Kiluilo kia Yehowa akitembe kaalo

Ben-Hadade, nfumu a mu Siri baadi mutungunukie na kuluisha bena Isalele ngoshi. Anka mutemuki Elisha baadi adimusha nfumu a Isalele musango oso, nyi buakinyi bapandile. Ben-Hadade nkuata kitshibilo kia kukuata Elisha. Pabaukile’shi Elisha e mu lupata lua Dotane, baadi mutume kiluilo kia bena Siri kuakua buabadia nkamukuata.

Bena Siri nkufika bufuku ku Dotane. Butookie ku namashika, mufubi a Elisha baatukile paasha aye nkumona’shi lupata lubaadi luifunyishue na kiluilo kikata kia ngoshi. Bapushiishe moo ukile aye nkusama’shi: ‘Elisha, atukitshi kinyi?’ Elisha nkumulungula’shi: ‘Bee neetu mbakile bee nabo bungi.’ Mu yaaya nsaa, Yehowa nkufungula mufubi a Elisha meso, aye nkumona’shi mu miengie ifunyishe lupata mubaadi muwule na nfualasa na matempu a ngoshi ee na kaalo.

Pabatompele kiluilo kia bena Siri kukuata Elisha, batekiele’shi: ‘Yehowa, ela bu mpofu kui kino kisamba.’ Sunga biekala’shi abaadi abamono, basalayi tababaadi bia kutundula kubaabadi nya. Elisha nkulungula basalayi’shi: ‘Nui mu lungi lupata. Ndondeeyi nkenuleeshe kui muntu aanukimbi.’ Abo nkulonda Elisha muishinda dia ku Samariya kubaadi nfumu a bena Isalele mushaale.

Kunyima kua kipindi, bena Siri abatunduile kuabaadi. Nfumu a mu Isalele nkuipusha Elisha’shi: ‘Ne mulombene kuibayipaa?’ Elisha bamuene bu nsaa yaadia kufudiisha uno muilo ubaadi aukimbi kumuipaa su? Nya. Elisha bakuile’shi: ‘Tuebayipanga. Ebape kia-kudia webalekie bende.’ Nfumu nkuibakitshiina madio akata akupu nkuibaleka’shi balukie kuabo.