Bafubi ba midimo bakwete kukita mudimo wibuwa

MPOOLO mutumibwa baadi mufundjile kakongye ka ku Fidipe’shi: “Ami Mpoolo na Timote bafubi ba Yesu Kidishitu, kwi bantu b’Efile booso mu Yesu Kidishitu be ku Fidipe, pamune na bakulu ba kakongye kaabo na bakwashi baabo [bafubi ba midimo, NWT].” (Fid. 1:1) Lamiina’shi pano Mpoolo baadi mwimune mpaa na bafubi ba midimo. Bano balume abaadi abafubu mufubo ukata mu kukwasha bakulu ba mu twatwa tukongye. Bi nka byabya mpaa na mu ano mafuku etu. Bafubi ba midimo abakitaa mifubo ayikwasha bakulu na bwa’shi byoso bikitshikye kalolo mu kakongye.

² Ouku bafubi ba midimo be mu kakongye kenu su? Oshinguula mudimo wabakwete kukita bwa nkukwasha na bwa kukwasha kakongye kooso kashima su? Mudimo awukitshi bano balume ausangashaa Yehowa ngofu. Mpoolo bafundjile’shi: ‘Baba bafubi ba mu kakongye abafubu mufubo wabo kalolo abakaneemekibwa mwanka, dingi, abakesamba kushi moo mwanda wa lukulupilo lwabo mwi Kidishitu Yesu.’​—1 Tim. 3:13, EEM.

MYANDA ITEKIIBWE MU BIBLE BWA KWIKALA MUFUBI A MIDIMO

³ Mbitekiibwe bwa’shi bafubi ba midimo bekale na nshaleelo a beena Kidishitu, balume banyingye, abalombasha midimo yaabo kalolo. Bino abimweneka nsaa y’atutaluula mayi a Mpoolo pabitale kulombasha kwabo kwa myanda itekiibwe mu mukanda ubaadi mufundjile Timote’shi: ‘Byabya dimo, na bakwashi ba kakongye [bafubi ba midimo] be na kya kwikala bantu ba kineemo, bekale n’eyi nka dimune, kushii kutwela mu buntomi bwa maalwa, sunga kukimba bya kupeta nfwalanga mu bulamalama. Balame mwanda [ufwame] wiselele wa lukumiino mwishimba diselele. Abo dimo, bebatompe kumpala, akupu, su takwi kintu su nkimune kya kwibakalashena nakyo, byabya bakite mufubo waabo wa bukwashi. Bafubi ba midimo bekale bayibakile mukashi umunenka, baludikye kalolo baana baabo na nshibo yaabo’bo banabeene.’ (1 Tim. 3:8-10, 12) Kulamata ku mayi akata atekiibwe bwa bafubi ba midimo akukalwila kakongye bwa’shi takatopekwanga ku kintu kampanda akikitshi bantu babadi bape mashito.

⁴ Byabekala bakulu sunga bakinga, bafubi ba midimo mbantu bepaane mu bulungudi ku mweshi ooso. Mu kulonda kwa kileshesho kya Yesu, abalesha katshintshi mu bulungudi. Pabadi na katshintshi ke byabya, abalesha lukalo lukata lwi nalo Yehowa bwa’shi bantu bapashibwe.​—Yesh 9:7.

⁵ Balume bafubi ba midimo abatuusha kileshesho mu nfwadilo aabo, ntshibilo a nyene, ngakwilo, binangu na mwikelo waabo. Be na binangu bibuwa, abikwasha bwa’shi bangi bebanemekye. Na dingi, abateya kipwano kyabo na Yehowa mpaa na mudimo waabo mu kakongye na muulo.​—Tt. 2:2, 6-8.

