Bufumu abukyebe kumuna nsenga ishima

Ouku Bufumu bwatukwete kwisambila pano?— Oolo, nyi Mbufumu bw’Efile Mukulu, Bufumu abukyebe kwaluula nsenga mpaladiiso. Okumiina kulonga myanda ibungi pabitale buno Bufumu su?—

Bufumu booso bwi na nfumu aabo. Na nfumu akunkusha bantu ba mu kyaye kipindji kya nsenga. We mulombeene kuuka Nfumu a Bufumu bw’Efile Mukulu su?— Nyi Yesu Kidishitu. Mmushaale mwiyilu. Mu kapindji kapeela akyebe kwikala Nfumu a muntu ooso e pa nsenga! Opwandjikisha shi nsaa ayikala Yesu bu Nfumu a bantu booso atwikala na muloo su?—

Atwikala na muloo wi kashaa! Mu Mpaladiiso t’amukekala ngoshi sunga kwenda mu ngoshi mbalo sunga ngimune. Muntu ooso akefuleena na muntu naye. Takwi muntu akakumbu sunga kufwa nya. Meeso a mpofu aakabuuluka, mpulu-matwi akapusha, bisheetshi abikatambuka na kwitumba. Muntu ooso akekala na byakudya bikile bungi. Na nyema ayikyebe kwikala mu kipwano munkatshi mwayo ayo inabeene mpa na munkatshi mwayo na bantu. Bantu bapwe kufwa abakyebe nkasanguka. Balume na bakashi bebungi boodi mulongye mu uno broshire bu Rebeka, Rahabe, Daavide, na Eliya abakyebe nkasanguka! Okumiina nkemonena nabo nsaa yabakasanguka su?—

Yehowa mmukufule na akumiina shi wekale na muloo. Su otungunuka na kulonga pabitale Yehowa na kumukokyela, okapete muuwa wa losoo mu mpaladiiso ebuwa! Byabya ndjo byokumiina su?—