“Kitayi byooso bwa ntumbo y’Efile Mukulu”

ATWE bafubi b’Efile Mukulu belambule kwadi, twi na kitungo kya kulesha ntumbo yaye mu byooso byatwakula na byatukitshi. Mpoolo mutumibwa baadi mutushe dino eyi dya kulonda pabafundjile’shi: “Sunga nwadya, sunga nwatoma, sunga nwakita kinyi, kitayi byooso bwa ntumbo y’Efile Mukulu.” (1 Kod. 10:31) Bino abitekye’shi, tulamate ku miiya ilulame ya Yehowa, ayilesha bumuntu bwaye bupwidikye. (Kol. 3:10) Bu byatudi mwilo wa kishila, abitungu tulonde kileshesho ky’Efile Mukulu.​—Ef. 5:1, 2.

² Mpyeele mutumibwa baadi mukakye binangu bya beena Kidishitu ku uno mwanda pabaadi mufunde’shi: “Bu bana bakokyele, tanulondanga ndakalaka ya kala, ya mu kipungo kya kuluba kwenu, anka bii yawa mwinwitamine eeselele, anwe namu ekiteyi beeselele mu nshalelo eenu ooso; mwanda mbafunde’shi: ‘Ikalayi beeselele, mwanda ami neeselele.’” (1 Mp. 1:14-16) Abitungu’shi booso be mu kakongye ka beena Kidishitu balame bwiselele nka bu bibaadi Isaleele a kala. Bino abilesha’shi bekale kushii katoba, batookane, bashii balwishibwe na binangu bya uno ndumbulwilo. Byabya, mbalamuunwe bwa kukita mudimo wa kishila.​—Efi. 20:5.

³ Muntu alamaa bwiselele nsaa y’atumikila miiya na mayi a kulonda a Yehowa, ano apwe kufundjiibwa mu Bifundwe biselele. (2 Tim. 3:16) Ku bukwashi bwa kulonga kwa Bible, tubaadi balongye myanda itale Yehowa na mashinda aaye, na tubaadi bakakiibwe peepi naaye. Kulonga kwetu kubaadi kwitushinkamiishe muulo wa kubanda kukimba Bufumu bw’Efile Mukulu na kutuula kukita kwa akikyeb’eshimba dyaye pa mbalo ya kumpala mu muwa wetu. (Mat. 6:33; Lom. 12:2) Bino bibaadi abitutekye kufwala bumuntu bupya.​—Ef. 4:22-24.

KUTOOSHIBWA MU KIKUDI NA MU MWIKELO

⁴ Ta mbibofule bwa kulamata ku miiya ilulame ya Yehowa nya. Mwishikwanyi neetu, Satana Diabulu, kwete kukimba mushindo wa kwitupambusha mu bya binyibinyi. Myanda ibubi ya uno ndumbulwilo na milwisho ya mbidi yetu ikutwe kupwidika bikwete kwitufwishila nkalakashi. Kwikala na nshalelo mwipushene na kwilambula kwetu akutekye’shi tulwe ngoshi ya mu kikudi. Bifundwe abitutekye byatusha kukaanya ngofu nsaa y’atubingwabingwa sunga yatutompiibwa. Twi na kya kukyenga bwa kukimba bululame. (2 Tim. 3:12) Patudi mu bitompwanga abitungu twikale na muloo. Tushinguule’shi, bitompwanga abishinkamisha’shi tukwete kukita akikyebe Efile Mukulu.​—1 Mp. 3:14-16; 4:12, 14-16.

⁵ Sunga Yesu baadi mupwidikye, balongyele kukookyela ku makyenga abapetele. Nsaa su ngimune ta mulekyeele bitompwanga bya Satana na binangu bya uno ndumbulwilo bwa’shi bimukambile nya. (Mat. 4:1-11; Yo. 6:15) Takwi efuku su ndimune dibaadi mwele binangu bya kutupilwa mwiya wa Yehowa nya. Sunga byekala’shi bantu babaadi bamushikwe pamwanda wa lulamato lwaye, baadi nka mulamate ku miiya ilulame ya Yehowa. Mafuku apeela kumpala kwa lufu lwaye, Yesu baadi mulungule balondji baaye’shi, bantu abakebashikwa naamu. Kubanga mu aa mafuku, balondji ba Yesu abapetele bitompwanga, anka abaadi banyingye mashimba mwanda wa kuuka’shi Mwan’Efile Mukulu batshokwele nsenga.​—Yo. 15:19; 16:33; 17:16.

