Tukalwileyi kufukama na bwiselele bwa kakongye

KU KIPWA kyooso bantu binunu bakwete kufika mu nshibo ya Yehowa ya lulangwilo lwiselele, na bino abilombasha butemuki bwa mu Bible. (Mik. 4:1, 2) Twi na muloo ukata wa kwibakuukila mu “kakongye k’Efile Mukulu!” (Bik. 20:28) Bakwete kusangeela mwabi wa kufubila Yehowa pamune netu na kusangeela mpaladiisu eetu a mu kikudi a kufukama na eselele. Kikudi kiselele ky’Efile Mukulu n’elango dibuwa dyatusangana Mwiyi dyaaye abitukwasha bwa kukalwila kufukama na bwiselele bwa kakongye.​—Mis. 119:105; Sek. 4:6.

² Atufwala “bumuntu bupya” nsaa y’atutumikila mayi a kulonda e mu Bible. (Kol. 3:10, NWT) Atukatusha mpaka ya bisumanga na kwikutwena su mweneno eetu mwilekeene na a bangi. Bu byatudi na mweneno a myanda e mumune na a Yehowa, tukwete kukambila binangu bya kwitshibuula bya uno ndumbulwilo na kutumika mu buumune bu bantu be mu kifuko kimune mu nsenga ishima.​—Bik. 10:34, 35.

³ Sunga mbyabya, bilumbu abituukaa ku nsaa na nsaa mbilombene kulwisha kufukama na buumune bwa kakongye. Nkinyi akibifwishaa? Misango ibungi, nkukutwa kwa kulonda malango a mu Bible. Tukii na kya kulwa ngoshi na binangu byetu bya bu bantu bakutwe kupwidika. Takwi muntu su ngumune mukutwe milwisho nya. (1 Yo. 1:10) Muntu kampanda mmulombene kulonda eshinda dibubi na kulwishisha beena kakongye mu bikitshino sunga mu kikudi. Twi balombeene kulwishisha muntu kampanda ku bishima byetu sunga mu bikitshino, sunga’shi twi kukokola pa mwanda wa byabekeele bakule sunga bakite kwi muntu kampanda. (Lom. 3:23) Su mwanda wi bino ubatuuku, twi kukita kinyi bwa kulumbuula myanda?

⁴ Yehowa mmwate mpángo ya kifulo bwa ino myanda yooso. Eyi dyaaye adituusha elango pabitale kya kukita su bilumbu bibatuuku. Bakulu mu kakongye, mbalami baasha kifulo balombeene kutuusha bukwashi. P’atulondo malango aabo aatuukila mu Bifundwe, atutwesha dingi kipwano kibuwa na bangi na kwikala mu kipwano kibuwa na Yehowa. Su abetunyoko sunga kwitusashila bwa mulwisho kampanda, tushinguule’shi dyadya dinyoka sunga kusashilwa abilesha kifulo ki neetu Nshetu e mwiyilu.​—Nki. 3:11, 12; Eb. 12:6.

KUPUDISHA TU BILUMBU TUPEELA

⁵ Kwi nsaa ilombeene kutuuka tu bilumbu sunga nkalakashi ipeela munkatshi mwa bantu be mu kakongye. Tuno tu bilumbu abitungu kwitupudisha bukidibukidi na binangu bya kifulo kya bwina muntu. (Ef. 4:26; Fid. 2:2-4; Kol. 3:12-14) Kushi mpaka, okyebe kumona’shi bilumbu bitale kipwano kyobe na mwina Kidishitu noobe mbilombene kupwa mu kulonda kw’elango dya Mpyeele mutumibwa dya’shi: “Ikalayi kumpala kwa byooso na kifulo kii kapu munkatshi mwenu, mwanda kifulo akishimankishaa milwisho ibungi.” (1 Mp. 4:8) Bible amba’shi: “Atwe booso atukitaa milwisho.” (Shak. 3:2, NWT) Patulondo Mwiya ukile buwa, kukitshina bangi byabya byatukumiina’shi betukitshine, twi balombeene kulekyela na kwilwankana tu bilubilo kushii lukalakashi.​—Mat. 6:14, 15; 7:12.

