LUKONKO 5

Ne kukita kinyi su abangolomona ku kalaasa?

BWAKINYI BI NA MUULO?

Mwanda, byoso byodi mulombeene kukita bi kulumbuula sunga kunyinsha kulwisha myanda.

BOODYA KUKITA KINYI?

Banda kupwandjisha uno mwanda: Thomas leelo takumiina kwenda ku kalaasa nya. Sunga malooba. Na bwa looso. Bibangile takudi myeshi isatu kasha bamupalakeesha nkumo ibubi kwi beena kalaasa naye. Akupu, abaamudika tushina. Ingi nsaa, umune a kwabadi e kuponesha tuyee twaye na kukita bu’ye shi mwibikite pa bukopo, pangi ungi e kumutoboola kumongo, su Thomas bealuula, tamulungula bamutoboola nya. Efuku dibashala, koolomona kubakilakila mwanda abamutumina na mesaje a ku mukanyina mu telefone . . .

Su noobe baadya kwikala Thomas, boodya kukita kinyi?

BANDA KUNANGUSHEENA!

Twe mukutwe bukome nya! Byabya, we kwibakabila kushi kulwa ngoshi ya kwela makofi. Mu kipaso kinyi?

TOKITANGA KINTU SU NKIMUNE. Bible akula’shi: Muntu “mupatakane aleeshaa byadi na nsungu, anka sha-binangu eyilamaa, eeyibatshika.” (Nkindji 29:11) Su bwetatshisha bwa kushaala muumiine—baaba abakoolomo be kuleka.
TWALUSHANGA BUBI KU BUBI. Bible akula’shi: “Tanwalwishanga muntu bubi pa bubi.” (Beena-Looma 12:17) Kukimba kwalusha bubi ku bubi akunyisha’nka kulwisha myanda.
UUKA BILUMBU. Bible akula’shi: “Muntu mudimukye epengyelaa bubi.” (Nkindji 22:3) Kita moobe mooso bwa kusuuka bantu be na bilumbu na kusuuka myanda i kwibatakula bwa nkoolomona.
TOMPA KWIBAALUULA MU UNGI MUSHINDO. Bible akula’shi: “Lwaluulo lwa kalolo alubatshikaa nsungu.” (Nkindji 15:1) We mulombeene na kwela nabo miseku. Bu kileshesho, su bakoolomona’shi bokidi bukata, we kusela mapampa na kwibalungula’shi: “Namono’shi abitungu bande kupeela!”
KATUKA YAYA MBALO. Ungi mwana abetamina bu Nora e na bipwa 19 akula’shi: “Kushaala mumiine akuleesha’shi we muntu munyingye e na bukome butabukile yawa akoolomona. Akuleesha’shi we na kwikanda— eyikashi dishii nadyo yawa akoolomona.—2 imote 2:24.
NYING’ESHIMBA. Su bakumona kwi baaba abakoolomona’shi we na ntshimba, abanyinsha nkukalakasha. Kadi su bakumona’shi we n’eshimba dinyingye, tabakumono ku bisumanga nya.
LUNGULA UNGI MUNTU. Ungi mulongyeshi baadi alungula balongi baaye’shi: “Su abakoolomona t’oumiinanga, wakule. Su bwakula, bi kwibatakula bwa kupela nkoolomona.”

Nsongwalume aleesh’eshimba dinyingye kwa bamoolomona — Kwikala n’eshimba dingye kwi nkupa bukome bushii nabo baaba aboolomona bangi

**NKONKO ITALE KOOLOMOSHENA**
MBYA BIINYI SU MMADIMI	MYALUULO
1 Koolomoshena takubekeele kwanka kubanga kala.	1 Mbya biinyi. Bu kileshesho, Bible esambila ba Nefilime—babaadi n’eshina dya bu: “Bantu abamwesha bangi mpombo.”—Kibangilo 6:4.
2 Koolomoshena mpenda miseku ya bisumanga. Ta kwi na mwanda ukambe nya.	2 Mmadimi. Koolomoshena akutakula bansongwa bebungi mpa na mu kwipudika.
3 Kipaso kibuwa kya kukambila baaba abakoolomona nkya kwibalwisha.	3 Mmadimi. Baaba aboolomosheena abekalaa na mushiitshi, kukimba kwibalwisha ta kwi na muulo nya.
4 Su bomono kwaboolomona ungi, twemutwelanga.	4 Mmadimi. Mu uno mwanda, twakulanga’shi ta ngukutale nya. Su bomono kwaboolomona ungi bopele kwakula, we kukwatshisheena wawa mwanda pamutwe wa kwiupwa.
5 Sunga beemona bu bilobo, baaba aboolomoneshena abatshiinaa.	5 Mbya biinyi. Sunga byekala’shi bantu aboolomoshenaa abemonaa bu bilobo, bebungi abekalaa na katshima’munda na kukimba koolomoshena bwa kupusha bibuwa.
6 Baaba abakoolomona be kushintuluka.	6 Mbya biinyi. Su bapeta bukwashi be kushintuluka na kuleka koolomoshena.