⁶ Bano balume ‘mbebatompe.’ Sunga kumpala kwa’bo kupeta mudimo waabo, mbaleshe’shi mbalume bepaane binyibinyi. Mbaleshe’shi abatulaa myanda ya Bufumu pa mbalo ya kumpala mu muwa waabo na bakwete kukimba bya kukita mudimo ooso wabadi balombene kwibapa. Kushii mpaka mbekale bu kileshesho kyabadi balombene kulonda kwi bangi mu kakongye.​—1 Tim. 3:10.

MUSHINDO WA BAKWETE KUFUBA

⁷ Bafubi ba midimo abakitaa midimo ilekeene bwa kukwasha bakwabo balume na bakashi, na bino abikwasha bakulu bwa’shi bakishe nsaa ibungi mu mudimo wa kulambukisha na kulama lombe. Nsaa y’abakyebe kwibapa midimo, kasaka ka bakulu akatalaa bi bukome bwa muntu na muntu ooso na lukalo lwi mu kakongye.

⁸ Banda kutala ingi ya ku ino midimo: Mufubi a midimo umune mulombeene kufuba mu mikanda bwa’shi twiyipete bwetu’twe banabeene na bwa kutumika nayo mu bulungudi. Bangi abafubu mu myanda ya makuta sunga mu teritware. Bangi mbebape mudimo wa kukisha mikro mu bisangilo, kutumika mu myanda ya bikolo, kukuukila bantu, na kukwasha bakulu mu ingi mishindo. Kwi mudimo wibungi autungu kukita bwa kubaamba Nshibo ya Bufumu na kwiyilama selele, byabya bafubi ba midimo abebetaminaa misango ibungi bwa’shi bafikye mu kukita ino midimo.

⁹ Mu tungi tukongye, mbilombeene kwikala mushindo wa kupa mufubi a midimo ooso waaye mudimo wa ku ino ibaatukatuka mu kuteemuna. Mu tungi namu, mufubi a midimo umune mulombeene kwikala na midimo ibungi. Bu kileshesho, ingi midimo mbalombeene kwiyikita kwi mufubi a midimo umune sunga bebungi. Su takwi bafubi ba midimo bebungi bwa kutwala angi mashito, kasaka ka bakulu nkalombene kwata mpángo ya kupa bangi bakwetu balume be na kileshesho kibuwa ino midimo. Byabya mbilombene kwibakwasha bwa kuuka myanda ibungi ikumbene kukwasha bwa’shi kunyima, nsaa y’abalombasha myanda itekiibwe bebasangule bu bafubi ba midimo. Su bakwetu balume tabe kwanka, mbakumbene kuteka mukwetu mukashi e na kileshesho kibuwa bwa’shi akwashe mu ingi midimo, sunga byekala’shi ta mukumbene kusangudibwa bu mufubi a midimo. Muntu e na kileshesho ki buwa nyi nguno e na mwikelo na lulangwilo lulombeene kwambula. Mushindo waaye wa kutwela mu bisangilo, kukita bulungudi, nshalelo a mu kifuko, kusangula kwaye kwa mishindo ya kukisha kapapi, nfwadilo na ntshibilo aaye a nyene, mpaa na ingi myanda nyi nkileshesho ki buwa bwa bangi.

¹⁰ Mu tukongye twi na bakulu bapeela, mbalombene kwitamina bafubi ba midimo banyingye bwa’shi bataluule nkonko itale myanda ya lulangwilo na muntu akyebe kubatshishibwa. Ino nkonko ayisanganyibwa mu Apandise, mu “Kipindji 1 akyamba’shi: Nkumiino ya mwina Kidishitu.” Bu byabidi’shi “Kipindji 2 akyamba’shi: Nshalelo a beena Kidishitu” akiisambila myanda ikata itale muntu pa bupenka, anka mukulu ndjo mulombeene kutaluula kino kipindji.

¹¹ Pabidi bilombane, mu kwenda kwa mafuku kasaka ka bakulu nkalombeene kushintuula ingi midimo ya mufubi a midimo bwa kwiyipa mungi. Anka, abikalaa buwa bwa’shi mukwetu akite mudimo umune munda mwa mafuku ebungi bwa’shi ewiukye kalolo.

