KIPINDJI 5

Alukiila kwi “Mulami a mikooko na a myuuwa yeenu”

Ku nkalakasho ibatwisambila mu uno broshire, omono namu shi kwi lumune sunga ibungi ikukwate su? Su mbyabya, we munkatshi mwa bantu be buwa. Bafubi be bungi basha bulamate b’Efile Mukulu—ba kala na ba ano mafuku etu—mbapete ino nkalakasho i mumune. Anka bu bibaabadi bapete bukwashi kwi Yehowa bwa kwiyikambila, n’oobe namu we bya kwibupeta.

Yehowa ekala kwanka boobe bu bibokumiina kwalukiila kwadi

SHINKAMISHA shi Yehowa ekala kwanka boobe bu bibokumiina kwalukiila kwadi. Akyebe nkukwasha bwa kumona bya kukila na twinyongoshi, bwa kupanda ku malonda oodi mutapikye kwishimba, na kupeta butaale bwa mu binangu na mwishimba abutuukila mu kwikala na kondo k’eshimba katookye. Paapa, we mulombeene kupusha bu muntu abatakula bwa kufubila Yehowa dingi pamune na balangwidi noobe. Nshalelo oobe akyebe kwikala nka bu a bangi beena Kidishitu ba kumpala, babaabadi bafundjile kwi mutumibwa Mpyeele shi: “Nubaadi bapambukye bu mikooko, anka binobino nubataadiila kwi mulami a mikooko na a myuuwa yeenu.”—1 Mpyeele 2:25.

Kwalukiila kwi Yehowa nyi kintu kimune kii na muulo kyoodi mulombeene kukita. Bwakinyi? Okyebe kusankisha eshimba dya Yehowa. (Myeele 27:11) Nka bu byouku, Yehowa e na ngikashi, na myanda yatukitshi ngilombeene kumusankisha. Byabya, Yehowa t’etukitshisha pa bukopo bwashi tumufule sunga shi tumufubile nya. (Miiya Ikituulwe 30:19, 20) Ungi muntu apatuulaa myanda i mu bible bambile shi: “Takwi mushindo wa kushitwila paasha pa kiibi ky’eshimba dya muntu nya. Abitungu kwikifungwila munda.” P’atulangwila Yehowa n’eshimba diwule na muloo, twi balombeene kushitula kyakya kiibi. Nsaa y’atukitshi byabya, atumupa kyabuntu kya muulo ukata—kululama kwetu—na atusangasha eshimba dyaye ngofu. Binyibinyi, takwi kintu kyatudi balombeene kupwandjikisha na mwabi watupete p’atupa Yehowa lulangwilo lumukumbeene.—Bikitshino 20:35; Bifumbulwe 4:11.

Ungi mukwetu mukashi shi baadi afubu dingi abakwete kukuukila ngofu bu bibalukiila dingi mu kakongye

Na dingi, nsaa y’obanguula myanda ya mu kikudi, bulanda boobe bwa mu kikudi abukalombashiibwa. (Mateo 5:3) Mu mushindo kinyi? Bantu be pa nsenga bakwete kwiyipusha shi, ‘bwakinyi twi pano?’ Be na lukalo lutaka lwa kupeta myaluulo ku nkonko itale kepatshila ka muwa. Bantu be na lwalwa lukalo mwanda Yehowa mwibapangye nalo. Mmwitupangye bwashi tupete muloo wa kumufubila. Tatwi balombeene kupeta ungi muloo ukile uno wa kuuka shi tukwete kumulangwila na kifulo kyooso.—Misambo 63:1-5.