⁶ Bwa’shi tatwikalanga ba pa nsenga, abitungu tulamate ku miiya ilulame ya Yehowa, bu bibakitshine Nfumwetu. Kukaasha kupela kutwelakana mu myanda ya politike na ya mu nshaalelo ya uno ndumbulwilo, abitungu tukambile dingi binangu byaaye bibubi. Atwata na muulo dino elango di mu Shake 1:21: ‘Etoosheyi ku butete booso na ku myanda yooso ibubi, pokyelayi na kufukama eyi dyabadi bakune munda mwenu, adyo dilombeene kupaasha myuwa yenu.’ Ku bukwashi bwa kulonga na kutwela mu bisangilo, twi balombeene kumona ‘kukuna kwa eyi’ dya bya binyibinyi mu binangu byetu na mu mashimba etu. Na tatwi balombeene sunga nkwikala na lwabi lwa bintu abituusha uno ndumbulwilo nya. Mulondji Jaake bafundjile’shi: “Taanuwuku’shi kwikala mu bulongo [kipwano] na bya pa nsenga nkwikutwena n’Efile Mukulu su? Akyebe kwikala kuuku aa bya pano, byabya bashikwa Efile Mukulu.” (Shak. 4:4) Nyi bwakinyi, mu Bible mwi elango dikata dya’shi, tutungunukye na kulamata ku miiya ilulame ya Yehowa na kwikala kula na uno ndumbulwilo.

⁷ Eyi dy’Efile Mukulu aditudimusha pabitale kutwelakana mu myanda i buufu na kwikala na mwikelo wi butete. Aditulungula’shi: ‘Lusandji na myanda ibutete yooso yaaya, na ndakalaka, tabii na kya kwikala sunga kuteemunwa munkatshi mwenu; byaabya ngi bipwandjikiile bantu beselele.’ (Ef. 5:3, NWT) Byabya tatukumanga kutadiisha binangu byetu ku bintu bi bubi, bi buufu, sunga bi butete, na tatwi balombeene sunga kutadiila bino bintu bwa’shi bitwele kapeelakapeela mu miisambo yeetu nya. Su tubapele kwibitwesha mwatudi, atulesha kalolo’shi atukumiina kulamata ku miiya ya Yehowa ya mu mwikelo i selele na ilulame.

KWITOOSHA KU MBIDI

⁸ Kukaasha kwitoosha mu kikudi na mu mwikelo, beena Kidishitu abashinguula muulo wa kwikala batooshibwe ku mbidi. Mu Isalele a kala, Efile Mukulu a bwiselele, baadi mutekye bwa’shi mu kishalelo kyaabo mwikale mankenda. Atwe namu abitungu’shi twikale beselele bwa’shi Yehowa tamonanga “kintu ki butete” mwatudi.​—Miy. 23:14, NWT.

⁹ Mu Bible bwiselele na mankenda a mbidi abyendaa pamune. Bu kileshesho, Mpoolo bafundjile’shi: “Anwe bande ba kifulo kikata, twitoosheeyi’atwe banabene ku butete booso bwa mbidi na bwa kikudi; tukimbeeyi bya kwikita beeselele, tutshineyi Efile Mukulu.” (2 Kod. 7:1) Byabya, balume na bakashi beena Kidishitu, abitungu bakite mwabo mooso bwa kulama mbidi yaabo itookye pa kwitumpanga mema na kusuula bilamba. Sunga kwekala nshalelo mwilekeena mupunda maumbo, twi balombeene kupeta ka sabanga na meema bwa kulama mbidi yetu itookye na kukita bwa’shi baana betu tabekalanga na butshafu.

