Kukwatshishena mudimo wa Bufumu mu kakongye mpaa na mu nsenga ishima

BWA kulombasha butemuki bwa Yesu pabitale mafuku a ku nfudiilo, ba Temwe ba Yehowa bakwete kwenda na bulungudi bwa mukandu wibuwa “mpaa na kufudiile nsenga.” (Bik. 1:8; Mat. 24:14) Bwa kulombasha uno mudimo, mbakumiine kwipaana na nsaa na bukome bwabo bwa kuukisha bangi myanda ya mu kikudi. Bu byabadi batuule lukulupilo lwabo mwi Yehowa bwa kukwasha balangwidi nabo, bakwete kutungunuka na kutuula Bufumu bw’Efile Mukulu pa mbalo ya kumpala mu muwa wabo. (Mat. 6:25-34; 1 Kod. 3:5-9) Bipeta bikwete kutuuka abilesha’shi Yehowa kwete kwibelela mwabi.

KUKWATSHISHENA MYANDA YA BUFUMU MU NSENGA ISHIMA

² Bangi bantu p’abamono mayele etu a bulungudi na mushindo watukwete kwabila ma Bible na mikanda ayipatuula Bible kushii kuteka bantu kintu, abeyipusha’shi: “Mushindo kinyi wabakwete koobesha kukita bino?” Eyendo, kukita na kutuusha ma Bible na mikanda ayipatuula Bible akutekye makuta. Kwibaka na kubaamba mashibo a ma Betele bwa bafubi bakwete kutumika ku byamo bya kukita nabyo mikanda, kukunkusha mudimo wa bulungudi, na kukwasha mu ingi midimo bwa kuyiisha mudimo wa bulungudi kumpala akutekye makuta ebungi. Na dingi, bakunkushi ba bifunda, ba misionere, ba mbala-mashinda ba nsaa yooso, na bangi be mu mudimo wa nsaa yooso wipabwao abebapeya bukwashi bwa’shi batungunukye na mudimo wabo. Lelo uno, abitungu makuta akile bungi bwa kulombasha mudimo wa kulungula mukandu wibuwa mu kakongye sunga mu nsenga ishima. Ano makuta ooso aafikaa kunyi?

³ Bantu bebungi abasangeela malongyesha a mu Bible a ba Temwe ba Yehowa abakuminaa kutuusha bya buntu byabo bwa kukwasha mudimo wa nsenga ishima. Anka, kya kumpala mudimo wetu bakwete kwiukwatshishena kwi ba Temwe ba Yehowa abo banabeene, bangi abatumu bya buntu byabo ku biro bya filiale bya ba Temwe ba Yehowa bi mwiumbo dyaabo. Bakwete kulesha eshimba ditooka anka bu bibaadi bafubi b’Efile Mukulu ba mu mafuku a kala babaadi abakwatshishena lwibako lwa mbalo ya lulangwilo lwa Yehowa na kalolo kooso. (Efi. 35:20-29; 1 Mya. 29:9) Bingi bya buntu abebitushaa ku bukwashi bwa testama, bingi namu abebitushaa kwi muntu nsaa y’ele mu kashete, tukongye, na bifunda abitushaa ndambo ipeela. P’abasangisha byooso, abifiki bungi bulombeene kuyiisha mudimo wa bulungudi kumpala.

⁴ Ba Temwe ba Yehowa abamonaa’shi be na kineemo kikata kya kutuusha makuta na bungi bupeta bwabo bwa kuyiisha mudimo wa bulungudi kumpala. Yesu na balondji baaye abaadi abalama kashete ka makuta akupudisha nao ingi myanda. (Yo. 13:29) Bible etulungula pabitale bangi bakashi babaadi bakwashe Yesu na balondji baaye. (Mak. 15:40, 41; Luk. 8:3) Mpoolo mutumibwa baadi mutambule bukwashi bwa bintu bibaabadi abamupa na kifulo kyooso kwi baaba babaadi na lukalo lwa kuyiisha mudimo wa kulungula mukandu wibuwa kumpala na babaadi na lukalo lwa kwipaana mu mudimo wa bulungudi. (Fid. 4:14-16; 1 Tes. 2:9) Ba Temwe ba Yehowa bakwete kulonda kino kileshesho kya kufuba na kisumi mpaa na kutuusha bya buntu na kalolo kooso. Byabya, mbilombane bwa’shi bantu baasha mashimba ebuwa bapete “mema a muwa buntu.”​—Kibaf. 22:17.

BWA KUPUDISHA NKALO YA KAKONGYE

⁵ Bya buntu abituusha beena kakongye ngi abikwasha bwa kupudisha nkalo ya kakongye. T’abakishaa kashete ka makuta, t’abatshibilaa muntu ooso bungi bwadya kutuusha sunga kuteka bantu makuta nya. Kashete ka bya buntu abekatulaa mu Nshibo ya Bufumu pa mbalo ilombeene kwikamona muntu ooso na kutuusha “muyiile kitshibilo kya mwishimba dyaaye.”​—2 Kod. 9:7.

