Yesu batulu mpaladiso na kulombasha mudimo waye

Mafuku apeela kunyima kwa lubatshisho lwaye, Yesu badi mukabile mwishikwanyi badi na kitshibilo kya kumuponesha sunga kumpala kwa kubanga mudimo waye. Yawa mwishikwanyi Diabulu, batompele Yesu misango ibungi. Kunyima Yesu bambile pabitale yawa muntu ebubi shi: “Nfumu a pano pa nsenga kwet’afiki, eyendo teena matalwa kwandi nya.”​—Yowano 14:30.

Mutumibwa Yowano bamwene mu kimonwa abikafudila ‘nyoka mukata, nyoka a kala abayitanyina bu Diabulu na bu Satana.’ Yawa mwishikwanyi mukata a bantu badi na kya kubingibwa mwiyilu na kwikala “mukwatshikye nsungu, mushinguule shi kubamushaala mafuku apeela.” (Kibafumbwilwe 12:9, 12) Bena Kidishitu be na kabingilo ka kukumina shi be mu kapidji keepi ka “mafuku apeela” n’ashi “nyoka a kala” akyebe kwedibwa mu lupongo munda mwa bipwa 1 000 amukekala Yesu bu mukunkushi a Bufumu bw’Efile Mukulu.​—Kibafumbwilwe 20:1, 2.

Mu kyakya kipungo, nkinyi akikakitshika pa nsenga patudi bashale? Mba nnanyi abakyebe kwikala panka na myanda ayikekala naminyi? Yesu nabene atusha lwalulo. Mu lukindji lwaye lwa mikooko na mbushi, balesheshe akikafikila bantu balulame be bu mikooko, abo bakwete kufuba pamune na kukitshina bakwabo na Yesu bibuwa. Balesheshe dingi akitengyela baba abakitshi bilekene, abo bekale bu mbushi. Yesu bambile shi: “Abakatuka [mbushi] bende, bano mu malwa aa iikalaika, balulame [mikooko] naamu mu muwa wa iikalaika.”​—Mateo 25:46.

Bino abitukwasha bwa kupusha kalolo mayi a Yesu abalungwile yawa ntomboshi badi mupudikwe mu bwipi mwaye. Yesu tabalayile bwa kupa yawa muntu efuto dimune na dibalayile batumibwa basha lulamato, dya kwikala bena Bufumu bwa mwiyilu nya. Anka, Yesu badi mulee uno nkitshishi a bubi b’elangile shi: “Eyendo naakulungula’shi, leelo uno, okeekala naami mu Mpaladiso.” (Luka 23:43) Byabya, yawa muntu bapetele lukulupilo lwa kushala mu Mpaladiso, mu lupango lwibuwa sunga efuba. Mu kwakula kwa kalolo, baba bekale bu mikooko lelo abakatwele “mu muwa wa iikalaika” abakekala namu mu Mpaladiso.

Bino bi mu kwipushena na abilesha mutumibwa Yowano myanda ayikekala pa nsenga. Bambile shi: Bamwene “kishaleelo ky’Efile Mukulu na bantu, abayikala miilo yaaye, na aye ayikala Efile Mukulu e-pamune nabo. Akumuna mpolo yooso ku meeso aabo. Lufu talwikala kwanka dimo, taakwikala dimo sunga maalo, sunga kwidila, sunga mikumbo, mwanda bya-pano bya kala bibashimina.”—Kibafumbwilwe 21:3, 4.

Bwa shi yawa ntomboshi akasangeele muwa mu Mpaladiso, abitungu asangushibwe ku bafwe. Na tabakamusangusha bupenka nya. Yesu badi mwibipatuule pabambile shi: “Akufiki nguba abapusha eyi dyaaye kwi booso balaale mu nyembo, baba babakitshine biibuwa, abeemutuuku, basangukye bwa kupeta muwa, bakite biibubi, abasanguka bwa kushimishibwa.”—Yowano 5:28, 29.

Kadi twi kwamba naminyi bwa batumibwa ba sha lulamato ba Yesu na bangi abakekala na Yesu mwiyilu? Bible akula shi: “Abayikala ba-tshite-mwakwidi b’Efile Mukulu na ba Kidishitu, abadi bufumu pamune naaye munda mwa bipwa kinunu (1 000).” (Kibafumbwilwe 20:6) Bano abakamunana na Yesu abakekala balume na bakashi abakatukila pa nsenga. Byabya, abakekala na lusa na kupusha kalolo bi bukunkushi bwa mwiyilu kwi baba be pa nsenga.—Kibafumbwilwe 5:10.

Yesu akafubisha mulambu waye wa nkuulo bwa kukatusha bantu ku mulwa wa mulwisho wabadi bapyane. Aye na bakamunana nabo abakafwisha bantu ba sha lulamato mu kupwidika. Eyendo, bantu abakasangela nshalelo badi ku mbangilo mu mpango y’Efile Mukulu pabalungwile Adame na Eeve bwabadya kufwima na kuwusha nsenga. Sunga lufu lubatukile ku mulwisho wa Adama talwikala kwanka dimo!

Yesu akalombasha byoso bibadi Yehowa mumutekye bwa kukita. Ku nfudilo kwa Bipwa Kinunu bya Kumunana kwaye, Yesu akalusha Bufumu na kifuko kya bantu bapwidikye mu maasa a Nshaye. Mpoolo mutumibwa bafundjile bino pabitale kwiyisha kwa Yesu shi: “Apamukookyela bintu byooso, paapa Mwana nabeene akookyela uno bamupeele matalwa a kukookyesha byooso, bwa’shi Efile Mukulu ayikale mu byooso mu bushima bwaaye.”​—1 Beena-Kodinda 15:28.

Kushi mpaka, Yesu e na mudimo ukata pabitale kulombasha mpàngo ya ntumbo y’Efile Mukulu. Apakatungunuka na kulombana yaya mpàngo bwa ikalaika, akekala a kulombasha kalolo bibakwile shi: “Ami nee eshinda, nee biinyi, nee muwa.”​—Yowano 14:6.