Ma mbalo eetu a lulangwilo

BALANGWIDI ba binyibinyi ba Yehowa mbebatekye bwabadya kwibunga bwa kupeta malongyesha na bwa kwinyingishena. (Eb. 10:23-25) Mbalo ya kumpala ya lulangwilo lwa beena Isaleele, mwilo usangulwe n’Efile Mukulu ibaadi “tabernakele, nshibo y’epema ya kwibungila.” (Efi. 39:32, 40, NWT) Kunyima kwa mafuku, Salomone mwana a Daavide bayibakile nshibo, sunga ntempelo, bwa kutumbisha Efile Mukulu. (1 Bf. 9:3) Kunyima abaadi babutule ntempelo mu kipwa kya 607 Kumpala kwa bino Byetu Bipungo (K.B.B.), beena Yuuda nkwata kitshibilo kya kwibaka ma sinagoge, mbalo ya kulangwila Efile Mukulu. Mu kwenda kwa mafuku, abo nkwibakuula ntempelo, bwa wawa musango nyi ntempelo bekeele dingi bu mbalo ikata ya lulangwilo lwa binyibinyi. Yesu baadi mulongyeshe mu ma sinagoge mpaa na mu ntempelo. (Luk. 4:16; Yo. 18:20) Yesu baadi mukite kisangilo pa mwengye.​—Mat. 5:1–7:29.

² Kunyima kwa lufu lwa Yesu, beena Kidishitu babaadi abebungila mu ma mbalo e bantu bebungi na mu mashibo a bantu bwa kulongyesha Bifundwe na kusangeela kwikala munkatshi mwa beena Kidishitu nabo. (Bik. 19:8, 9; Lom. 16:3, 5; Kol. 4:15; Fil. 2) Ingi misango, beena Kidishitu ba mu siekele a kumpala babaadi abebungila mu ma mbalo e kula bwa kusuuka beshikwanyi. Eyendo, bafubi b’Efile Mukulu be na lulamato abaadi na lukalo lukata lwa kwibunga mu mbalo ya lulangwilo bwabadya kwikala bu “balongi ba Yehowa.”​—Yesh. 54:13.

³ Mpaa na lelo uno, ma mbalo e bantu bebungi na mashibo a bantu akwete kukwasha bwa kukita bisangilo bya beena Kidishitu. Atwibungilaa ku mashibo a bantu bwa kukita kisangilo kya bulungudi. Baaba abatuusha nshibo yaabo bwa kukita kino kisangilo abebimonaa bu kineemo kyabadi nakyo. Bebungi mbapushe’shi mbapete bukwashi bwa mu kikudi p’abo kufungula mashibo aabo bwa kukita kino kisangilo.

NSHIBO YA BUFUMU

⁴ Mbalo ikata ayibungilaa ba Temwe ba Yehowa mmu Nshibo ya Bufumu. Misango ibungi, abawulaa lupango na kwimwibaka Nshibo ya Bufumu ipya sunga kulumbuula yaaya i mwanka. Bwa kupela kuyiisha makuta ebungi na bwa kutumika kalolo na mpàngo yetu, tukongye twibungi ntulombeene kwibungila mu Nshibo ya Bufumu imune pakudi mushindo. Mu bingi bibundji, abikalaa buwa kufutshila nshibo ya kwibungila. Nsaa y’abebaka Mashibo a Bufumu apya sunga aa e na lukalo lwa kwiebakuula dingi, abikalaa buwa bwa kukita mwisambo wa kwiyifungula. Anka, su abalumbuula tu bintu tupeela ku Nshibo ya Bufumu i kwanka, takwi lukalo lwa kukita mwisambo wa kwiyifungula nya.

⁵ Nshibo ya Bufumu t’abitungu’shi ikale na bintu bya kwiyilengyesha nabyo bikile bungi bwa kukemesha bantu nya. Sunga mushindo wabadi beyibakye ngulombeene kwilekeena muyiile ma mbalo, mpángo yaayo inka imune. (Bik. 17:24) Muyiile mbalo yayidi, abitungu ikale nshibo ibuwa na mbalo ilombane bwa kukita bisangilo bya beena Kidishitu.