Shinkamisha shi Yehowa akumiina walukiile kwadi. Mushindo kinyi oodi mulombeene kwibishinkamisha? Banda kutala: Uno broshire mmulumbuulwe kalolo, ku bukwashi bwa nteko i bungi. Mbakakye binangu byobe ku myanda i mwanka pangi kwi mukulu mwina Kidishitu sunga ungi mwina kukumiina. Ndjo obe nkumubadika na nkutambula mukandu wi mwanka. Bino byooso abishinkamisha shi Yehowa ta mukwilwankane nya. Mu kwilekeena na byabya, kwete nkwitanyina kwadi na kalolo kooso.—Yowano 6:44.

Twi balombeene kunyingishiibwa dingi nsaa y’atuuku shi Yehowa t’ayilwankanaa bafubi baye nya. Byabya ndjo bibaadi bishinkamishishe ungi mukwetu mukashi abetanyinaa bu Donna. Bambile shi: “Nabangile kupambuka mu bya binyibinyi ku kapeela kapeela, kadi ami nkubanga kunangusheena mu mayi e mu Misambo 139:23, 24, aamba shi: ‘Efile Mukulu, ntaluule, oshinguule bii eshimba dyande; ntompe, owukye bii nkalakasho yandi nayo. Otale su naalondo eshinda dii masaku, onkunkushe mwishinda dyaa-ikalaika.’ Naadi nauku shi ntshi a pano—na mu binyibinyi ntshi mulombeene kwambula beena pano—naadi nauku shi mu ndumbulwilo a Yehowa nyi mbalo inaadi mulombeene kwikala. Nabangile kumona shi Yehowa ta mmusumbushene mususa su ngumune; naadi penda na lukalo lwa kwalukiila kwadi. Ne na muloo ngofu bu byandji mwalukiile!”

“Nabangile kumona shi Yehowa ta mmusumbushene mususa su ngumune; naadi penda na lukalo lwa kwalukiila kwadi”

Tukwete kwela nteko bwashi noobe namu opetuule dingi “muloo wa Yehowa.” (Neemi 8:10) Nsaa ywalukiila kwi Yehowa t’okedidi efuku su ndimune nya.

Myaluulo ku nkonko itale kwalukiila kwi Yehowa

ABITUNGU MBANGILE PE KUNYI?

Muntu ekalanga na maladi mmulombeene kubanga kwibushuula kapeelakapeela. Mu mushindo umune, we mulombeene kupetuula bukome boobe bwa bwina Kidishitu p’oobe kutompa kudya ndambo ya bidibwa bya mu kikudi efuku dyooso. Tokumanga kumona shi abitungu okite myanda yooso nka musango umune. Pangi we mulombeene kwata kipindji kipeela bwa kubadika sunga kupusha mayi akobole a mu Bible, kulonga kwa umune wa ku mikanda yeetu, kukimbuula myanda ku Internet mu site a jw.org, sunga kutala video umune a ku aa e mwanka. Su kwi mushindo, tompa dingi kutwela mu bisangilo bya kakongye. Mu myanda yooso, teka Yehowa bukwashi. ‘Nwamutudilanga twinyongoshi twenu tooso, mwanda’ye kwete kwinulama.’—1 Mpyeele 5:7, Kilombeeno kipya 2014.

“Kunyima kwa’mi kubofula mu kikudi, naadi mubangye kupusha buufu mpa na bwa kuteka. Nsaa inaadi mwinyingishe bwa kuteka, mukulu umune a mu kakongye bafikile mu kuntembela. Baadi munkwashe bwandja kuuka shi Yehowa ta munyilwankane nya. Yawa mukulu nkundanga bwa kubadika Bible efuku dyooso. Panaadi mukite byabya, naadi mupete bukome bwa kubanga kwenda dingi mu bisangilo. Kunyima, ami nkubanguula kwenda mu bulungudi. Ne na muloo ukile wa kuuka shi Yehowa ta munyilwankane.”—Eeva.

“MUSHINDO KINYI WABAKANTABULA MU KAKONGYE?