⁶ Su bomono’shi muntu kampanda mmutapikye kwishimba pamwanda wa byabya byokwile sunga byokitshiine, abitungu wate mpàngo ya kutwesha naye kufukama kushii kunyengakana. Tentekyesha’shi, wawa mwanda ngutale dingi kipwano kyoobe na Yehowa. Yesu bapeele balondji baye dino elango: “Byabya, polambula mulambu wobe ku kilambwilo, su kwakwa otentekyesha’shi mukwenu e na mwanda noobe, leka mulambu oobe kumpala kwa kilambwilo; banda kwenda opwane na mukwenu, kunyima ofikye na mulambu wobe.” (Mat. 5:23, 24) Pangi akwikalanga mpushisho e bubi. Su bi byabya, tokumanga kupa mukwenu miima. Miisambo ibuwa munkatshi mwa beena kakongye ayikwasha bwa kupudisha kukutwa kwa kwipushena na kupudisha bilumbu abituuku mwanda wa kukutwa kwa kupwidika kwa bantu.

KUTUUSHA ELANGO ADITUUKILA MU BIFUNDWE

⁷ Ingi nsaa, bakulu mbalombeene kumona’shi bibuwa kupa muntu malango kampanda bwa kulumbuula binangu byaaye. Bino t’abikalaa bibofule nya. Mpoolo mutumibwa baadi mufundjile beena Ngalateya’shi: “Bakwetu, su umune a munkatshi mwenu asanganyibwa mu kilubilo [kushi’ye kuuka], anwe abakunkushwa na kikudi kiselele, numuludikye na kupopêla.”​—Nga. 6:1, EEM.

⁸ Nsaa y’abalama mikooko, bakulu mbakumbene kukalwila kakongye ku masaku ebungi a mu kikudi mpaa na kukita bwa’shi bilumbu bikata tabitukaanga mwanka. Bakulu abakitaa mwabo mooso bwa’shi mudimo wabakitshina kakongye wipushene na bino bibaabadi balee kwi Yehowa ku bukwashi bwa Yeeshaya’shi: “Ooso a kwabadi eekale buu kifwamino mu nguba a kipunga, na buu kisuukilo ku kipapi kya mpeshi; abeekala buu myeela ya mema ii mu nsenga yume, buu mutaala wa lubwebwe lukata lwi mu kabaaka.”​—Yesh. 32:2.

KUBEKYELA BANTU BE NA NSHALELO MUPATAKANE

⁹ Mpoolo mutumibwa baadi mudimushe pabitale bangi bantu babaadi balombeene kutwesha binangu bi bubi mu kakongye. Mpoolo bambile’shi: “Atwinutumina eyi . . . dya kwilamuna kwi mukwetu ooso ee na nshalelo mupatakane mwipeleene na byubishi byanudi bapetele kwatudi.” Baadi mupatuule byabya bishima pabaadi mufunde’shi: “Su muntu taakokyela ku kino kyaatwamba mu uno mukanda, mubekyeleyi dingi tanwikalanga naye mu kipwano bwa’shi bimukwatshishe buufu. Anka tanumwatanga bu mwishikwanyi, mulangyeyi bu mukwenu.”​—2 Tes. 3:6, 14, 15, NWT.

¹⁰ Ingi nsaa, muntu shii mukite mulwisho wabadya kumutuushila mu kakongye e kwikala akitshi myanda ayilesha’shi takwete kukookyela miiya y’Efile Mukulu ilombeene kukunkusha bena Kidishitu. Mmulombeene kwikala na lulengu lukilekile, twipu tukile, sunga’shi e na butshafu. Mmukumbeene kwikala ‘atwelakana mu myanda yabeene.’ (2 Tes. 3:11, NWT) Sunga’shi, e kwikala adimbi bwa kudiila bangi bintu byabo sunga kutwelakana mu maasha aamweneka’shi e bubi. Uno mwikelo upatakane na kukutwa kuneemeka miiya ya mu Bible nkulombeene kwikala bubi ngofu mu mushindo wawudya kulwisha kakongye, na kupalakana kwi bangi beena Kidishitu.