⁶ Kya kumpala, bya buntu byabatuusha abikalaa bwa kufubisha midimo ya kakongye na kubaamba Nshibo ya Bufumu. Kasaka ka bakulu nkalombeene kwata kitshibilo kya kutuma ndambo y’ekuta ku biro bya filiale a ba Temwe ba Yehowa bwa kuyiisha mudimo wa mu nsenga ishima kumpala. Kakongye kashima ndjo akakumiina kyakya kitshibilo. Mu uno mushindo, tukongye twibungi atutuusha bya buntu bya kuyiisha mudimo wa mu nsenga ishima kumpala. P’ekaleshi booso abauku nkalo ibamweneka mu kakongye, t’abitungu kutushanga ngukisho ya kuteka bya buntu nya.

MUSHINDO WA KUFUBA NA BYA BUNTU

⁷ Kunyima kwa bisangilo, bakwetu balume babidi abakongolaa makuta e mu tushete twa bya buntu na kukita rapore ya bya buntu. (2 Bf. 12:9, 10; 2 Kod. 8:20) Kasaka ka bakulu akakyebe kwata mpángo ya kulama ano makuta mpaa na nsaa ya kwiatuma ku biro bya filiale sunga kupudisha nao nkalo ya kakongye. Mukwetu atumika mu konte a kakongye aukisha kakongye ku mweshi ooso byabadi bafube na makuta, na kunyima kwa myeshi isatu yooso, mukunkushi a midimo ya kasaka ka bakulu aata mpángo ya’shi bataluule makuta e mu konte.

MAKUTA A KIFUNDA

⁸ Makuta a kufubisha nawo bikongeno, mpaa na angi makuta a kifunda, abeatushaa kwi ba Temwe ba Yehowa be mu kifunda. Abatuulaa tushete twa kwela makuta mu mbalo ayikitshikila kikongeno bwa’shi bino bya buntu bikwashe ku myanda ya kifunda. Kukatusha makuta aatukaa bwa kupudisha myanda ayituku mu kifunda, tukongye ntulombene kutusha bya buntu mu ingi nsaa.

⁹ Kepatshila nka’shi, kifunda kyooso kipudishe nkalo yakyo, na makuta aashala, abeele bwa mudimo wa mu nsenga ishima. Su takwi makuta ebungi mu konte a kifunda bwa kupudisha myanda ya kikongeno sunga a kubanga nao kikongeno akifiki, bu kileshesho, kufutshila mbalo ayikitshikila kikongeno; mukunkushi a kifunda mmulombeene kufundjila tukongye bwa kwibawukisha kineemo kya badi nakyo kya kutuusha bya buntu byabo. Kasaka ka bakulu akakyebe kutaluula uno mwanda na kutshiba bungi bwa makuta abadi balombeene kutuusha kwi kakongye bwa kukwasha kifunda. Bino bya buntu abebituusha ku bukwashi bwa kitshibilo akyata kakongye.

¹⁰ Nsaa ayituku mwanda autekye makuta autungu’shi kifunda kiwiukye, bakulu ba mu kifunda abebungu pamune pabadi ku kikongeno. Bitshibilo byooso bilekeene na byabadi bapwe kutshiba bwa kutusha makuta, abebyata pamune bwa’shi makuta ekale aatuku bwa wawa mwanda. Bino bitshibilo bya bungi bwa makuta atshibibwe abebufundu na kuteka su bakulu abakumiina bwa’shi aa makuta ekale aatuku nsaa yooso ayituku makuta a kifunda.

¹¹ Abataa mpángo ya kutaluula konte a kifunda misango yooso.

KUKWASHA BALANDA

¹² Imune ya ku mpángo ya kashete ka makuta abaabadi abalama kwi Yesu na balondji baaye ibaadi ya kukwasha balanda. (Mak. 14:3-5; Yo. 13:29) Buno bushito bwa beena Kidishitu bubaadi butungunukye, mwanda Yesu bambile’shi: “Nwi na balanda mafuku oso.” (Mak. 14:7, Kilombeno kipya 2009) Lelo uno ba Temwe ba Yehowa bakwete kutwala buno bushito mu mushindo kinyi?