⁶ Tukongye tooso twa ba Temwe ba Yehowa atutushaa bya buntu abikwasha bwa kukita midimo na kubaamba Nshibo ya Bufumu yabadi bebayibakile. T’abakishaa kashete ka milambu, sunga kuteka makuta nya. Mbatuule kashete mu mushindo ulombeene baaba abatwele mu bisangilo kwela bya buntu bilombane bwa kukwasha midimo ya nshibo. Abakitshi byanka mu kukumiina kwabo na mashimba amune.​—2 Kod. 9:7.

⁷ Beena kakongye booso abamonaa’shi, kutuusha makuta a kubaamba Nshibo ya Bufumu na kwipaana ku mudimo wa kwiyisuula na kwiyibamba kalolo nyi nkineemo kikata kwabadi. Abasangulaa mukulu umune sunga mufubi a midimo bwa’shi, akite programe a uno mudimo. Misango ibungi, tusaka twa bulungudi ndjo atusuulaa Nshibo, mukunkushi a kasaka sunga mumulondele abakunkusha wawa mudimo. Abitungu’shi, abimweneka paasha na munda mwa Nshibo ya Bufumu, bileeshe bi Yehowa na ndumbulwilo aaye.

⁸ Pakudi tukongye twibungi atwibungila mu Nshibo ya Bufumu imune, bakulu ba mu twatwa tukongye abatulaa Komite a kubaamba Nshibo ya Bufumu, mukumbeene kukunkusha myanda itale nshibo na lupango. Tusaka twa bakulu atusangula mukwetu mulume umune bwadya kwikala bu mukunkushi a mudimo. Ku bukunkushi bwa tusaka twa bakulu, uno Komite aludika midimo ya kusuula, atala su nshibo mbeyibaambe kalolo na su mwi bintu bilombane. Bino abitekye’shi kwikale kipwano na kwipushena kwibuwa mu twatwa tukongye.

⁹ Su tukongye twi bungi atwibungila mu Nshibo ya Bufumu imune, mbilombeene kwikala buwa bwa kushintuulanga programe a nsaa ya bisangilo. Bakulu abakitshi yawa programe na kaneemo mpaa na kifulo kya bwina muntu. (Fid. 2:2-4; 1 Mp. 3:8) Kakongye su nkamune nta nkalombeene kwata kitshibilo kya kushintuula nsaa pa mbalo ya tungi tukongye nya. Su mukunkushi a kifunda bafiki mu kutala kakongye kamune ke mu yaaya Nshibo ya Bufumu, tungi tukongye atushintuula nsaa ya bisangilo byato bu byabitungibwa mu lwalwa lubingo.

¹⁰ Mbalombeene kutumika na Nshibo ya Bufumu bwa kukita mwisambo wa dibaka su Komite a mudimo bakumiina. Bano bakulu abataluula kalolo myanda itekibwe na abaata kitshibilo muyiile bukunkushi bwabadi batushe kwi biro bya filiale.

¹¹ Baaba abapebwa matalwa kwi Komite a mudimo a kukitshiina mwisambo wa dibaka sunga wa pa kushiika kitanda mu Nshibo ya Bufumu, abitungu bakite myanda ipusheene na abikalaa beena Kidishitu ba binyibinyi. Kintu su nkimune ki bya kusaabulusha kakongye sunga eshina dya Yehowa ta nkilombeene kukitshika mu Nshibo ya Bufumu nya. (Fid. 2:14, 15) Ku bukunkushi bwa biro bya filiale, mbalombeene kukitshiina ingi midimo ya mu kikudi mu Nshibo ya Bufumu. Kileshesho bu, Kalasa ka mudimo wa Bufumu na Kalasa ka ba mbala-mashinda.