¹¹ Bwa musango wa kumpala, bakulu abapa yawa muntu e na nshalelo mupatakane malango aatuukila mu Bible. Byabya, su yawa muntu atungunuka na kupela kuneemeka mayi a mu Bible sunga mbyabadi bamudimushe misango ibungi bwa wawa mwikelo, bakulu mbalombeene kwata kitshibilo kya kukita mwisambo wa kudimusha beena kakongye pabitale yawa nshalelo mupatakane mwikutwene na miiya ya bwina Kidishitu. Bakulu abakyebe kutumika na binangu bibuwa bwa kutala bukata bwa wawa mwanda na su ngulombeene kulwisha binangu bya bantu mu mushindo autungu nka’shi, bakite mwisambo bwa kakongye. Yawa akitshi mwisambo atuusha malango alombane pabitale mwikelo upatakane, anka t’ateemuna eshina dya yawa muntu mupatakane nya. Kadi, baaba abawuku mwanda wabakwila abakyebe kudimukila kushala na yawa muntu, anka abatungunuka na kwibunga naaye mu myanda ya mu kikudi, na ‘kumulanga bu mukwabo.’

¹² Atukulupila’shi, kitshibilo kishimate kya beena Kidishitu basha lulamato akikyebe kukwasha muntu mupatakane bwa’shi apushe buufu na kumutakula mu kwilanga kwishimba. Su bibamweneka patoka’shi, yawa muntu bashintuula mwikelo waaye wikutwene na miiya ya bwina Kidishitu, t’abitungu’shi batungunukye na kumwata bu muntu abadi babekyele nya.

KUPUDISHA BINGI BILUMBU BIKATA

¹³ Su tubakumiina kulekyela bilubilo na kufwila bantu lusa, byabya t’abilesha’shi atupele kutopeka bilubilo na atwibikumiina nya. Ta mbilubilo byooso byatudi balombene kwata bu abituukila mu kukutwa kwa kupwidika nya; na tabibuwa kubwikila meso ku milwisho ikata nya. (Lv. 19:17; Mis. 141:5) Mu miiya ya Moyiise, abaadi abalesha kwilekena pabitale bukata bwa milwisho, bi byabya dingi mpaa na kwi beena Kidishitu lelo uno.​—1 Yo. 5:16, 17.

¹⁴ Yesu baadi muleshe kalolo kipaso kya kupudisha bilumbu bikata bilombene kutuuka munkatshi mwa beena Kidishitu. Tala matabula abaadi muleshe aatungu kwela: ‘Su mukwenu bakulwishisha, [1] enda kwadi, okamuleeshe kilubilo kyaye pa buupenka bwenu. Su bakuteemesha, opaasha mukwenu. Su ta mmukuteemeshe, [2] ata muntu umune sunga babidi bwa’shi mwanda ooso upete kitshibilo n’eyi dya tumonyi tubidi sunga tusatu. Su baapele kwibateemesha, [3] lungula kipwilo bii mwanda; anka su baatunu kuteemesha mpaa na kipwilo, mutale buu mwina kingi kisamba na buu mufutshishi a bitadi.’​—Mat. 18:15-17.

¹⁵ P’atutala lukindji lubaadi lwele Yesu lwi mu Mateo 18:23-35, abimweneka’shi milwisho yabadi baleshe mu mukanda wa Mateo 18:15-17 ngitale myanda ya makuta sunga bintu. Kileshesho, bu kukutwa kufuta kishiyo sunga kukita myanda ishii ya kululama. Dingi mulwisho ngulombeene kwikala wa kudimbiila muntu mwanda, bilombene kulwisha nkumo yaaye.