¹³ Dingi, beena kakongye be na lulamato mbalombeene kwikala na lukalo lwa bukwashi bwa bintu kampanda mwanda wa bununu, kulemana, sunga ingi nkalakashi yabashii na mushindo wa kupudisha. Beena nshibo, beena kifuko, na bangi abapusha’shi kwi lwalwa lukalo mbalombeene kukimba mushindo wa kutusha bukwashi. Bino mbipushene na bibakwile Yowano mutumibwa’shi: “Su muntu kampanda eekala na bintu bya pano pa nsenga, aye mumone mukwabo mu dikyenga, anka akutwa kumupusha lusa, mbii-kunyi bilombeene kifulo ky’Efile Mukulu kwikala munda mwaye? Bana bande, tanwikalanga na kifulo kya penda mu miisambo na mu bishima, anka kiileshe mu bikitshiino na mu binyibinyi.” (1 Yo. 3:17, 18; 2 Tes. 3:6-12) Kulangwila kwa binyibinyi nkutale kukwasha bantu baasha lulamato be na lukalo lwa bintu bya ku mbidi.​—Shak. 1:27; 2:14-17.

¹⁴ Mpoolo pabaadi mufundjile Timote bamulungwile mushindo wa kutuusha bya buntu bya ku mbidi kwi baaba be nabyo lukalo. We mulombeene kubadika elango dyaaye mu 1 Timote 5:3-21. Mwina Kidishitu ooso e na bushito bwa kumpala bwa kukwasha nkalo ya ba mu nshibo yaaye. Bantu banunu sunga be na bilema mbalombeene kupeta bukwashi kwi baana baabo, bekulu baabo, sunga kwi bangi beena kifuko nabo. Ingi nsaa, mbulambatadi sunga bingi bisaka abyateyaa mpángo ya kukwasha baaba bantu na bintu bya ku mbidi, paapa beena kifuko nabo mbalombeene kwibakwasha bwa kuusha mukanda wa kuteka buno bukwashi. Nkulombeene kutuuka lukalo alutekye’shi kakongye katuushe bukwashi kwi bangi bakwetu balume na bakashi bafube na lulamato munda mwa bipwa bibungi. Su baaba bantu ta be na bifuko bilombeene kwibakwasha na su takwi bukwashi bwa mbulamatadi sunga bwa bisaka kampanda, kasaka ka bakulu nkalombeene kwata mpángo ya kumona bya kukwasha bano bakwetu. Beena Kidishitu abamonaa kwiabishena bintu byabo na bangi be mu lukalo bu kineemo kikata kyabadi nakyo.

¹⁵ Bakwetu balume na bakashi bebungi mbalombeene kwikala na lukalo lwa bukwashi mwanda wa kubingwabingwa, ngoshi, kutshinkatshinka kwa nsenga, mpeshi, nsala sunga ingi nkalakashi ikwete kutuuka mu ano mafuku e bukopo. (Mat. 24:7-9) Tukongye ntulombeene kukutwa mushindo wa kwikwashena, yaaya nsaa Kasaka ka Bakunkushi-Bakulu akatekye bakwetu ba mu angi maumbo bwa kutuusha bukwashi. Bino bi mumune na mushindo ubaadi beena Kidishitu ba mu Asii Mupeela batumine bakwetu ba mu Yudeya bukwashi nsaa ibaabadi mu nsala. (1 Kod. 16:1-4; 2 Kod. 9:1-5) Mu kulonda kwa kileshesho kyabo, tukwete kushinkamisha kifulo kyetu kwi bakwetu na kulesha binyibinyi’shi twi balondji ba Yesu Kidishitu.​—Yo. 13:35.

KWABILA KWA MIKANDA

¹⁶ Ma Bible na mikanda ayipatuula Bible i na muulo ukata bwa kupalakasha mukandu wa Bufumu. Misango ibungi kasaka ka bakulu akasangulaa mufubi a midimo bwa’shi ekale alama na kutuusha mikanda. Bakwetu balume babadi bape uno mudimo abewateyaa na muulo ukata. Abatuusha rapore bwa’shi kwikale mikanda ilombane bwa kupudisha nkalo ya kakongye.

¹⁷ Bu byatudi beena Kidishitu belambule, atushinguula’shi, nsaa yetu, binangu na ngobesha yetu, na bintu byetu bya ku mbidi mpaa na muwa wetu mbya buntu byabadi betupe kwi Efile Mukulu na twi na kya kwibitumikisha ku mudimo waaye. (Luk. 17:10; 1 Kod. 4:7) P’atutumika kalolo na bintu byatudi nabyo, atulesha bukata bwa kifulo kyatudi nakyo bwa Yehowa. Twi na lukalo lwa kutumbisha Yehowa na bintu byetu bya muulo, mwanda atushinguula’shi asangelaa kya buntu kyooso kyatutusha bwa kulesha’shi twi bepaane kwadi na mashimba etu ooso. (Nki. 3:9; Mak. 14:3-9; Luk. 21:1-4; Kol. 3:23, 24) Yesu bambile’shi: “Nwibapete buntu, byaabya panaayi buntu.” (Mat. 10:8) P’atwipaana na bupeta bwetu ku mudimo wa Yehowa, kunyima kwa byooso atupete muloo.​—Bik. 20:35.