Diabulu atompo Yesu

Kunyima kua Yesu kubatshishibua, kikudi kiselele kibamutumine mu kabaaka. Tabaadi mudie kantu su nkamune munda mua mafuku 40, baadi na nsala ikile. Akupu Diabulu nkufika mu kutompa Yesu, amulungula’shi: ‘Su we muan’Efile Mukulu lungula ano mabue aalulukie mikate.’ Anka Yesu nkumualula bino: ‘Mbafunde’shi: T’abitungu muntu ekale na muwa anka penda bua mukate nya, kadi bu’eyi dioso adituku mukanua mua Yehowa.’

Diabulu nkuelesha dingi Yesu mpaka p’aye kuakula’shi: ‘Su we muan’Efile Mukulu, etumbe ku musaka wa ntempelo opone paashi. Muanda bifundue abiakula’shi: Efile Mukulu akakutumina ba muikeyilu eyi bua nkutuala.’ Yesu nkutumikisha dingi bifundue amba’shi: ‘Mbifundue dingi’shi: Tue mulombene kutompa Yehowa Efile Mukulu oobe.’

Akupu, Satana nkulesha Yesu mafumu oso a pa nsenga na mapeta na ntumbo yao akula’shi: ‘Nakupa ano oso mafumu na ntumbo yaao su bondanguila sunga musuusa umune.’ Anka Yesu bamualuluile’shi: ‘Katuka, Satana! Muanda mbifundibue’shi: ‘Nka penda Yehowa Efile Mukulu oobe nyi odia kulanguila.’

Kunyima Diabulu nkukatuka, na ba mikeyilu nkufika abo nkupa Yesu kidibua. Kubanga nka paapa, Yesu babangile kulambukisha mukandu wibuwa wa Bufumu. Nyi mudimo ubaabadi bamutume bua kukita pa nsenga. Bantu abaadi bafule mianda ibaadi ebalongiesha, abo nkumulonda koso kubaadi ende.