Yesu bapaasha ka nsongwakashi na nshikwe

Aye bapu kutopeka Bafadisee bwa kwikimbila buwa bwabo na bipikwa bya kala, Yesu bakatukile na balongi baye. Badi mwende mu kibundji kya Tiire, Sidone na Fenisii bibadi mu bilometre bila dya kunundu kwa kupona nguba.

Yesu bapetele nshibo ya kushala kwanka, anka tabadi akumiina bantu baukye’shi e mwamwa. Sunga mbyabya, bantu abaukile. Ungi mwana mukashi mwina Greke badi mutandjikilwe mu Fenisii bafikile na kwidila kwi Yesu shi: “Nfwile lusa Mwanaana, Mwana a Daviide! Mwan’ande mukashi mbamupombeshe bikata kwi bikudi bibi.”—Mateo 15:22; Maako 7:26.

Kunyima kwa kapindji, balongi ba Yesu abamulungwile shi: “Mupushiishe mwanda eelondeena neetu na kwitushika maunga.” Kadi Yesu bebalulwile shi: “Mbantume nka kwi mikooko ishimine ya mu nshibo ya Isaleele.” Mwana mukashi tabakookyele nya. Badi afiki na kwiyela paashi kumpala kwa Yesu na kwidila shi: “Mwanaana fika onkwashe!”—Mateo 15:23-25.

Pangi bwa kutompa lukumiino lwaye, Yesu bamulungwile mpwandjikisho a beena Yuuda kwi bantu ba bingi bisamba shi: “Tabii buwa kwata mukate wa bana bwa kwiwelela tubwa.” (Mateo 15:26) P’aye kwakula bwa “tubwa,” sunga twana twa mbwa, Yesu alesha bi lusa lwaye kwi bantu bashii beena Yuuda. Lusa lwaye na kalolo kaaye akamwenekyela ku eyi dya kalolo dyakula nadyo.

Pamutwe pa kufiita munda, yawa mwana mukashi badi mukumiine shi beena Yuuda abayishaa bantu milongo, kadi amulungula mweneno aaye na kwiyisha shi: “Eyendo Mwanaana! Mbiabidi, mwanda tubwa atudiyaa bipese abipono ku meesa a banfumwa’bo.” Yesu bamwene bibadi lukumiino lwa mwana mukashi, aye nkumulungula shi: “Mukashi’be lukumiino loobe ndukata! Bikukitshikile buu byokyebe!” (Mateo 15:27, 28) Bibadi bikitshikye, sunga byekala shi ka nsongwakashi kaaye takabadi paapa! Pabadi mwalukiile ku nshibo, bapetele mwan’aye mwiole ku lusala mupwe kupanda—“kikudi kibi kibadi kipwe kutuuka”!—Maako 7:30.

Kubanga ku kibalo kya Fenisii, Yesu na balongi baye abakatukile kyakya kibundji basabuka dya kunundu kwa Mwela wa Yoordano. Abimweneka shi abasabukile Yooradano dya kunundu kwa Kalunga ka Ngalileya na kwenda mu kibalo kya Dekapole. Kwakwa, abayile ku mwengye, kadi bibumbu bibebalondele. Abadi batwadile Yesu bantu balemane, batapikye, ba mpofu na tumaama. Abadi baladishe booso ba-sha malaadi ku ngwa ya Yesu aye nkwibapaasha. Na kukaanya kooso, bantu abadi batumbishe Efile Mukulu a Isaleele.

Yesu bakambile kutuula kinangu kyaye kwi muntu umune shibadi apusha na kwakula. We kumona bibapushishe munkatshi mwa kibumbu. Pangi kutala bibadi yawa muntu mufiite munda, Yesu bamwatshile akatuka naye mu kibumbu kya bantu. Pababadi pa bupenka, Yesu bamulungwile byakyebe kukita. Bamwelele minwe mu matwi, kunyima aye nkufiila mata, bakumine ludjimi lwa yawa muntu. Akupu Yesu batadile mwiyilu, aye nkwakula kishima akilesha shi: “Shikuka.” Kubanga nka paapa, yawa muntu babangile kupusha na kwakula kalolo. Yesu takumina shi bebilungule bantu nya, akumiina shi bantu banabeene bakumiine mwadi, kushii bwa byabamono na byabapusha nya.—Maako 7:32-36.

Bukome bwa Yesu bwa kupaasha bantu bubadi na bukitshishi bukata kwi bantu abadi abamumono “babakaanyine ngofu. Dingi abadi abamba shi: byooso mmwibikite kalolo, apushisha ba-sha kitwi na kwakwisha tumaama.”—Maako 7:37.