Fubisha tudiingi bwa kwikala bibuwa—Mafuku e kumpala

Kileshesho kya mwana mushimine kibakatukile Yesu mu kwakula kibadi na kya kukaanyisha bafutshishi ba bitadi, bafundji na Bafadisee p’abo kuuka shi Efile Mukulu akumiina kufwila ba sha milwisho abelanga ku mashimba lusa. (Luka 15:1-7, 11) Binobino Yesu baluluka kwi Balongi baye. Batusha kingi kilesesho kya muntu mpeta bawukile shi mulami a nshibo sunga mpika a bintu byaye bakutwa kukita myanda kalolo.

Yesu alondo shi abafundjile mulami shi kwete kufubisha bintu bya nfumwa’ye bibubi. Mukata bambile shi abitungu kubinga yawa mulami. Mufubi b’eyipwishe shi: “Nkite kinyi, mwanda mfumwami taanyengye bulami? Su nkufuba, ntshii nako bukome. Kuteka kya pa lusa, nee nakwo buufu.” Bwa kulumbuula nshalelo aaye e kumpala bafudishe’shi: “Naauku kyankakitshi, bwa’shi pabakankaasha ku bulami, kwikale bantu ba kumpokyela kwabo ku mashibo.” Bayitaanyine baba abadi na mabasa eebepusha shi: “Bungi kinyi boodi na kya kufuta nfumwami?”—Luka 16:3-5.

A kumpala balulwile shi: “Malondo a mwimu lukama.” Milangi 2 200 ya mwimu ibadi na kya kumufuta. Muntu sh’ebasa badi pangi n’efuba dikata dya olive sunga kwikala nsunga mukata a mwimu. Mulami nkumulungula shi: “Tala kasaki bukidi, shaala, ofunde makumi ataano” sunga milangi 1 100.—Luka 16:6.

Mulami nkwipusha ungi shi: “Obe naamu mbungi kinyi boodi naa kya kufuta?” Aye nkumwaluula shi: “Mpaaya ya bukula lukama.” Sunga milangi 22 000. Mulami nkulungula sha ebasa shi: “Tala kasaki funda makumi mwanda.” Badi mwibapeleshe mabasa ebungi.—Luka 16:7.

Yawa mulami badi kii nka na bushito bwa nfwalanga ya mukata aaye, mu ungi ngakwilo badi na matalwa a kupeelesha mabasa a bangi kwi nfumwa’ye. P’aye kupeelesha bungi bwa ba sha mabasa, yawa mulami badi atuulu kipwano na baba abadi pangi na kya kumukwasha kunyima kwa kushimisha mudimo waye.

Kunyima, nfumwa’ye baukile bibadi bikidikye. Sunga byekala shi bibakitshi mulami bibadi kushimisha kwaye kwa bintu, nfumwa’ye bakaanyine na kumutumbula mwanda, sunga byekala shi mulami badi “mulamalama” badi nyi “mudimukye.” Nyi bwakinyi Yesu akumbasha angi mayi shi: “Beena pano pa nsenga mbadimukye munkatshi mwabo, kukila beena mw’etaata.”—Luka 16:8.

Yesu t’atoopeka mayele a mulami nya, sunga kukwatshishena busunga bwa bulamalama. Binobino badi akyebe kwakula kinyi? Yesu balungwile balongi shi: “Kitayi bakuuku na mapeta ashii alulame, bwa’shi, panukatwela mu dikyenga, nwikale batambulwe mu mashibo a looso.” (Luka 16:9, Kilombeeno kipya 2014) Oolo, twi balombeene kupeta dilongyesha pabitale kwikala na kinangu na kumwena myanda kula. Bafubi b’Efile Mukulu, “beena mw’etaata” abakumiina kufubisha bintu byabo na mayele, mbekale na kinangu kya muwa wa looso mu binangu byabo.

Nkapenda Yehowa na Mwan’aye ngi balombeene kupokyela muntu mu Bufumu bwa mwiyilu sunga mu Mpaladiiso pa nsenga mu bwabwa Bufumu. Su atukyebe kwikala nabo mu kipwano, abitungu tufubishe bintu byoso byatudi nabyo kalolo pa kukwatshishena myanda ya Bufumu bwa shi yende kumpala. Kyamo kyebakenyi, na oòlo mpa na angi mapeta eetu mbilombene kulwishibwa, anka muwa wa ikalaika wa badi betulee ngwa binyibingi.

Yesu bakwile dingi shi baba booso be na lulamato mu kulombasha na kufubisha mapeta sunga bintu byoso byabadi nabyo, abekala dingi na lulamato mu myanda ikata. Nyi bwakinyi Yesu aleesha shi: “Byabya, su tanwi balombeene kukulupilwa mu nfwalanga ishii kapu, naanyi akenupa kintu kiibuwa bwa biinyibiinyi [bu myanda itale Bufumu]?”—Luka 16:11.

Yesu alesha shi abakatekye balongi baye biibungi su abakeekala na kya kupokyelwa “mu mashibo a looso.” Muntu takwikala mulangwidi a binbinyi a Efile Mukulu na kwikala musango umune mpika a kukutwa kululama kwa mapeta a ku mbidi. Yesu afudiisha shi: “Mufubi su ngumune tamulombene kufubila ba nfumu babidi: bisumanga ashikwa umune afule ungi. Tanwibalombene kufubila Efile Mukulu na nfwalanga pamune nya.”—Luka 16:9, 13.