi Efile Mukulu nyi baadi nsulo ya nkalakasho yaaye. (Yoobo 6:4; 16:11-14) Sunga mbyabya, bashadile mululame kumpala kwa Yehowa. Bu bi Yoobo bashadile mululame kumpala kw’Efile Mukulu, bapudiishe mpaka ya Satana bambile shi ta nkifulo kibaadi akitumu Yoobo bwa kufubila Efile Mukulu!

13. Nkinyi kibaadi kikitshikye pa mwanda washi Yoobo baadi mulamate kwi Efile Mukulu?

¹³ Lulamato lwa Yoobo kwi Efile Mukulu lubaadi lupe Yehowa mushindo wa kwalula ku mpaka ya Satana baadi bu amukaa. Yoobo baadi kuuku a Yehowa a p’eshimba, na Efile Mukulu baadi mumwelele mwabi mwanda baadi mumulamate.​—Yoobo 42:12-17.

NGIKUTALE N’OBE

14, 15. Bwakinyi twi balombeene kwamba shi mpaka ya Satana pa mwanda wa Yoobo ibaadi itale bantu booso?

¹⁴ Mpaka itale kululama kumpala kw’Efile Mukulu ibaadi ituushe Satana tayibaadi itale penda Yoobo aye nabeene nya. Ngikutale n’obe namu. Uno mwanda mbeuleshe kalolo mu Myeele 27:11, amwakula Yehowa shi: “Ikala sha-binangu, mwan’ande, eshimba dyande disangale, dingi neekala mulombeene kwaluula ampesha [angolomona].” Ano mayi, ababadi bafunde nkama ya bipwa kumpala kwa lufu lwa Yoobo, aalesha shi Satana baadi kikwete kolomona Efile Mukulu na kufunda bafubi Baaye. Su twi na nshalelo asankisha Yehowa, twi bakumbeene kwaluula ku myanda ya madimi ikwete kwitufunda nayo Satana, na dingi atusankisha eshimba dya Yehowa. Omono naminyi pabitale uno mwanda? Tomono shi bibuwa kukwasha bwa kwalula ku myanda ya madimi ya Satana, sunga byatunga shi tushintuule ingi myanda ya mu nshalelo etu su?

¹⁵ Tala mushindo ubaadi wakule Satana: “Kyooso kii nakyo muntu eekipaana bwa muwa waye.” (Yoobo 2:4) Pamba shi “muntu,” Satana alesha shi mpaka yaaye ta ngitale penda Yoobo nya kadi ngitale bantu booso. Uno mmwanda wa muulo ukata. Satana belele mpaka pabitale kululama koobe ku meso kw’Efile Mukulu. Diabulu akyebe shi opele kukokyela Efile Mukulu na olekye nshalelo ebuwa su bopete nkalakasho. Mushindo kinyi ulombeene Satana kwibikita?

16. (a) Satana mukumbeene kutumika na mayele kinyi bwa kupambusha bantu? (b) Diabulu mukumbeene kutumika na ano mayele mushindo kinyi bwa nkupambusha?

¹⁶ Bu byatumwene mu Shapitre 10, Satana kwete kutumika na mayele ebungi bwa kupambusha bantu kwi Efile Mukulu. Ingi nsaa, alwishaa bantu ngoshi “bu ntambwe ee bukyelo kwete kukimba [muntu] aadya kudya.” (1 Mpyeele 5:8) Byabya kwakwa kwitulwisha kwa Satana akumweneka nsaa i bakuuku boobe, bakwenu ba mu kifuko, sunga bangi bantu bakwete kukita mwabo mooso bwa nkupelesha kulonga Bible na kukita myanda yokwete kulonga.a (Yowano 15:19, 20) Ingi nsaa namu, Satana ‘atungunukaa na kwilenguula bu mwikeyilu w’etaata.’ (2 Beena-Kodinto 11:14) Diabulu mukumbeene kutumika na mayele a mushimushi bwa nkudimba na nkupambusha bwashi twekalanga na nshalelo asankisha Efile Mukulu. Mukumbeene nkubofusha kwishimba, pangi nkutuma mu kupwandikisha shi twe mukumbeene kobesha kusankisha Efile Mukulu. (Myeele 24:10) Sunga Satana ekala akitshi bu “ntambwe e bukyelo” sunga bu “mwikeyilu w’etaata,” mpaka yaaye ngitale nkapenda mwanda umune: Amba shi su botompibwa, okyebe kuleka kufubila Efile Mukulu. Mushindo kinyi oodi mukumbeene kwalula ku mpaka ya Satana na kulesha kululama koobe ku meso kw’Efile Mukulu, bu bibakitshine Yoobo?

KUKOKYELA KWA MIIYA YA YEHOWA

17. Mwanda kinyi wa kumpala awitutumu mu kukokyela miiya ya Yehowa?

¹⁷ Su wekala na nshalelo asankisha Efile Mukulu, we mukumbeene kwalula ku mpaka ya Satana. Bino abilesha kinyi? Bible alula shi: ‘Ofule [Yehowa] Efile Mukulu oobe n’eshimba dyoobe dyooso na mûwa oobe ooso mpa na bukome boobe booso.’ (Miiya Ikituulwe 6:5, EEM) Su kifulo kyodi nakyo bw’Efile Mukulu kibatama, wekala na lukalo lukata lwa kukita kyakutekye. Yowano mutumibwa bafundile shi: “Kifulo ky’Efile Mukulu kii bino, tulame miiya yaaye.” Su bofulu Yehowa n’eshimba dyoobe dyooso, okyebe kumona shi “miiya yaaye ta mbushito bwitutentekwe nya.”​—1 Yowano 5:3.

