Bufumu abuyisha ikalayika

Dingi efuku bufuku, Nfumu Nabukondonosore baadi muloote kilotua kiashapusha kalolo. Bibadi bimukalakashe bikile bibakutshilue mpa na tulo. Bayitanyiine ba sha malenganyi baye aye nkuibalungula’shi: ‘Mpatuluileyi kilotua kiande.’ Abambile’shi: ‘Etulungule kilootua kiobe nfumu.’ Anka Nabukondonosore bambile shi: ‘Nya! Anue akulayi nka binalooto, bisumanga ne nuipaa.’ Abo nkumulungula dimo’shi: ‘Etulungule bibolooto, atukupatuluila bianka.’ Bambile’shi: ‘Booso buenu anukiebe kuntee kateo. Ndunguleyi’nka binalooto! Abaadi balungule nfumu’shi: ‘Takui muntu pa nsenga a kukita biabia nya. Biotekie bibukopo.’

Nabukondonosore baadi mufiite munda bikata, aye nkutuma eyi buabadia kuipaa booso basha binangu ba mu kibundi. Mpaa na Ndanyele, Shadrake, Meshake na Abede-Nego. Ndanyele baadi mutekie nfumu bua kumutengiela kapindi. Akupu, Ndanyele na ba kuuku baye abatekiele kui Yehowa buadia kuibakuasha. Yehowa bakitshiine naminyi?

Yehowa baadi muleeshe Ndanyele mu kimonua bibaadi kilotua kia Nabukondonosore na ki’akipatuula. Butokie, Ndanyele bayile kui mufubi a nfumu amulungula’shi: ‘Toyipaanga su ngumune a ku ba-sha binangu. Ne kupatuula kilotua kia nfumu.’ Mufubi batuadile Ndanyele kui Nabukondonosore. Ndanyele nkulungula nfumu’shi: ‘Efile Mukulu nyi asokola akikitshika mu mafuku aafiki boo’be. Kilootua kiobe nkino: We mumone nkishi mukata e na mutue wa ôlo, kiadi na maboko mbia kiamo kiebakaanyi, efu na mikoolo bia munyinga usangue, mikoolo ya kiamo, ngua kipindi kia kiamo, kipindi kia ema. Ebue dibafikile ku muengie diakupila nkishi ku ngua. Akupu nkishi bafingikile aye nkufika bu lufuufi lubaabadi bapapule kui lupapi. Ebue dibafikile muengie ukata, dibaushiishe nsenga ishima.’

Ndanyele baakuile dingi’shi: ‘Kilootua kiobe akipatuula bino: Bufumu bobe nyi buikale mutue wa ôlo. Kiamo ki’ebàkanyi, mbufumu abukulondela. Akupu, akuikala bufumu bui bu munyinga usangue abumunu nsenga ishima. Bufumu abulondo abuikala bukome bu kiamo. Ku nfudiilo akukeekala bufumu buiabuule, bui na bingi bipindi bibukopo bu kiamo, bingi bipindi namu mbibofule bu ema. Ebue dibafikile muengie nyi Mbufumu bu’Efile Mukulu. Abukafingi na kutuuta ano mafumu ooso, na abushaala bua loso.’

Nabukondonosore beyelele mpala paashi kumpala kua Ndanyele. Bambile’shi: ‘Efile Mukulu oobe nyi bakuleesha kino kilootua. Takui ungi Efile Mukulu bu’ye nya.’ Pamutue wa kuipaa Ndanyele, Nabukondonosore bamutudile ku mutue kua bantu boso ba-sha binangu na bu mukata a eumbo dioso dia Babilone. Bomono bibaadi Yehowa mualuule luteko lua Ndanyele su?