¹⁰ Mu ma mbalo atudi abetuuku kalolo pa mwanda wa mudimo wetu wa kutuusha bu kamonyi. Kubamba nshibo yetu, munda na paasha bupenka bwako akutuusha bukamonyi kwi bantu betwifunyishe. Kino nyi nkintu kimune akitungu’shi beena kifuko booso bepaane bwa kwikikita. Bakwetu balume abitungu batuule binangu byabo ku abimweneka nshibo na bintu biyifunyishe, bashinguule’shi lupango lushii butshafu na nshibo yabadi balame kalolo ayisangashaa bangi na kwibapa binangu bibuwa. Nfumu a kifuko ashinguula’shi kukita byabya na kukunkusha kwa myanda ya mu kikudi, akulesha kalolo’shi kwete kuludika ba mu nshibo yaaye kalolo. (1 Tim. 3:4, 12) Bakwetu bakashi namu be na bushito bwa kutala midimo ya mu nshibo, bikishekishe ino ya munda mwayo. (Tt. 2:4, 5) Bana balongyeshibwe kalolo abepanaa mu kukwasha ku mudimo wa kusuula mu tudimbo twabo. Byabya kifuko akitumika pamune bwa kulama byubishi bya kwikosola anka bu byabikekala mu ndumbulwilo mupya ku bukunkushi bwa Bufumu bw’Efile Mukulu.

¹¹ Lelo uno bangi bafubi ba Yehowa abendaa ku bisangilo na myotoka. Na mu angi ma mbalo, mootoka aukwasha ngofu bwa kwenda mu bulungudi. Abitungu’shi wikale ushi na butshafu na ulumbuulwe kalolo. Mashibo eetu na myotoka yetu abitungu bileshe’shi, twi munkatshi mwa bantu ba Yehowa batooshibwe na beselele. Uno mwanda ngutale mpaa na bibuta byetu bya mu bulungudi na ma Bible eetu.

¹² Nfwadilo eetu na ntshibilo a nyene abitungu bipushene na miiya y’Efile Mukulu. Tatwi balombeene kwenda mu kwimonena na muntu mukata, bafwale bilamba bishii buwa na bi butshafu nya. Twi na kya kwitatshisha ngofu pabitale mushindo awumweneka nfwadilo eetu nsaa y’atukyebe kulesha mpala ya Yehowa mu bulungudi sunga patudi kumpala kwa bantu mu bisangilo. Nfwadilo eetu na mushindo wa kulumbuula mbidi yeetu ngulombeene kulumbuula sunga kulwisha mweneno a bangi pabitale lulangwilo lwa Yehowa. Ta mbilombane bwa’shi twikale na nfwadilo mukutwe kipopeelo na alesha kaneemo kwi bangi nya. (Mik. 6:8; 1 Kod. 10:31-33; 1 Tim. 2:9, 10) Byabya, nsaa y’atwilumbuula bwa kwenda mu bulungudi, ku bikongeno bya kifunda, sunga ku bikongeno bya mafuku asatu, abitungu tushinguule akyamba Bifundwe pabitale mankenda a ku mbidi na kipopeelo. Abitungu’shi twikale atutumbisha Yehowa misango yooso.

¹³ Bino bi mumune na nsaa y’atukyebe kwenda mu kutala biro byetu bikata bya nsenga ishima sunga biro bya filiale bya ba Temwe ba Yehowa. Tentekyesha’shi, eshina Betele adipatuula “nshibo y’Efile Mukulu.” Nyi bwakinyi, abitungu’shi nfwadilo eetu na mwikelo wetu bikale mumune na byatwikalaa nsaa y’atwende mu bisangilo ku Nshibo ya Bufumu.

¹⁴ Sunga nsaa y’atwasha maasha, abitungu tutale bi nfwadilo eetu na ntshibilo eetu a nyene. Abitungu twiyipushe’shi: ‘Mushindo wandji mufwale wi bya kunkwatshisha buufu su nakyebe kutuusha bukamonyi apamweneka mushindo su?’

MUSHINDO WIBUWA WA KUKISHA KAPAPI NA KWASHA MAASHA

¹⁵ Kwikisha na kukisha kapapi nyi mbintu abikwasha bwa kwikala na mbidi bukome. Ungi musango Yesu baadi mwitamine balondji baaye bwabadya kwenda naaye pa mbalo ya bupenka bwa ‘kwikisha kapeela.’ (Mak. 6:31) Su atwikisha na kukisha kapapi mu kipaso kibuwa, atupete muloo. Mbilombeene kwitukwasha bwa kupeta bukome bwa kutungunuka na mudimo wetu w’efuku dyooso.

