Kutompibua ku Muengie wa Karmele

Bufumu bua bisamba ekumi bua beena Isalele bubaadi na ba nfumu b’ebubi, anka, Akabe baadi mukilekile bubi. Baadi muibakile mukashi mubi baadi alanguila Baale. Diaye mbu Yezabele. Akabe na Yezabele abaushiishe eumbo na lulanguilo lua Baale abo nkuipayisha batemuki ba Yehowa. Yehowa bakitshiine naminyi? Baadi mutume mutemuki Eliya na mukandu kui Akabe.

Eliya balunguile Nfumu Akabe’shi, pa muanda wa bubi buaye, takubaadi na kia kunoka mpeshi mu Isalele nya. Munda mua bipua bikile ku bisatu, takubaadi mitshi ayikulu, bantu nkukienga na nsala. Kunyima Yehowa batumine Eliya bua kualukiila kui Akabe. Nfumu nkumulungula’shi: ‘Nnobe mutuadile Isalele malua! Bino bioso abikitshika nkilema kiobe.’ Eliya nkumualuula’shi: ‘Ta naami mufuishe uno munanga nya. Nui beufuishe pa kulanguila Baale. Abitungu tuitompene bua kuuka. Bunga muilo oso na batemuki ba Baale ku Muengie wa Karmele.’

Muilo ubeebungile ku muengie. Eliya bambile’shi: ‘Sangulayi kianudia kukita. Su Yehowa nyi Efile Mukulu a binyibinyi, mulondeyi. Su nyi Baale, mulondeyi. Atukitshi uno muanda, abitungu batemuki ba Baale 450 balumbuule mulambu, akupu betamine efile aabo, ami namu nalumbuula mulambu n’etamine Yehowa. Yawa atuusha lualuulo na kaalo, nyi Efile Mukulu a binyibinyi.’ Muilo nkukumiina.

Batemuki ba Baale nkulumbuula mulambu. Abo nkuitamina efile aabo’shi: ‘Oo Baale etualuule!’ Pabaadi Baale mukutue kualuula, Eliya babangile kuibasesamisha. Bambile’shi: ‘Muitamineyi n’eyi dibukopo pangi enualuula. Pangi e mu tulo, abitungu muntu a kumubuusha.’ Batemuki ba Baale abaadi bayididiile na kuitamina mpa na kukiolua. Anka tabaadi muibaluule nya.

Eliya nkutuula waye mulambu ku kilambuilo, abo nkuiupongoluela mema. Akupu aye nkuteka’shi: ‘Oo Yehowa, bakuukie shi noobe Efile Mukulu a binyibinyi.’ Yehowa batumine musango umune kaalo muiyilu kabashikile mulambu. Bantu nkusama’shi: ‘Yehowa nyi Efile Mukulu a binyibinyi!’ Eliya nkuakula shi: ‘Tanupashanga mutemuki su ngumune a Baale!’ Abo nkuipaa batemuki 450 ba Baale mu diadia efuku.

Pabamuekiele kakumbi kapeela ka mpeshi dia ku muela, Eliya balunguile Akabe shi: ‘Kui kipapi kikata kia mpeshi. Ata etempu diobe walukile ku nshibo.’ Eyilu nkufiita na makumbi, kipapi nkupuka, mpeshi e bungi nkupongoloka. Nfudiilo a bioso munanga ubapuile. Akabe nkuata etempu diaye nkuenda lubilo luaye looso. Ku bukuashi bua Yehowa, Eliya basuukile lubilo kukila lua etempu! Kadi mianda ya Eliya, ibaadi ifudiile nka paapa su? Tubande kutala.