Atukushinkamiisha shi beena kakongye abakukuukila na muloo ukile. Pamutwe pa nkwipula, sunga nkusambisha, abakyebe nkuleesha byabadi bakufule na nkunyingisha ngofu.—Beena-Ebreeyi 10:24, 25.

“Bibaadi abinkwata buufu bwa kwenda ku Nshibo ya Bufumu. Naadi n’eyipusha byabakyebe nkamona kwi ba loole bande. Umune a ku bakwetu bakashi baadi na bipwa 30 mwamwa mu kakongye bandungwile shi: ‘Kwalukiila kwi buwa, Mwan’ande!’ Bino bishima bibaadi binkume kwishimba ngofu. Naadi mwalukye binyibinyi kwetu ku nshibo.—Javier.

Naadi mwende ku Nshibo ya Bufumu na ami nkashaala ku mulongo wa nfudiilo bwashi tala bammona kwi bantu. Kadi, bantu be bungi nkubanga kuntundula bu bibabadi abammono mafuku anaadi natwele mu bisangilo panaadi nkii mukinga. Abo nkukuukila na kunkwata biipa na muloo ooso, abyo nkuumpa butaale bwa mwishimba. Bibaadi nka bu’mi balukiila kwetu.”—Marco.

BAKULU ABANKWASHA NAMINYI?

Bakulu abakakukwasha na kalolo kooso. Abakyebe nkutumbula pa mwanda wa lukalo loobe lwa kushisakanya “kifulo kyoobe kya kwibedi.” (Bifumbulwe 2:4) Abakyebe nkukwasha na kololo kooso bwa kulumbuula ka kilubilo kooso koodi mukite, abebikitshi “n’eshimba dia kupopeela.” (Beena-Galate 6:1, Kilombeeno kipya 2014; Myeele 28:13) Bakulu abaata mpàngo yashi kwikale muntu umune alongo noobe Bible, pangi mukanda wa We kuikala na muloo bua loso! sunga wa “Efubwile pepi na Yehowa.” Shinkamisha shi bakulu abakunyingisha na nkukwasha mwitabula dyooso dywele.—Yeeshaya 32:1, 2.

“Munda mwa bipwa mwanda mwanshi’naadi nende mu bulungudi, bakulu abaadi nka abafiki mu nkamona. Dingi efuku, ungi mukulu nkundeesha ma foto abaadi mwatshishe netu. Ayo nkuntentekyesha ngofu muloo unaadi nao nsaa inaadi nkwete kufubila Yehowa. Bakulu nkukwasha na kifulo kyooso bwa kubanguula biubishi byande ya mu kikudi.”— Victor.

‘Akakunyingisha’

Mu mukanda wetu wa ngono wa Tuyimbileyi Yehowa, mwi ngono ilombeene nkunyingisha na nkukankamika bu bibobanguula midimo yoobe ya mu kikudi. Bu kileshesho, banda kutala mayi e mu loono lwa 60. Ndwatshibwe mu mayi e mu 1 Mpyeele 5:10, lwi na mutwe wa mwanda awamba shi ‘Akakunyingisha.’

Weuku bwakiny’Efile mmukutuushe

Mmufito na nkutwesha mwitaata?

Mpa bakumwene okwete kumukimba

Bwa kumufubila mbululame.

Bomulayile kumusankisha;

Mmukukwashe n’akakunyingisha.
Efile batushile Mwan’aye b’obe;

Nyi bwakiny’akyebe shi onyingye.

Bu byadi mutuushe Mwan’aay’a kifulo,

Akupa bukome bulombane.

Te bya kuluba kifulo kyobe.

Akakwasha bantu baaye booso.

(KUPUNGUULA)

Bakukuudile na mase a Nfumu Yesu.

Nyi pa mwanda kinyi akakunyingisha.

Akakukunkusha n’aye akakulama.

Akupa bukome na kukunyingisha.

Bwa kupusha luno loono na ingi ya Bufumu ikobolwe, skane uno kode sunga kutwela mu jw.org.