¹⁶ Lelo uno, bu byakudi mishindo ibungi ya kukisha kapapi, beena Kidishitu abitungu bekale abasangula mishindo ya kukisha kapapi na kutumika na binangu by’Efile Mukulu mu byooso byabakitshi. Sunga kukisha kapapi kwekala na yaako mbalo, ta nkintu kikata kya mu nshalelo nya. Mbetudimushe’shi “mu mafuku a nfudiilo,” bantu abekala “bafule milòo ya mbidi, bashii bakumiine Efile Mukulu.” (2 Tim. 3:1, 4) Maasha ebungi abetamina bu kukisha kwa kapapi taebuwa bwa baaba abakumiina kulamata ku miiya ilulame ya Yehowa nya.

¹⁷ Beena Kidishitu ba kumpala abaadi na kya kukambila binangu bya bantu bebubi abaadi bebefunyishe. Pa mbalo ya kwashilanga maasha a beena Looma yabetaminaa bu cirque, bantu abaadi abakumiina kukisha kapapi pa kubandila bantu babakyengyesha. Buntomboshi, kupongoola kwa mase, na lusandji abaadi abebyata bu bintu bya kwasha nabyo kwi beena eumbo, anka beena Kidishitu ba kumpala abaadi bashikwe bintu bi byabya. Lelo uno, mishindo ya kukisha kapapi ya uno ndumbulwilo i na bintu bi mumune na ikwete kulwisha bantu be na mashimba abofule. Abitungu ‘tutale kalolo’ mushindo watukwete kutambuka, na kupela mishindo yooso ya kukisha kapapi i bubi. (Ef. 5:15, 16; Mis. 11:5) Na, sunga maasha akutwa kwikala bubi, bantu abeasha na mbalo yabeashila mbilombeene kwikala bubi.​—1 Mp. 4:1-4.

¹⁸ Kwi mishindo ibuwa ya kwasha maasha na ya kukisha kapapi ilombeene kusangasha beena Kidishitu. Bebungi mbapete bukwashi ku malango a mu Bifundwe na binangu bilombane abituukila mu mikanda yetu.

¹⁹ Ingi misango, mbalombeene kwitamina bifuko pa mbalo kampanda bwa kukisha nsaa munkatshi mwa beena Kidishitu nabo. Bakwetu balume na bakashi mbalombeene kwitaminyibwa ku feete a dibaka sunga ku ungi musangeelo wi byabya. (Yo. 2:2) Baaba abakukila bantu pa yaaya mbalo abitungu bashinguule’shi abo ndjo be na bushito ku byooso abikidika panka. Eyendo, abitungu kwikala bapasukye nsaa yakudi kisaka kya bantu kiibungye pamune. Muloo awumwekaa mu wawa musangeelo ngufikishe bangi mpaa na mu kukita myanda ikutweene na mwikelo ulombeene beena Kidishitu kwikala nao. Abo nkubanga kwipaana mu kudya na kutoma kukishekishe na mu kukita ingi myanda ibubi. Pa mwanda abauku bino, beena Kidishitu bapasukye mbamone’shi, bibuwa kutshintshikila bungi bwa bantu balombeene kufika ku musangeelo wi byabya. Su abitungu kupa bantu maalwa, abeatuusha na nkatshinkatshi. (Fid. 4:5) Su byooso bibakitshika bwa’shi yaaya nsaa yabakisha ikale ibuwa na ayinyingisha bantu mu kikudi, byakudya na kutoma t’abikala pa mbalo ya kumpala nya.

²⁰ Kukuukila bantu nyi mwanda wibuwa. (1 Mp. 4:9) Nsaa ayitungu kwitamina bangi beena Kidishitu ku mashibo eetu bwa kudya, kutoma, kukisha kapapi na kukisha nsaa ibuwa pamune na bangi, twi na kya kutentekyesha bano babashabakambaa kwelela binangu. (Luk. 14:12-14) Su abetwitamina ku musangeelo wi byabya, mwikelo wetu abitungu wipushene n’elango di mu Maako 12:31. Abikalaa buwa kusangeela kalolo ka bangi.