¹⁶ Su we na bishinkamiisho abilesha’shi mwina kakongye bakukitshina mulwisho wi byabya, tobandanga kwenda lubilo na kilumbu kwi bakulu bwa’shi bakutadile wawa mwanda nya. Anka bu bi elango dibatushile Yesu, banda kwisamba na muntu bakulwishisha. Tompa kupudisha mwanda bubidi bwenu kushii kukimba ungi muntu. Lamiina’shi Yesu tabaadi mwambe’shi ‘enda penda musango umune omuleshe kilubilo kyaye’ nya. Anka, su yawa muntu bapele kukumiina kilubilo kyaaye na ta mmutekye lusa, mbikumbeene kwikala buwa kwisamba naaye dingi kunyima. Su nwapudisha kilumbu mu uno mushindo, yawa kitshiine mulwisho asangala pa kupusha’shi twe mulungule bangi bantu kilubilo kyaaye sunga kulwisha nkumo yaaye ibuwa mu kakongye. Byabya “opaasha mukwenu.”

¹⁷ Su muntu ekalanga mulwishe bakumiina kilubilo kyaye na batekye lusa, baata kitshibilo kya kulumbuula kilubilo kyaaye, paapa takwi lukalo lwa kwenda na mwanda kula nya. Sunga wekala ukata, mulwisho wa uno mushindo abitungu beupwe kwi bantu bupenka bwabo.

¹⁸ Su twe na mushindo wa kupaasha mukwenu nsaa ywende mu kumulesha kilubilo kyaye “pa bupenka bwenu,” paapa “ata muntu umune sunga babidi” nwende mu kwisamba dingi na mukwenu. Baaba bwende nabo abitungu bekale na lukalo lwa’shi nwalushe kipwano na mukwenu. Mbilombeene kwikala buwa su mbaaba abekalanga panka nsaa ikitshikile mulwisho. Anka su takwi bantu abekalanga panka we mulombeene kwata mukwetu umune sunga babidi ba kupetekyelwa p’anwisamba naaye. Mbakumbeene kwikala bantu abawuku mushindo wa kupudisha bilumbu bi byabya na be na mushindo wa kulongamisha myanda sunga byekala’shi kwikeele kukitshikye mulwisho binyibinyi. Bakulu bosangula bwabadya kupetekyelwa nsaa yanwisamba t’abalesha mpala ya kakongye nya, mwanda kasaka ka bakulu ta nkebatume bwa kukita byabya.

¹⁹ Su kilumbu ta nkipwe kunyima kwa kukita moobe mooso bwa kwikipudisha​—kunyima kwa kwisamba naaye bubidi bwenu sunga kumpala kwa muntu umune sunga babidi​—na bomono’shi twe mukumbeene kutadiila bwa’shi bikile nka byabya, paapa we mulombeene kutwala mwanda kwi bakulu ba mu kakongye. Tentekyesha’shi, lukalo lwabo ndwa kulama butaale na bwiselele bwa kakongye. Obe baapu kulungula bakulu, bibuwa weutadiile mu maasa mwabo na otuule lukulupilo mwi Yehowa. Tokumanga kutadiila mwikelo wa muntu ukukokoshe sunga nkukutshishwa muloo wa kufubila Yehowa nya.​—Mis. 119:165.

²⁰ Balami ba mikooko abakyebe kutaluula kilumbu. Su bibamweneka’shi, yawa muntu ekalanga mukukitshine bubi bukata ta mmwilangye na ta mmukumiine kulumbuula bubi bwaye mu kipaso kilombane, mbilombeene kwikala buwa bwa’shi kasaka ka bakulu katuushe yawa muntu mu kakongye. Su abaakitshi byabya abakyebe kukalwila loombe na bwiselele bwa kakongye.​—Mat. 18:17.

