DILONGYESHA 15
Bwakinyi abitungu shi otungunukye?
1. Kutungunuka na kulonga Bible akukukwasha bikunyi?
Kushi mpaka, ano malongyesha akata a mu Bible aakukwasha bwashi ofule Yehowa dingi ngofu. Abitungu okite moobe mooso bwa kunyingisha kyakya kifulo. (1 Mpyeele 2:2) Wekala na lukulupilo lwa kupeta muwa wa looso su otungunuka na kulonga Eyi dy’Efile Mukulu bwa kwifubwila pepi naaye.—Badika Yowano 17:3; Yuude 21.
Apende kiukilo kyobe ky’Efile Mukulu na kutama, lukumino loobe namu alutama. Lukumino ndulombeene nkukwasha bwa kusankisha Efile Mukulu. (Beena-Ebreeyi 11:1, 6) Ndulombeene nkutakula mu kwilanga na kushintuula myanda yooso ayitungu kushintuula mu nshalelo oobe.—Badika Bikitshino 3:19.
2. Kiukilo kyobe ky’Efile Mukulu nkikumbeene kukwasha bangi naminyi?
We mukumbeene kwikala mu kipwano kibuwa na Yehowa
Binyibinyi, okyebe kwisamba na bangi bantu myanda yoodi mulongye—atwe booso twi na lukalo lwa kulungula mukandu wibuwa. Potungunuka na kulonga Bible, okyebe kuuka mushindo wa kutumika na Bible bwa kupatulwila bantu lukumino loodi nalo mwi Yehowa na mu mukandu wibuwa.—Badika Beena-Looma 10:13-15.
Bantu bebungi ababangaa na kulungula bakuuku baabo na beena kifuko nabo mukandu wibuwa. Ebikite na kanemo. Pamutwe wa kwibalungula shi kipwilo kyabo nkya madimi, ebalungule pabitale milayilo y’Efile Mukulu. Na dingi, uuka shi kintu kilombeene kukuma bantu ku mashimba nyi mmwikelo oobe wibuwa ta mpenda myanda yokwete kwakula nya.—Badika 2 Timotee 2:24, 25.
3. Nkipwano kinyi kyodi mukumbeene kwikala n’Efile Mukulu?
Kulonga Eyi dy’Efile Mukulu akukyebe nkukwasha bwa kukula mu kikudi. Okyebe kwikala mu kipwano kibuwa na Yehowa. We mukumbeene kwikala muntu aaye, bu muntu a mu kifuko kyaaye.—Badika 2 Beena-Kodinto 6:18.
4. Mushindo kinyi oodi mukumbeene kutungunuka na kwenda kumpala?
We mukumbeene kwenda kumpala mu kikudi su otungunuka na kulonga Eyi dy’Efile Mukulu. (Beena-Ebreeyi 5:13, 14) Teka umune a ku Batemwe ba Yehowa bwashi alongye noobe Bible ku bukwashi bwa mukanda wa A nkinyi akitulongyesha Bible?. Su botungunuka na kulonga bibungi mu Eyi dy’Efile Mukulu, okobesha myanda ya mu nshalelo oobe.—Badika Misambo 1:1-3; 73:27, 28.
Mukandu wibuwa aufiki kwi Yehowa, Efile Mukulu sha muloo. We mukumbeene kwifubwila pepi naaye su wefubwila pepi na bafubi baaye. (Beena-Ebreeyi 10:24, 25) Potungunuka na kwitatshisha bwa kusankisha Yehowa, okyebe kupeta muwa w’eyendo—muwa wa looso. Kwifubwila pepi n’Efile Mukulu nyi mmwanda wa muulo ukata odya kukita.—Badika 1 Timotee 1:11; 6:19.