²¹ Beena Kidishitu bakwete kusangeela bya buntu bibungi by’Efile Mukulu na abashinguula’shi mbalombeene ‘kudya na kutoma, na kusangeela mufubo [waabo] ooso.’ (Mul. 3:12, 13, NWT) Nsaa ‘yatukitshi byooso bwa ntumbo y’Efile Mukulu,’ abakuukila bantu na baaba baabakukila be kutentekyesha wawa musangeelo, mwanda bekeele na muloo wa kunyingishibwa mu kikudi.

MIDIMO YA KU KALASA

²² Baana ba ba Temwe ba Yehowa abapetaa bukwashi bwa malongyesha a mu kalasa. P’abende mu kalasa, be na lukalo lwa kuuka kubadika na kufunda kalolo. Angi malongyesha a balongo ku kalasa ngalombeene kwikala na muulo kwi bansongwa be na mpángo ya mu kikudi. Mu mafuku abadi ku kalasa, abakitshi mwabo mooso bwa ‘kutentekyesha Mupangi aabo Mukata,’ nsaa y’abatuulu myanda ya mu kikudi pa mbalo ya kumpala.​—Mul. 12:1.

²³ Su we nsongwa mwina Kidishitu kwete kwenda mu kalasa, ikala na budimu pa kupela kutwelakana na bansongwa bashii na mwikeelo wibuwa. (2 Tim. 3:1, 2) Kwi bibungi byodya kukita bwa kukambila binangu bibubi bya uno ndumbulwilo, mwanda Yehowa mmutuushe byooso byatudi nabyo lukalo bwa kwitulama. (Mis. 23:4; 91:1, 2) Byabya, bwa kwikalwila, peta bukwashi abutuukila ku ino mpángo ya Yehowa.​—Mis. 23:5.

²⁴ Bwa kwikala kula na uno ndumbulwilo nsaa yabadi ku kalasa, bansongwa bebungi ba Temwe abakumiinaa kupela kutwelakana mu myanda yabakitaa ku kalasa kunyima kwa nsaa ya kalasa. Mbilombeene kwikala bukopo bwa’shi balongi nabo na balongyeshi baabo bakumiine uno mwanda. Anka, kii na muulo nkusangasha Efile Mukulu. Bino abilesha’shi okyebe kutumika na kondo koobe k’eshimba kalongyeshibwe na Bible na kwata kitshibilo kya kupela kutwelakana mu maasha a kwipikeena sunga mu myanda ya kifulo ky’eumbo. (Nga. 5:19, 26) Nsaa y’anuteemesha malango a mu Bifundwe abenupa kwi baledi abatshinyi Efile Mukulu na kusangeela kwikala na bakuuku bebuwa mu kakongye, anwe bansongwa nwi balombeene kulamata ku miiya ilulame ya Yehowa.

MUDIMO WA KU MBIDI NA KIPWANO NA BANGI

²⁵ Muyiile abilesha Bifundwe, ba nfumu ba bifuko be na kitungo kya kulombasha nkalo ya ba mu nshibo mwabo. (1 Tim. 5:8) Sunga mbyabya, byabadi bafubi beena Kidishitu, abashinguula’shi mufubo wabo wa maasa wi pa mbalo ya kabidi pabitale kukimba kwa myanda ya Bufumu. (Mat. 6:33; Lom. 11:13) Nsaa y’abalamata kwi Efile Mukulu na kusangala na bidibwa na bya kufwala byabadi nabyo, abasuuku nkalakashi ayituukila ku kateo ka lwabi lwa kukimba bintu bya ku mbidi mu nshalelo aabo.​—1 Tim. 6:6-10.