KUPUDISHA MYANDA ITALE MILWISHO IKATA

²¹ Ingi milwisho ikata bu, lusandji, lukyebanokyebano, kwiatena kwa mulume na mulume, mukashi na mukashi, kasaabu, kusumbula kwa lukumiino, kulangwila ma nkishi, na ingi milwisho i byabya, tayitekye penda lusa lwa yawa abadi beyikitshine nya. (1 Kod. 6:9, 10; Nga. 5:19-21) Bu byabidi’shi kakongye nkalwishibwe mu binangu mpaa na mu bwiselele bwako, milwisho i byabya abitungu kwiyilungula bakulu bwa’shi beyitaluule. (1 Kod. 5:6; Shak. 5:14, 15) Bangi bantu mbalombeene kufika kwi bakulu bwa kusokola milwisho yaabo sunga bwa kwibalungula pabitale milwisho ya bangi. (Lv. 5:1; Shak. 5:16) Sunga bakulu bebalungula naminyi pabitale mulwisho wa Temwe mupwe kubatshishibwa, abitungu’shi bakulu babidi babande kukimbuula bishinkamiisho byao kalolo. Su abataluula wawa mwanda na abashinkamisha’shi mulwisho ukata ngukitshikye binyibinyi, kasaka ka bakulu akakyebe kukita komite a kusambisha e na bakulu kubanga pa basatu bwa kupudisha wawa mwanda.

²² Bakulu abalesha’shi bakwete kwitatshisha bwa buwa bwa mikooko nsaa yabeyikalwila ku kintu kyooso kilombeene kwiyifwishila masaku a mu kikudi. Abaata dingi kitshibilo kya kutumika n’Eyi dy’Efile Mukulu kalolo bwa kusaashila muntu bakitshi kilubilo na kumukwasha bwa’shi apetuule bukome bwa mu kikudi. (Yu. 21-23) Bino abipushena n’elango dibaadi Mpoolo mupe Timote, adyamba’shi “Nakusendeela kumpala kw’Efile Mukulu na kwa Kidishitu Yesu, aye akafiki mu kuyimusha abatala na bafwe, . . . Alusha bantu mwishinda, saashila, langa, misusa yooso na lwishinko na [kalolo ka] kulambukisha.” (2 Tim. 4:1, 2) Kukita byabya nkulombeene kwata nsaa ibungi, kadi kwi munkatshi mwa mifubo ibukopo ikwete kukita bakulu. Kakongye akakyebe kusangeela kwitatshisha kwabo na kwibaata bu “balombeene kineemo misusa ibidi.”​—1 Tim. 5:17.

²³ Nsaa yabasangana’shi muntu mmupiile mu kilubilo, lukalo lwa kumpala lwi nalo bakulu ndwa kumukwasha bwa’shi apetuule bukome bwaye bwa mu kikudi. Su muntu balesha kwilanga na abamono’shi mbalombeene kumukwasha, kitshibilo kya kumusashila mu bufwame sunga kumpala kwa batumonyi booso abashinkamishanga bi mwanda nsaa ya bamusambishanga, akikyebe kumukwasha bwa’shi elangye na kukwasha abamono bwa’shi bekale na moo. (2 Sam. 12:13; 1 Tim. 5:20) Nsaa yooso yabasashila muntu, abamutunyisha bwa kukita ingi myanda kampanda. Kukita byabya akukyebe kukwasha muntu sha kilubilo bwa’shi kumongo aludikye ngwa yaye mu “mashinda alulame.” (Eb. 12:13, EEM) Mu kwenda kwa mafuku, abakatusha mikalo yabadi bamwelele ku kapeelakapeela su abamono mushindo ukwete kulongama kipwano kyaye na Yehowa.

KUWUKISHA KWA MUNTU BASAASHILWA

²⁴ Su komite basambisha kilumbu bamono’shi muntu sha kilubilo balesha kwilanga kadi mwanda waye mbalombeene kwiuka mu kakongye, kwi bangi bantu sunga’shi abitungu kudimusha kakongye pabitale yawa muntu balesha kwilanga, abakyebe kwiukisha mu kisangilo kya Bwina Kidishitu na mudimo wetu. Kuwukisha’shi: “[Teemuna eshina dya muntu] abamusaashila.”

