Yesu alongiesha balongi baaye bia kuteka

Bafadisee abaadi abakitshi mianda yoso nka penda bua kukanyisha bantu. Su abakitshi muanda na kalolo, bibaadi nka bua’shi bangi bebamone. Abaadi abeele nteko mu ma mbalo e bantu bebungi bua’shi boso bebamone. Bafadisee abaadi balamiine nteko ibula na kuiyalushenanga mu bitumbuilo na mu mansanka a misese mubaadi bia’shi bangi bebapusha. Kadi bantu abaadi bakaanye pabaadi Yesu muibalungule’shi: ‘Tanuikalanga anutekie bu Bafadisee. Abamono’shi bishima biabo bibungi abikanyisha Efile Mukulu, aku namu ta nnabio. Luteko lui pankatshi pobe na Yehowa. Tanuambuulanga mianda imune misusa na misusa.’ Yehowa akumina’shi omulungule bi muishimba diobe.

‘Biabia tekayi bino: “Yaya etu e muiyilu, eshina diobe dikashue dia kishila. Bufumu bobe bufikie. Kikiebe ki’eshimba diobe kikitshikie pa nsenga mumune na muiyilu.”’ Yesu bebalunguile dingi bua kuteka kia kudia kia kuifuku, bua kufuidibua lusa ku miluisho yabo na bua ingi mianda yabo.

Yesu bakuile’shi: ‘Tekayi kushi kukooka. Tungunukayi na kuteka Nshenu Yehowa bua bintu bibuwa. Muledi oso, akuminaa kupa muan’aye nka bintu bibuwa. Su muana oobe akuteka mukate, we kumupa ebue? Sunga akuteka mushipa, we biakumupa nyoka?’

Akupu Yesu baadi mupatuule’shi: ‘Su anue anuuku kupa bana benu bintu bibuwa, mbikunyi bilombene Nshenu Yehowa kukutua kuinupa kikudi kiselele? Tekayi kioso kianudi nakio lukalo.’ Okuete kulonda elango dia Yesu su? Obe namu otekaa bua bintu kinyi?