DILONGYESHA 4
Yesu Kidishitu nnanyi?
1. Muwa wa Yesu ubabangile bikunyi?
Ngikashi kinyi ya Yesu ibaadi imwikashe bu muntu a bantu?—MATEO 11:29; MAAKO 10:13-16.
Yesu baadi mwilekene na bantu booso; aye baadi mushale mwiyilu bu bi miikeyilu kumpala kwaaye kutandikwa pano pa nsenga. (Yowano 8:23) Baadi kipangwa ky’Efile Mukulu kya kwibedi, na bakwashile mu kupanga kwa bingi bintu byooso. Nkapenda aye nyi ababadi bapangye kwi Yehowa kushi bukwashi bwa muntu nyi bwakinyi ayitaminyibwa bu ‘Mwan’eeleka’ a Efile Mukulu. (Yowano 1:14) Yesu baadi bu Mwakwidi a Efile Mukulu, nyi bwakinyi ayitaminyibwa bu “Eyi.”—Badika Myeele 8:22, 23, 30; Beena-Kolose 1:15, 16.
2. Bwakinyi Yesu bafikile pa nsenga?
Efile Mukulu batumine Mwana aaye pa nsenga pabelele muwa waye mwifu dya mukashi kamame mwina Yuda abetanyinaa bu Mariya. Byabya nshaye na Yesu tabaadi muntu nya. (Luuka 1:30-35) Yesu bafikile pa nsenga (1) bwa kulongyesha bantu bya binyibinyi pabitale Efile Mukulu, (2) bwa kwitupa kileshesho pabitale mushindo watudya kukita akikyeb’Efile Mukulu sunga twekala mu nkalakasho, na (3) bwa kulambula muwa waye upwidikye “bwa kukuula” bantu.—Badika Mateo 20:28.
3. Bwakinyi twi na lukalo lwa kukudibwa?
Kukuula muntu nyi nkufuta kintu kampanda bwa kumukaasha mu kibawo kya lufu. (Efilu 21:29, 30) Efile Mukulu tabaadi akyebe shi bantu bekale abafu sunga kununupa nya. Bwakinyi atwamba byabya? Balungwile muntu a kwibedi, Adame, shi su bakitshi kyabetanyina mu Bible bu “mulwisho,” afu. Byabya su Adame tabaadi mukite mulwisho, tabadya kufwa nya. (Kibangilo 2:16, 17; 5:5) Muyiile abisamba Bible, lufu ‘lubatwelele’ mu nsenga pakukidila kwi Adame. Byabya, Adame baadi mupe bana baye mulwisho na kibawo kya lufu akifiki ku mulwisho. Twi na lukalo lwa kukudibwa bwa kwitutusha mu kibawo kya lufu kyatudi bapyane kwi Adame.—Badika Beena-Looma 5:12; 6:23.
Nnanyi baadi mukumbeene kutuusha mulambu bwa kwitukuula ku lufu? Paatufu, atufutu kibawo kibaabadi betutshibile bwa milwisho yetu atwe banabeene. Muntu su ngumune shi mupwidikye tamukumbene kufuta bwa milwisho ya bangi nya.—Badika Misambo 49:7-9.
4. Bwakinyi Yesu bafwile?
Yesu tabaadi byatudi atwe nya; aye baadi muntu mupwidikye. Byabya tabaadi mulombeene kufwa bwa milwisho yaye nya, mwanda tabaadi mukite mulwisho su ngumune. Kadi, Yesu bafwile bwa milwisho ya bangi. Efile Mukulu baadi muleshe kifulo kikata paye kutuma Mwana aaye bwa kwitufwila. Yesu namu baadi muleshe bantu kifulo kikile bukata paye kukokyela Nshaye na kutuusha muwa waye bwa milwisho yetu.—Badika Yowano 3:16; Beena-Looma 5:18, 19.
Tala video Bwakinyi Yesu bafwile?
5. Yesu kwete kukita kinyi binobino?
Pabaadi pano pa nsenga, Yesu bapashishe basha mikumbo, babushile bafwe, na kupasha bantu abaadi mu masaku. Byabya baadi muleshe patooka myanda yakakitshi bwa bantu basha kukokyela mu mafuku aafiki. (Mateo 15:30, 31; Yowano 5:28) Kunyima kwa Yesu kufwa, Efile Mukulu bamusangwishe aye nkufika muntu a mu kikudi. (1 Mpyeele 3:18) Akupu Yesu batengyele ku mboko ibalume y’Efile Mukulu mpa na nsaa ibamupele Yehowa bukome bwa kumunana bu Nfumu a nsenga ishima. (Beena-Ebreeyi 10:12, 13) Binobino Yesu kwete kumunana bu Nfumu mwiyilu, na balongi baaye bakwete kulungula uno mukandu wibuwa mu nsenga ishima.—Badika Danyele 7:13, 14; Mateo 24:14.
Kubashala mafuku apela bwashi Yesu aleshe bukome bwaye bwa bu Nfumu na kupudisha makyenga ooso na kubutula booso bakwete kwiafwisha. Baaba booso bakwete kulesha shi be na lukumino mwi Yesu paabamukokyela abakekala na muwa wa looso mu mpaladiiso pa nsenga.—Badika Misambo 37:9-11.