¹² Nsaa yooso abitungu’shi kakongye kaneemekye mbalo yaako ya kwibungila. Nfwadilo, ntshibilo a nyene na mushindo wa kulengyesha nshibo abitungu bileshe kineemo kikwatene na lulangwilo lwa Yehowa. (Mul. 5:1; 1 Tim. 2:9, 10) P’atulondo malango atale ino myanda, atulesha’shi atusangeela bisangilo byetu bya beena Kidishitu.

¹³ Kukita myanda mu mulongo nsaa ayikidika bisangilo kwi na muulo. Mbitekibwe bwa’shi baana bashaale pamune na baledi baabo. Ba nambutwile be na baana bakii bakinga mbalombeene kwibateka bwa’shi bashaale pa mbalo yabashii bya kukalakasha ngofu, na yabadi balombeene kwikala na mushindo wa kutuuka na baana bwa kwibalanga sunga bwa ungi mwanda.

¹⁴ Abasangulaa bakwetu balume banyingye bwa kwikala abakuukila bantu abafiki mu bisangilo mu Nshibo ya Bufumu. Abitungu bekale basasakate, be na musangeelo na binangu bibuwa. Mudimo wabo ngwa kusema bantu benyi na kwibakwasha bwa’shi bemone bu abapokyelwa kalolo, kukwasha bantu abafiki kunyima kwa nsaa bwa’shi bapete mbalo, kubadika bungi bwa bantu be mu bisangilo, na kukwasha mu kwela kwa kibobo na lupapi mu nshibo. Pakudi mushindo, baaba abakuukila bantu mbalombeene kutentekyesha baledi bwa’shi balame baana baabo tala bekala abakindakana mu bisangilo sunga kumpala kwa bantu. Yawa akukila bantu mmulombeene, na kalolo mpaa na kaneemo kooso, kuteka muledi sha mwana kwete kukalakasha bwa’shi atuukye naye paasha bwa’shi tala bantu baakatusha binangu ku malongyesha, bwa’shi bisangilo bikidikye mu kufukama. Mudimo wa baaba abakuukila bantu wi na muulo ukata mwanda aukwasha bwa’shi bantu booso basangeele bisangilo. Abikalaa buwa bwa’shi bakulu na bafubi ba midimo bekale abakitshi mudimo wa kukuukila bantu.

KWIBAKA NSHIBO YA BUFUMU

¹⁵ Mu siekele a kumpala, bangi beena Kidishitu babaadi na bupeta bwibungi kukila benabo. Mpoolo mutumibwa nkwibalungula’shi: “Byabya byanudi nabyo bu nsùbu abikwasha bano ku bibakopokyele, bwa’shi dingi efuku, byabadi nabyo bu nsùbu byakwasha ku abiikalaa binukopokyele; byabya abikafiki ku kulombasheena.” (2 Kod. 8:14) Lelo uno’nyi, kukwete kukitshika “kulombasheena” kwi byabya. Makuta abakwete kutuusha kwi tukongye twa mu nsenga ishima, aendaa ku mudimo wa kwibaka na kulumbuula Mashibo a Bufumu. Bukwashi abutuusha bakwetu ba mu nsenga ishima na kalolo kooso abebwata na muulo kwi ndumbulwilo mpaa na kwi tukongye tukwete kwibupeta.

¹⁶ Muyiile mbalo i tukongye, biro bya filiale abipeyaa tukongye Nshibo ya Bufumu kampanda. Biro bya filiale abyata dingi kitshibilo pabitale nsaa na mbalo ayitungu kwibaka na kulumbuula Mashibo a Bufumu apya mu teritware a filiale. Su masaku abatuuku, akwatshibwa mpángo ya kulumbuula Mashibo a Bufumu alwile na kulumbuula mashibo a bakwetu pakudi mushindo.