PAKUDI KITSHIBILO KYA KUTUUSHA MUNTU MU KAKONGYE

²⁵ Ingi nsaa, muntu sha kilubilo mmulombene kukutwa kwilanga na kuleka kilubilo kyaaye sunga byekala’shi abamukwasha kwi bakulu. Mpaa na nsaa yabakwete kumusambisha, muntu e kukutwa kulesha “bwikashi bulombene kuno kwaluluka.” (Bik. 26:20) Mbalombene kwata kitshibilo kinyi? Yaaya nsaa, bibuwa kutusha yawa muntu mu kakongye bwa’shi tekalanga mu kipwano na mwilo wiselele wa Yehowa. Nsaa yabakalwila kakongye ku masaku alombeene kufwisha yawa muntu, kakongye akashala katoshibwe na kulama nkumo ibuwa. (Miy. 21:20, 21; 22:23, 24) Pabaadi muwukye eyikashi dya buufu dya ungi muntu a mu kakongye ka mu Kodinda, Mpoolo mutumibwa balungwile bakulu bwa ‘kutuula muntu ebubi bwi byabya mu mâsa mwa Satana . . . , bwa’shi kikudi [kya kakongye] kipashibwe.’ (1 Kod. 5:5, 11-13, EEM) Mpoolo baadi dingi mwakule pabitale kutushibwa kwa bantu abaadi batombokyele bya binyibinyi mu bipwa lukama bya kumpala.​—1 Tim. 1:20.

²⁶ Nsaa yabasangana’shi abitungu kutuusha muntu mukite mulwisho shii mwilangye kwishimba, komite a kusambisha aukisha yawa muntu kyakya kitshibilo. Na kumulungula bwakinyi abaata kitshibilo kya kumutuusha muyiile abyamba Bifundwe. Abo abaapu kumulungula, komite a kusambisha awukisha muntu’shi, su amono’shi mwanda waaye ta mbeusambishe kalolo na su akumiina’shi beusambishe dingi, mmulombeene kufunda mukanda, na kulesha patooka bwakinyi ta mmukumiine kitshibilo kibatshiibwa. Kubanga mwifuku adikalanga komite mumulungule kitshibilo kya kutushiibwa, mmupebwe lubingo lumune bwadya kwiwufunda. Su batekye’shi bataluule dingi wawa mwanda, kasaka ka bakulu akawukisha mukunkushi a kifunda, yawa namu asangula bangi bakulu balombeene kusambisha dingi mwanda. Su abapete mukanda wa mukunkushi a kifunda, bano bakulu abakyebe kukita mwabo mooso bwa kusambisha kilumbu mu lwalwa lubingo. Su muntu bafundu mukanda, tababanda kwiukisha kakongye kitshibilo kya kumutuusha nya. Anka mu yaya nsaa, abakyebe kumutosha bwadya kwaluula, kwela luteko mu bisangilo sunga kwikala na mashito mu kakongye.

²⁷ Kutadila bwa’shi muntu sha kilumbu afunde mukanda nyi nkumulesha kalolo, na byabya abikwasha bwa’shi asambe dingi mwanda waye. Anka, su sha kilumbu bapele kusamba, abawukisha kubingiibwa kwaye kumongo kwa’bo abakitshi mwabo mooso bwa kwimonena naye.

²⁸ Su sha kilumbu bapele kufunda mukanda, komite a kusambisha akyebe kumupushisha matabula aadi mukumbeene kwela bwa’shi bamwalushe mu nsaa ilombane su belanga kwishimba. Kukita byabya akukwasha na kwibuwa bu byatukulupila’shi su bashintuula mwikeelo waye akyebe kwaluka mu ndumbulwilo a Yehowa.​—2 Kod. 2:6, 7.

KUUKISHA KUTUSHIBWA KWA MUNTU MU KAKONGYE

²⁹ Su bakulu abamono’shi, muntu ta mwilangye kwishimba, na abitungu atushibwe mu kakongye, abawukisha bena kakongye’shi: “[Teemuna eshina dya muntu] ta kii dingi Temwe a Yehowa nya.” Bino abikyebe kudimusha bantu be mu kakongye bwa kuleka kwikala naye mu kipwano. (1 Kod. 5:11)

MUNTU BETUUKILA MU KAKONGYE

³⁰ Atwakula bwa “muntu betuukila mu kakongye” bwa kulesha muntu mwikale Temwe mupwe kubatshishibwa kadi bapele aye nabeene bwina Kidishitu bwaye pa kulesha’shi takii dingi na, takumiina’nyi kwikala bu umune a ku ba Temwe ba Yehowa nya. Sunga muntu bapele kwikala mu kakongye pa kubanga kukita myanda bu kutwelakana na ndumbulwilo i na myanda ikutweene na malongyesha a mu Bible na kupona mu kiimu kya Yehowa.​—Yesh. 2:4; Bif. 19:17-21.

