LUKONKO 7
Ne kukita kinyi pabantakula mu kutambuka lusandji?
BOODYA KUKITA KINYI?
Banda kupwandjikisha uno mwanda: Heather mbemonesheene na Mike takudi myeshi ibidi, kadi Heather amono’nka bu abeukeena kubanga kala. Abetumishena ma mesaje kapindji kooso, na kukisha nsaa ibungi mu kwisamba ku telefone nka na pabapwila myanda yabo yooso! Binobino Mike takumiina’shi bemeene’nka mu miisambo nya.
Mu myeshi ibidi ibakidi, Mike na Heather ntabakite ungi mwanda kukatusha penda kwiyimushena na kwififyena ku matama. Heather takumiina’shi bakita ungi mwanda nya. Kadi takumiina kushimisha Mike mu meeso. Takwi muntu amusangasha, amupushaa buwa bu Mike nya. Kukatusha byabya, Heather eakwila mwishimba’shi: ‘Twibefuleene naaye . . .’
Su boodya kwikala mupwe kulombana bwa kutwela ku bulunda, na kwikala mu uno mwanda wa Heather, boodya kukita kinyi?
BANDA KUNANGUSHEENA!
Kusangisha mbidi nyi nkya buntu ky’Efile Mukulu nka penda bwa beyibakishene. Kutambuka lusandji kumpala nyi nkulwisha kyakya kya buntu. Bi nka bu kwata kilamba kya muulo kibabakupa na kwikifubisha bu kinyaafwa
Su bopele kukookyela miiya ya mu nshalelo bu kukamina mwiyilu bwa kwitumba muushi mwibula, we kutshokoka sunga kufwa. Nyi byabidi su bopele kukookyela mwiya wa kwikala na mwikeelo wibuwa bu uno awakula’shi: Nwikale “belame ku lusandji.”—1 Beena-Tesalonika 4:3, EEM.
Mmasaku kinyi e nkufikila pa kupela kukookyela wawa mwiya? Bible akula’shi: “Yaawa atambuka lusandji alwisha mbidi yaaye’ye nabeene.” (1 Beena-Kodinda 6:18) Mu mushindo kinyi?
Bantu abakimbulaa mbasangane’shi bansongwa bebungi batambukye lusandji kumpala kwa kutwela mu dibaka, abakalakashwa na umune sunga ibungi ya ku ino myanda ayilondo.
KWIKALAKASHA MU BINANGU. Bansongwa bebungi batambukye lusandji kumpala kwa kutwela mu dibaka mbenyongole bikata kunyima kwa kwibikita.
KUKUTWA KWIKULUPISHENA. Kunyima kwa kusangisha mbidi, ooso a kwabadi eyipusha’shi: ‘Kwi ungi muntu atabapwile kutambuka naye su?
KUTSHOBOLOKA. Basongwakashi bebungi abakimbaa muntu e kwibakalwila kushi akimbi penda buwa bwaye nsaa ya tambuka naabo. Na bansogwalume bebubi tabakuminaa kwibakila dingi nsongwakashi abadi batambuka naaye lusandji nya.
Mwanda wi na muulo: Su bosangisha mbidi kumpala kwa kwikala mu dibaka, bolwisha kineemo kya mbidi yoobe obe nabeene, mu kushimisha kintu kiina muulo ukata. (Beena-Looma 1:24) Mbidi yoobe i na muulo ukata oshi mulombeene kubepuula!
Leesha’shi we na bukome bwa ‘kupela lukyebanokyebano.’ (1 Beena-Tesalonika 4:3) Kunyima su bokatwele mwiyibakishi, okasangisha mbidi na mwina dibaka noobe. Akupu, okeekala na muloo ukata kushii kwialashena sunga kwinyongola, kushi bu muntu atambuka lusandji n’eshimba kwiyilu kumpala kwa kutwela mu dibaka.—Nkindji 7:22, 23; 1 Beena-Kodinda 7:3.
OPWANDJIKISHA NAMINYI?
Omono’shi muntu mukufule e kukita kintu akituulu mbidi na binangu byobe mu masaku?
Omono’shi muntu akimbaa buwa boobe e kukimba kulwisha kipwano kyobe n’Efile Mukulu su?—Beena-Ebelu 13:4.