¹⁷ Biro bya filiale abikunkusha kusangula kwa bantu balombene kukwasha mu kupeta kwa lupango, kuuka bukata bwa Nshibo ya Bufumu, matalwa a kwibaka, kwibaka, na kubamba. Bu byakudi lukalo lukata lwa Mashibo a Bufumu mu maumbo ebungi, kwi dingi lukalo lukata lwa bantu bebungi ba kukwasha ku mudimo. Balungudi booso bapwe kubatshishibwa balombashe myanda itekiibwe na be na lukalo lwa kufuba, mbanyingishibwe bwa kuusha esaki dya kuteka mudimo wa kwibaka na kwidipa beena Komite a mudimo a kakongye kaabo. Sunga balungudi bashii babande kubatshishibwa mbalombeene kukwasha mu kwibaka sunga kulumbuula kwa Nshibo yaabo ya Bufumu.

MASHIBO A BIKONGENO

¹⁸ Misango ibungi, beena Kidishitu ba kwibedi abaadi abebungu mu tusaka tupeela. Anka, ingi misango “bantu bebungi” abaadi abebungu. (Bik. 11:26) Bi mumune, mwilo wa Yehowa lelo uno ukwete kwibunga mu bisaka bibungi bwa kukita bikongeno bya kifunda na bya mafuku asatu. Abafutshilaa mu ma mbalo akata bwa kukita bino bikongeno, kadi mu ma mbalo ashii na mushindo wa kwibikita, abebakaa mbalo ya lulangwilo yabetamina bu Nshibo ya Kikongeno.

¹⁹ Ingi misango, abaulaa nshibo, abeyilumbuula na kwiyishintuula bu Nshibo ya Kikongeno. Anka, misango ibungi abaulaa lupango na kwimwibaka nshibo ipya. Mashibo a Bikongeno ngelekeene mupunda lukalo lwa mbalo yabebaka. Biro bya filiale abyata kitshibilo kya kuula sunga kwibaka yaaya nshibo anka penda kunyima kwa’bo kutaluula muulo na bungi bwa misango yabakyebe kwikala abatwele mwanka.

²⁰ Biro bya filiale abisangulaa bakwetu balume balombeene kukunkusha mifubo na kubaamba Nshibo ya Kikongeno. Bifunda abyataa mpángo ya kwikala abemusuula nsaa yooso, kusuula kwa munkatshi mwa kipwa, na kutaluula bintu bwa’shi tabilwilanga. Bi na muulo bwa’shi bakwetu balume bepaane mu kukita kwa uno mudimo. Byabya, beena tukongye mbanyingishibwe bwa kukwatshishena ino mpángo na mashimba aabo ooso.​—Mis. 110:3; Mal. 1:10.

²¹ Ingi misango, mbalombeene kutumika na Nshibo ya Kikongeno bwa kukita ingi midimo ya teokrasi, bu tulasa twa Bible na bisangilo bya bakunkushi ba bifunda. Anka bi Nshibo ya Bufumu, Nshibo ya Kikongengo nyi mbalo yabadi bebakye bwa lulangwilo. Nsaa yatudi mu Nshibo ya Kikongeno, mwikelo wetu, nfwadilo na mushindo watulumbuula mbidi yetu abitungu uleshe kaneemo nka byatwikalaa nsaa yatudi ku Nshibo ya Bufumu bwa kulangwila.

²² Bantu bapya bebungi bakwete kufika mu kutwela mu ndumbulwilo a Efile Mukulu mu kino kipungo kya mafuku a ku nfudiilo. Bino abilesha’shi Yehowa kwete kwela mwabi. (Yesh. 60:8, 10, 11, 22) Byabya, abitungu tukwatshishene ino mpángo ya kulama mbalo ya lulangwilo bwa’shi ikale ibuwa na iselele. Su tubakitshi byabya, atulesha’shi atusangeela mudimo wi nao ano ma mbalo aetukwasha bwa kwinyingishena bu byatumono efuku dya Yehowa dibefubwila peepi.