18, 19. (a) Temuna ingi miiya ya Yehowa. (Tala kashibo amba shi: “Shikwa myanda ishikwe yehowa.”) (b) Mushindo kinyi watuuku shi Efile Mukulu takwete kwituteka myanda itukile nya?

¹⁸ Miiya kinyi ya Yehowa yatudya kulonda? Ingi miiya ngitale mwikeelo autungu kusuuka. Bu kileshesho, tala ingi i mu kashibo ke mwisaki dya 122, ke na mutwe wa mwanda awamba shi “Shikwa myanda ishikwe Yehowa.” Mu kaka kashibo okyebe kumona mulongo wa myanda ayitutosha Bible. Obe kyatala mususa wa kumpala, ingi myanda ngikumbeene kumweka bu ishi bubi. Kadi Kunyima kwa kunangushena pabitale maverse abadi baleshe, okyebe kumona shi miiya ya Yehowa ngya binangu. Kushintuula ingi myanda mu mwikeelo oobe nkulombeene nkwikeela bukopo. Kadi, kwikala na nshalelo asankisha Efile Mukulu akupeya muntu muloo ukata na masanka. (Yeeshaya 48:17, 18) Na dingi we mukumbeene kobesha kwibikita. Atwibiuku naminyi?

¹⁹ Yehowa tetutekaa myanda itukile bukopo nya. (Badika Miiya Ikituulwe 30:11-14.) Auku bukome bwetu na patudi bafudiile kalolo kwitukila na’twe banabeene. (Misambo 103:14) Kukila byabya byooso, Yehowa mukumbeene kwitupa bukome bwa kumukokyela. Mpoolo mutumibwa bafundile shi: ‘Efile Mukulu nga kishima, shakakumiina’shi nutompiibwe kukila bukome bwenu. Anka mu kipindji akikenufikila kutompiibwa akenupa bukome bwa kukambila na kwinulumbulwila eshinda dyanudya kutuuka mwanka.’ (1 Beena-Kodinto 10:13, Kilombeno kipya) Bwa nkukwasha bwashi okambile kutompibwa, Yehowa mukumbeene nkupa “bukome bushi bwa kupwandikisha nabo kintu.” (2 Beena-Kodinto 4:7) Kunyima kwa kukambila bitompwanga bibungi, Mpoolo baadi mwambe shi: “Nee mulombeene kukita byooso mwanda wa uno anyingisha.”​—Beena-Fidipe 4:13.

KWIKALA KWA NA NGIKASHI AYISANKISHA EFILE MUKULU

20. Abitungu wekale na ngikashi kinyi ayisankishaa Efile Mukulu, na bwakinyi i na muulo?

²⁰ Eyendo shi kusankisha Yehowa ta nkufudiile penda mu kushikwa myanda yaadi mushikwe nya. We na kya kufula myanda yaadi mufule. (Beena-Looma 12:9) Obe namu se okuminaa kwikala pepi na muntu e na mweneno a myanda umune no’be, mukumine myanda yoodi mukumiine, na ataa na muulo myanda yomonaa shi i na muulo? Bi mumune na Yehowa. Byabya kita mobe mooso bwa kufula myanda ayisankishaa Yehowa. Ingi myanda mbeyilesha mu mukanda wa Misambo 15, mwabesambila pabitale baaba babamonaa kwi Efile Mukulu shi mbakuuku baaye. (Badika Misambo 15:1-5.)Ba kuuku ba Yehowa abatadiila bukome bw’Efile Mukulu bwashi bwibakwashe bwa kwikala na ngikashi ibuwa mu nshalelo abo. Buno bukome bwiselele abwibakwashaa bwa kwikala na ‘kifulo, muloo, butaale, lwishinko, kalolo, buwa, lukumino, kupopeela, butontshi bwa mbidi.’​—Beena-Galate 5:22, 23.

21. Nkinyi akikyebe nkukwasha bwa kwikala na ngikashi ayisankisha Efile Mukulu?

²¹ Kubadika na kulonga Bible nsaa na nsaa akukyebe nkukwasha bwa kwikala na ino ngikashi ayisankisha Efile Mukulu. Na dingi kulonga myanda ayitutekye Efile Mukulu akwitukwasha bwa kwikala na binangu bipushene na binangu by’Efile Mukulu. (Yeeshaya 30:20, 21) Su kifulo kyoodi nakyo bwa Yehowa akitama, wekala na lukalo lukata lwa kwikala na nshalelo asankisha Efile Mukulu.

22. Nkinyi kyokyebe kukita su bwekala na nshalelo asankisha Efile Mukulu?

²² Abitungu kukita bukopo bwa kwikala na nshalelo asankisha Efile Mukulu. Bible apwandikisha kushintuula kwa nshalelo na kufuula kwa bumuntu bwa kala na kufwala bu muntu bupya. (Beena-Kolose 3:9, 10) Kadi pabitale miiya ya Yehowa, mufundji a misambo bafundile shi: ’Mu kwiyilama mmwapetela buuwa.’ (Misambo 19:12) Obe namu okyebe kumona shi kwikala na nshalelo asankisha Efile Mukulu akukupa muloo ukata. Su bokitshi byabya, okyebe kwalula ku mpaka ya Satana na kusankisha Yehowa!