Kufwila bangi lusa kwi na muulo

Mpyeele bapu kupusha elango dya Yesu pabitale kupwa nkalakashi na bangi pa kukimba kwiyipwa lumune ku lumune. Binobino Mpyeele akimbi kuuka misango bungi kinyi yadi mulombene kwitatshisha bwa kwibikita.

Mpyeele nkwipusha shi: “Mwanana, apankitshiina mukwetu kito, mmisuusa bungi kinyi yandya kumufwila lusa? Mpa na ku misuusa musamboobidi su?” Bangi bakata ba bipwilo abadi abalambukisha shi muntu e kufwidishena lusa mpa na ku misango isatu. Kadi Mpyeele bamwene shi ekala na kalolo kakile su afwila mukwabo lusa “mpa na ku misuusa musamboobidi.”—Mateo 18:21.

Anka, tabibadi mu kwipusheena na kinangu kibalongyeshe Yesu kya kupela kubadika misango ya kufwila muntu lusa. Nyi Yesu nkumuludika shi: ‘Ntankulungula shi nyaa na ku misuusa musamboobidi, anka’shi nyaa na ku misuusa makumi musamboobidi na musambo.’ (Mateo 18:22) Mu ungi ngakwilo, abitungu kufwidishena lusa kushii kukooka. Mpyeele tabadya kubadika bungi bwa misango bwadya kufwila mukwabo lusa nya.

Yesu badi mulungule Mpyele na bangi kileshesho bwa kukuna mwabadi kitungo kya kufwila bangi lusa. Bebalungwile pabitale mpika badi mukutwe kwambula lusa lwa nfumwa’ye. Nfumu bakimbile kubadika bintu byaye na bafubi baye. Mufubi umune badi n’ebasa dya talenta 10 000 ya kumwalwisha. Tabadi na mushindo wa kwalusha dyadya ebasa nya. Nfumu nkwata kitshibilo kya’shi mufubi audishe mukashi aaye na bana bwa kufuta ebasa. Mufubi nkupona kumpala kwa nfumwa’ye na kumwisendeela shi: “Peta lwishinko pa mwanda wande, naakwalwisha byooso.”—Mateo 18:26.

Nfumu bapushishe lusa, aye nkutadiila mufubi ebasa dyaye. Musango umune aye kyapu kumutadiila, yawa mufubi bayile kwi mufubi naaye badi n’ebasa dya ndenye 100. Aye nkumukwata mu nshingo na kumufina lukono pa kwamba shi: “Futa kyoodi na kya kufuta.” Kadi yawa mufubi naaye nkupona ku ngwa ya mufubi naaye aadi naye ebasa na kumwisendeela shi: “Ngikeele namu na lwishinko, naakufutu.” (Mateo 18:28, 29) Anka, mufubi abekeele bafwile lusa kwi nfumu ntamwambule kileshesho kya mukata aaye nya. Balondele mufubi naaye badi n’ebasa dishadile, aye nkumwela mu lukano na p’akafutshila ebasa dyaye.

Binobino Yesu nkulonda shi bangi bafubi abamwene kukutwa kwa lusa kwa mukwabo abayile mu kulungula nfumwa’bo, aye nkumwitanyina na nsungu amulungula shi: “Mufubi eebubi’be! Naadi mukulekyele kishiyo kyoobe kyooso, mwanda boodi munsendeele. Obe naamu, toboody’a kufwila mwinoobe lusa, binaadi ami nabene mukufwile lusa su?” Na nsungu yooso, nfumu badi mutuule uno mufubi shi na lusa mu maasa a ba sha kifita naa p’akalusha kyoso kibadi na kya kumwalwisha. Yesu nkufudiisha shi: “Byabya ngi abiinukitshina Nshami e mwiyilu, su ooso akwanudi taafwila mukwabo lusa n’eshimba dyaaye dyooso.”—Mateo 18:32-35.

Dino nyi ndilongyesha dikile buwa dyatubapete pabitale kufwidishena lusa! Efile Mukulu mwitufwile lusa kwibasa dikata dya mulwisho. Sunga mwina Kidishitu neetu etukitshina kilubilo ki naminyi, ta kya kwikala mumune na byabadi betulekyele nya. Na Yehowa etufwilaa lusa, kushii penda musango umune nya kadi misango ibungi. Tatwi balombene namu kufwila bakwetu lusa misango yooso sunga byetutonda su? Nka bu bibadi Yesu mulongyeshe mu Mwisambo waye wa ku Mwengye, Efile Mukulu ‘etulekyeela mabasa eetu, bu biatulekyelaa namu baba be n’etu mabasa.’—Mateo 6:12.