²⁶ Beena Kidishitu booso belambule kwi Efile Mukulu bakwete kukita midimo ya maasa, abitungu bekale na mweneno a Bifundwe pabitale uno mwanda. Kupeta bintu bya ku mbidi na kululama kooso akupatuula kupela kutwelakana mu myanda ayitupilwa miiya y’Efile Mukulu sunga miiya y’eumbo. (Lom. 13:1, 2; 1 Kod. 6:9, 10) Atushinguula masaku aatukila kwi bakuuku bebubi. Bu byatudi basalayi ba Kidishitu, atupele kutwelakana mu busunga abutupilwa miiya y’Efile Mukulu, kutwelakana mu myanda ya pano, sunga kulwisha kipwano kyetu na Yehowa. (Yesh. 2:4; 2 Tim. 2:4) Na tatwi mu kipwano na “Babilone Mukata” mwishikwanyi a Efile Mukulu nya.”​—Kibaf. 18:2, 4; 2 Kod. 6:14-17.

²⁷ Bu byatudi balamate ku miiya ilulalme y’Efile Mukulu tatwi balombeene kwata kwibunga kwetu mu bisangilo na beena Kidishitu netu bu mushindo wa kuyiisha busunga bwetu sunga bwa bangi kumpala nya. Kyatwibungilaa mu bisangilo bya bena Kidishitu, mu bikongeno bya kifunda, na bya mafuku asatu mpenda bwa kulangwila Yehowa. Tukwete kudishibwa ku ano mesa a mu kikudi na kusangeela “kwikwasheena ku muntu na muntu na kwinyingishena.” (Lom. 1:11, 12; Eb. 10:24, 25) Kyakya kipwano abitungu kikale nka kya myanda ya mu kikudi.

KUSHAALA MU BUUMUNE BU BENA KIDISHITU

²⁸ Miiya ilulame ya Yehowa ayitekye dingi’shi bantu baaye ‘balame buumune bwa mu kikudi abwibabungu pamune mu butaale.’ (Ef. 4:1-3) Pamutwe pa kukimba kwisangasha, ooso a kwabadi akimbi buwa bwa bangi. (1 Tes. 5:15) Kushii mpaka bino ndjo binangu byokwete kumona mu kakongye kenu. Sunga twekala n’ekoba kinyi, batuukile mwiumbo kinyi, be na nshalelo e naminyi, sunga balongye tulasa twi naminyi, booso bwetu tukwete kukunkushibwa na miiya imune ya kululama. Sunga bantu be paasha pa ndumbulwilo, bakwete kwimwena patooka dino eyikashi diikale bu kitundwilo kya bantu ba Yehowa.​—1 Mp. 2:12.

²⁹ Pabaadi ashimika kasele pabitale muulo wa kwikala mu buumune, Mpoolo mutumibwa bafundjile’shi: “Kwi mbidi imunenka na kikudi kimunenka, muyiile lwitanyino lubanupetele bwa kwikala na lukulupilo lumunenka; Mwanana ngumune, lukumiino lumune, lubatshisho lumune, Efile mukulu ngumune, aye Nshe booso, adi bufumu pa booso, afubu mu booso, mubombeele mu booso.” (Ef. 4:4-6) Bino abitekye kwikala mu buumune bwa kupusha ndambukisho na malongyesha akata a mu Bible na kushinguula matalwa a Yehowa. Eyendo, Yehowa mmupe bantu baaye ludimi lwi selele lwa bya binyibinyi, alwibakwasha bwabadya kumufubila na katshintshi ke mumune.​—Sef. 3:9.

³⁰ Buumune na butaale bwa kakongye ka beena Kidishitu bikwete kunyingisha booso abalangwila Yehowa. Twi bamone kulombana kwa mulayilo wa Yehowa wa’shi: “Neebatuulu pamune, buu mikooko i mu mbalo ya kudiila.” (Mik. 2:12, NWT) Abitungu tulame buumune mu kufukama nsaa y’atulamata ku miiya ilulame ya Yehowa.

³¹ Muloo ngwa baaba babadi bakumiine mu kakongye keselele ka Yehowa! Kwitaminyibwa mwishina dya Yehowa kwi na muulo ukile miloo yooso yatudi balombeene kwisumina. Su tubalama kipwano kyetu kibuwa na Yehowa, atwipaana na mashimba eetu ooso mu kulamata ku miiya ilulame ya Yehowa na kuteka bantu bwabadya kukita byabya.​—2 Kod. 3:18.