Yesu alungula mukandu wa Bufumu

Mafuku apela n’aye kubatshishibua, Yesu babangile kulungula bantu’shi: ‘Bufumu bu’Efile tabudi pepi.’ Balongi babamulondele pabaadi ende ku Ngalileya na ku Yudeya. Nsaa ibaadi Yesu mualukiile kuabo ku Nazarete, bayile mu kitumbuilo, aye nkufungula mufungofungo wa Yeshaya, eubadika n’eyi dibukopo’shi: ‘Yehowa mumpe kikudi kiaye kiselele antuma bua kuwukisha mukandu wibuwa.’ Biabia bibaadi abipatuula kinyi? Bibaadi abipatuula bino: Sunga bi’ekala shi bantu abaadi abakimbi kumona Yesu kuakitshi bilengieleshi, kabingilo kakata ka kupeta kikudi kiselele kabaadi ka kulungula mukandu wibuwa. Kunyima, balunguile bantu abaadi abamuteemesha’shi: ‘Lelo uno buno butemuki bubalombana.’

Akupu, Yesu bayile ku Kalunga ka Ngalileya, kubaadi mufumankane na balongi baye bananka babaadi balobi ba mishipa. Aye nkuibetanyina’shi: ‘Fikaayi nundonde, nenuikasha balobi ba bantu.’ Kubaadi, Mpiele, Andre, Yakobo, na Yowano. Anka paapa abalekiele makondia aabo, na abo nkumulonda. Abayile mu Ngalileya oso na kulungula mukandu pabitale Bufumu bua Yehowa. Abaadi abalungula mu bitumbuilo, mu ma mbalo a bisalue na mu misese. Kibumbu kikata kia bantu kibebalondanga koso kuabende. Mukandu upia pabitale Yesu nkupalakana mbalo yoso, mpa na mu Siri.

Muenda mafuku, Yesu baadi mupe bangi ba ku balongi baye bukome bua kubinga bikudi bibi. Bangi abayile naye na kulungula mukandu wibuwa mu musoko na musoko na mu kibundi na kibundi. Bana bakashi bebungi basha lukumiino, bu Mariya a ku Magadala, Yoana, Suzana, na bangi babaadi bapasukile Yesu na balongi baye.

Kunyima kua kulongiesha balongi baye, baadi muibatume mu bulungudi. P’abaabadi abatambuka mu Ngalileya, bangi bantu bebungi abafikile balongi abo nkubatshishiibua. Bu bibaadi bebungi abakimbi kuikala bu balongi, Yesu baadi muibapuandikishe na efuba ditadidi pepi na kuumbulua. Bambile’shi: ‘Tekayi kui Yehowa bua kutuma bafubi bebungi bua kuumbula.’ Kunyima basanguile bangi ba ku balongi baye 70 aye nkuibatuma babidi babidi mu bulungudi mu Yudeya oso. Abo nkulongiesha bantu ba bipaso bioso pabitale Bufumu. Pababaadi balukiile, abaadi na muloo wa kulungula Yesu bibaadi bikitshikie. Diabulu t’abaadia kukita kintu su nkimune bua kuimika mudimo wa bulungudi.

Yesu baadi mushinkamishe’shi balongi baye abaadi na kia kutungunuka na uno mudimo wi na muulo kunyima kua’ye kualuka muiyilu. Bebalunguile’shi: ‘Lungulayi mukandu wibuwa mu nsenga ishima. Nulongieshe bantu pabitale Eyi di’Efile Mukulu nuibabatshishe.’