¹² Muyiile myanda i mu kakongye, nkulombene kwikala ingi midimo yabadi bakumbene kupa bafubi ba midimo bakwete kwenda kumpala mu mushindo ‘aumweneka patooka ku meso a bantu booso.’ (1 Tim. 4:15) Su takwi bakulu bebungi, mufubi a midimo mulombeene kufuba bu mukwashi a mukunkushi a kasaka ka bulungudi sunga, ingi nsaa bu mukwashi a kasaka ka bulungudi, afubu ku bukunkushi bwa bakulu. Mbalombeene kupa bafubi ba midimo bwashi bakite ingi miisambo mu Kisangilo kya Nshalelo na mudimo wetu, kukunkusha Kulonga kwa Bible mu kakongye pakudi lukalo, na kukita miisambo ya bantu booso. Angi mashito mbakumbeene kwiapa bafubi ba midimo pakudi lukalo kampanda na su abalombasha myanda itekiibwe bwa wawa mufubo. (1 Mp. 4:10) Nsaa y’abakwasha bakulu, abitungu bafubi ba midimo bepaane na muloo ooso bwa kwibikita.

¹³ Sunga midimo yaabo yelekeena na ya bakulu, tangipeela ku mudimo wiselele w’Efile Mukulu na i na muulo bwa’shi byooso bikidikye kalolo mu kakongye. Kunyima, su bafubi ba midimo bakwete kulombasha mashito aabo kalolo na abalombasha myanda itekibwe bwa kwikala bu balami ba lombe na balambukishi, mbalombene kwibasangula bwa’shi bekale bakulu.

¹⁴ Su we mukwetu mulume e mu bipwa ekumi sunga baakatuka mu kubatshishibwa, okwete kukimba bya kwikala mufubi a midimo su? (1 Tim. 3:1) Bu byakudi’shi bantu bebungi bakwete kutwela mu bya binyibinyi ku kipwa kyooso, kwi lukalo lwa balume banyingye bwa kukunkusha midimo mu kakongye. We mulombeene kukimba bwa kwiyikita nsaa yolesha lukalo lwa kukwasha bangi. Mushindo wa kumpala wa kwibikita, nkunangushena ku kileshesho kibuwa kya Yesu. (Mat. 20:28; Yo. 4:6, 7; 13:4, 5) Lukalo loobe alutama nsaa yokwete kupeta muloo wa kukwasha bangi. (Bik. 20:35) Byabya, epaane bwa kutuusha bukwashi bulombane kwi bangi, bwa kukwasha mu kubamba Nshibo ya Bufumu, sunga kwilumbuula bwa kukita mwisambo wa muntu shii panka mu Kisangilo kya Bwina Kidishitu na mudimo wetu. Kukimba bya kwikala mufubi a midimo nkutale dingi kulesha ngikashi ya mu kikudi pa kwikala na kyubishi kya kwilongyela. (Mis. 1:1, 2; Nga. 5:22, 23) Na dingi, mukwetu kwete kukimba bya kwikala mufubi a midimo alesha’shi mmuntu akukulupila na sha kishima muyiile byakitshi inyi midimo y’abamupa mu kakongye.​—1 Kod. 4:2.

¹⁵ Bafubi ba midimo mbebatuule ku bukwashi bwa kikudi kiselele bwa buwa bwa kakongye. Booso be mu kakongye mbalombeene kulesha’shi abasangeela mudimo ukata wa bafubi ba midimo nsaa y’abebakwatshishena pabakwete kukita midimo yaabo. Mu kukita kwa byabya, kakongye nkalombeene kulesha’shi akasangeela mpángo ya Yehowa ya kutuula myanda mu mulongo mu nshibo yaaye.​—Nga. 6:10.