DILONGYESHA 8

Bwakinyi atufwalaa kalolo patudi mu bisangilo byetu?

Nshe mwana na mwana aye mulume bakwete kufwala kumpala kwa kwenda mu bisangilo — Islande

Nyina mwana na mwana aaye mukashi bakwete kwilumbuula bwa kwenda mu bisangilo — Mexique

Batemwe ba Yehowa ba mu Guinée-Bissau bafwale kalolo — Guinée-Bissau

Kifuko kya mu Philippines akyende mu bisangilo — Philippines

Bomono mu bifwatulo bi mu uno broshire mushindo ufwale Batemwe ba Yehowa kalolo nsaa yabadi mu bisangilo bya tukongye twabo su? Bwakinyi atwateya nfwadilo etu na kulumbuula kwetu kwa mbidi na muulo?

Bwa kunemeka Efile Mukulu. Nky’eyendo shi Efile Mukulu atalaa bi mwishimba ta mbyatumweneka ku mbidi nya. (1 Samwele 16:7) Sunga mbyabya, nsaa yatwibungu bwa kumulangwila, lukalo lwetu ndwa kumupa kinemo na kunemeka bakwetu beena Kidishitu. Su twi na lukalo lwa kwimana kumpala kwa nfumu sunga prezida kampanda, abitungu tutale shi nfwadilo etu amupa kinemo bwa mwasu waye. Bi mumune na mushindo watufwala nsaa yatwende mu bisangilo; atulesha kinemo kyatupa Yehowa Efile Mukulu, aye “Nfumu a bisamba byooso,” na kinemo kyatupa mbalo yatwibungu bwa kumulangwila.—Yeelemiya 10:7.

Bwa kulesha muulo wa miiya yatulondaa mu nshalelo etu. Bible alungula beena Kidishitu bwa kufwala “na kwidinga na kwiyisha” bu bantu “abatshinyi Efile.” (1 Timotee 2:9, 10, NWT) Kufwala “na kwiyisha” akupatuula kupela kufwala bu bantu abelesha, be na nfwadilo mukumbeene kulwisha mashimba a bantu sunga alesha bipindji bya mbidi. Na dingi, kwikala “na kwidinga” akwitukwasha bwa kusangula bilamba bibuwa, kadi kushi kwilekyela sunga kukishakisha. Ino miiya ya mu Bible ayitulesha mushindo wa kusangula bilamba byatukyebe kufwala. Nfwadilo etu ebuwa na amweneka kalolo mukumbeene ‘kupa bulambukishi bw’Efile Mukulu Mupashi eetu kinemo’ na “kutumbisha Efile Mukulu” sunga tatwibakule kintu. (Tite 2:10; 1 Mpyeele 2:12) Patufwala kalolo patudi mu bisangilo byetu, atukwasha bangi bwashi bekale na mweneno ebuwa a lulangwilo lwa Yehowa.

Totshinanga kufika ku Nshibo ya Bufumu mwanda wa bilamba byodi nabyo. Twi balombeene kufwala bilamba bilombane, bibuwa na abimweneka kalolo ku meso kwa bantu; tabitungu nka shi twikale na bilamba bya muulo wi bukopo nya.

Mushindo watudi bafwale wi na muulo kinyi patwende mu kulangwila Efile Mukulu?
Miiya kinyi ayitukunkusha mu mushindo wetu wa kusangula bilamba na wa kulumbuula mbidi yetu?