Katshintshi ka Yehoyada

Yezabele baadi na nsoguakashi e n’eshina bu Ataliya, baadi na muikeelo wi bubi nka bu wa nyinaye Yezabele. Ataliya baadi muibakilue kui nfumu a mu Yunda. Mulume aye pabafuile, muan’aye babangile kukunkusha. Nsaa ibafuile muan’aye, Ataliya baadi muituule aye nabene bu nfumu a Yunda. Kunyima, bakimbile bia kushimisha mulongo ooso wa bufumu p’aye kuipaa muntu ooso badia kuikala bu nfumu pa mbalo yaaye, mpa na bekulu baaye. Bantu boso ababangile kumutshiina.

Yehoyada baadi tshiite muakuidi mukata, baadi auku na mukashi aaye Yehosheba shi Ataliya baadi akitshi bibubi. Abatudile na muwa wabo mu masaku bua kufuamisha muana tooka baadi umune a ku bekulu ba Ataliya abetamina bu Yoase. Abo nkumukusha mu ntempelo.

Pabaadi Yoase mulombashe bipua musambo, Yehoyada babungile bakunkushi ba muilo na bena Levi boso ebalungula’shi: ‘Lamaayi ku biibi bia ntempelo, tanutadilanga muntu su ngumune bua kutuela.’ Akupu, Yehoyada bekeeshe Yoase bu nfumu a Yunda, aye nkumufuadika kifulu kia bufumu ku mutue waye. Muilo wa Yunda ubakupiile nkasa wakula shi: ‘Nfumu abikale!’

Pabapushile nfumu mukashi Ataliya tuleo tua kibumbu ku ntempelo, bayile kuanka bukidi. Pabamuene nfumu mupia, bambile’shi: ‘Babandiila lukuku! Babandiila lukuku!’ Bakunkushi ba muilo abakuatshile nfumu mukashi, bamutusha paasha, abo nkumuipaa. Kadi Yehoyada bakitshiine kinyi pabitale muikeelo wibubi wa Ataliya ubaadi nao kui muilo?

Yehoyada bakuashile muilo bua kukita kilombeeno na Yehowa, abo nkumulaa bua kumulanguila nka penda Aye bupenka. Yehoyada nkuibalungula bua kubumbula ntempelo a Baale na kufinga ma nkishi abaadi muanka. Aye nkutuula ba tshiite muakuidi na bena Levi buabadia kufuba ku tempelo bua’shi bantu babangie dingi kulanguila muanka. Baatudile bantu ba kulama ntempelo bua kupela muntu su ngumune e butete emutuela. Akupu Yehoyada na bakunkushi ba muilo abaatshile Yoase bamutuula mu nkuasa a bufumu. Bantu ba mu Yunda nkushaala mu muloo. Binobino abaadi bia kulanguila Yehowa mu bulungantu kushi nfumu mubi Ataliya sunga lulanguilo lua Baale. Bomono bibaadi katshintshi ka Yehoyada kakuashe bantu bebungi su?