³¹ Yowano mutumiibwa bakwile ano mayi bwa bantu abaadi basumbule lukumiino lwabo, afunda’shi: “Baba bantu t’ababádi ben’etú bînyibînyi, ooo, nyi pa wawa mwanda mbetulamunukye. Su abadya kwikala ben’etú bînyibînyi, abadya kwikala’nka netu.”​—1 Yo. 2:19, EEM.

³² Ku meso kwa Yehowa mwanda wa muntu bapele kwikala Temwe a Yehowa ngwilekene ngofu na mwina Kidishitu shikwete dingi kulungula mukandu wibuwa sunga mubofule. Muntu mmulombene kukutwa kulungula mukandu wibuwa pa mwanda wa kukutwa kyubishi kya kwilongyela Eyi dy’Efile Mukulu. Sunga’shi mmupete nkalakashi sunga bulwishi bubamufisha mu kushimisha katshintshi kaye mu mudimo wa Yehowa. Bakulu na bangi beena kakongye abitungu bayididiile na kukwasha uno mwina Kidishitu mubofule mu kikudi.​—Lom. 15:1; 1 Tes. 5:14; Eb. 12:12.

³³ Anka su mwina Kidishitu basangula bwa kupela kwikala Temwe a Yehowa, abakyebe kuwukisha kakongye’shi: “[Teemuna eshina dya muntu] ta kii dingi Temwe a Yehowa nya.” Abitungu kumona yawa muntu nka bu muntu mutuushiibwe mu kakongye.

KWALUKIILA MU KAKONGYE

³⁴ Mbalombeene kwalusha muntu mutuushiibwe sunga mwituukile mu kakongye, nsaa yalesha patooka’shi belanga kwishimba na su munda mwa mafuku kampanda balesha’shi balekye mashinda aye atwelakane. Alesha’shi akyebe kwalusha kipwano kyaye na Yehowa. Abitungu bakulu babande kumutala munda mwa kipindji kampanda​—munda mwa myeshi, kipwa, sunga mafuku ebungi, muyiile bi nshalelo bwa’shi aleshe’shi belanga kwishimba mu binyibinyi. Su kasaka ka bakulu kabapete mukanda wa muntu atekye’shi bamwalushe mu kakongye, komite a kwalusha muntu esamba naaye. Uno komite akyebe kutaluula su yawa muntu kwete kulesha binyibinyi “bwikashi bulombene kuno kwaluluka” na kwata kitshibilo kya kumwalusha sunga kya kupela kumwalusha.​—Bik. 26:20.

³⁵ Su muntu kwete kuteka’shi bamwalushe babaadi bamutushile mu kangi kakongye, bakulu ba mu kakongye kaadi binobino abakitshi komite a kwalusha muntu mu kakongye bwa’shi bataluule mwanda waye. Su bakulu be mu komite a kwalusha muntu abamono’shi mmulombene kwalushibwa mu kakongye, abafundjila kasaka ka bakulu ba mu kakongye mu baabadi batuushe yawa muntu. Abitungu komite yooso ibidi ifube mu buumune bwa kupeta bishinkamiisho byooso na kwata kitshibilo kimune. Anka, kitshibilo kya kumwalusha abekyata kwi komite a kwalusha muntu a mu kakongye kabaadi kamutuushe.

KWIWUKISHA KWA MUNTU BALUKIILA MU KAKONGYE

³⁶ Su komite a kwalusha muntu bashinkamisha’shi muntu mutuushiibwe sunga badi mwitukile belanga kwishimba binyibinyi, na’shi mukumbene kwalushibwa, abakyebe kuwukisha mu kakongye mubaadi kumpala. Su muntu taadi binobino mu kangi kakongye, abitungu bebawukishe na’bo namu. Abitungu kwakula penda’shi: “[Teemuna eshina dya muntu] balukiila dingi bu Temwe a Yehowa.”

MILWISHO YABAKITSHI KWI BALUNGUDI BAKINGA BAPWE KUBATSHISHIBWA

³⁷ Abitungu kuwukisha bakulu pabitale milwisho ya bana bekale balungudi bapwe kubatshishibwa. Nsaa ayisambisha bakulu bilumbu bitale bana, abitungu baledi baabo bapwe kubatshishibwa bekale panka. Abitungu’shi bekwateene na komite a kusambisha, kushii kukimba bwa kukalwila mwana sha kilubilo bwa’shi tapetanga manyooka alombeene mulwisho waye. Anka bu abikitshikaa nsaa ayikitshi muntu mukulu mulwisho, komite a kusambisha akyebe kusashila na kukwasha muntu mukite mulwisho. Anka, su mwana bakutwa kwilanga, mbalombeene kumutuusha mu kakongye.

SU BALUNGUDI BASHII BABATSHISHIBWE ABAKITSHI MULWISHO

³⁸ Kya kukita nkinyi su balungudi bashi babande kubatshishibwa abakitshi milwisho? Mwanda’shi, ta mba Temwe babatshishibwe, ta mbalombeene kutushibwa mu kakongye ooo. Anka, bi kwikala’shi ta mbapushe miiya ya mu Bible kalolo, na kwibapa malango na kalolo kooso akukyebe kwibakwasha bwa kutambukila mu “mashinda alulame.”​—Eb. 12:13, EEM.

³⁹ Su mulungudi shi mubande kubatshishibwa talesha kwilanga kunyima kwa bakulu kwimonena naye na kumukwasha, paapa bibuwa kuwukisha kakongye. Abakyebe kulungula kakongye’shi: “[Teemuna eshina dya muntu] ta kii dingi bu mulungudi shi mubande kubatshishibwa.” Kakongye akakyebe kumona uno muntu bu muntu a pano pa nsenga. Sunga byekala’shi ta mbamutuushe mu kakongye, beena Kidishitu badimukye bwa kwikala naye mu kipwano. (1 Kod. 15:33) Tabaatanga rapore yaye ya mudimo wa bulungudi nya.

⁴⁰ P’akukidi mafuku, mulungudi shi mubande kubatshishibwa abaabadi bakatushe mu mulongo wa balungudi mmulombeene kupeta lukalo lwa kwikala dingi bu mulungudi. Yaaya nsaa, bakulu babidi bebungye naye bwa kushinguula mushindo wakwete kwenda na kutama mu kikudi. Su balombasha myanda itekiibwe, mbalombeene kuwukisha’shi: “[Teemuna eshina dya muntu] abamwalusha dingi bu mulungudi shi mubande kubatshishibwa.”

YEHOWA ELELA LULANGWILO LWETU LUFUKAME NA LWISELELE MWABI

⁴¹ Booso bakwete kwibunga na kakongye k’Efile Mukulu lelo uno mbalombeene kusangeela myabi ya mu kikudi ikwete Yehowa kwelela mwilo waye. Twi na bidibwa bya mu kikudi bikile bungi, na mema ebungi a bya binyibinyi bikwete kwitubatamisha mashimba. Yehowa kwete kwitupasukila na kwitulama ku bukwashi bwa ndumbulwilo aaye abakwete kukunkusha kwi Kidishitu. (Mis. 23; Yesh. 32:1, 2) Kwikala mu mpaladisu a mu kikudi mu kino kipungo kya nkalakashi ya ku mafuku a nfudiilo nkwitupe kufukama.

⁴² Patulama butaale na bwiselele bwa kakongye, atukyebe kuyididiila na kulesha etaata dya bya binyibinyi bya Bufumu. (Mat. 5:16; Shak. 3:18) Na bukwashi bw’Efile Mukulu, atukyebe kupeta muloo wa kumona bantu bebungi abafiki mu kuuka Yehowa na kufuba netu pamune bwa kukita akikyeb’eshimba dyaye.