Yesu asangula Lazare

Yesu baadi na bakuuku basatu ba p’eshimba abaadi bashale mu Betani. Abaadi Lazare na bakuabo bakashi babidi, Mariya na Maata. Dingi efuku, pabaadi Yesu ku dingi eshiya dia Yordane, Mariya na Maata nkumutumina mukandu’shi: ‘Lazare mukambilue na maladi. Fika namu bukidi!’ Kadi Yesu tabayile musango umune nya. Baadi mutengiele kunyima kua mafuku abidi akupu balunguile batumibua baaye’shi: ‘Tuendeyi ku Betani. Lazare mmulale, anka nende nkamubushe.’ Batumibua nkuamba’shi: ‘Su Lazare mmulaale, biabia abimukuasha bua kupusha bibuwa.’ Nyi Yesu nkuibalungula kalolo’shi: ‘Lazare mmufue.’

Pabafikile Yesu ku Betani, bapetele bapue kushika Lazare takudi mafuku ananka. Bibumbu bia bantu bibafikile mu kusamba Maata na Mariya. Pabaadi Maata mupushe’shi Yesu bafiki, bayile lubilo mu kumutundayisha. Aye nkuamba’shi: ‘Muanana, su bodia kuikala pano, mukuetu mulume tabadia kufua nya.’ Yesu bamulunguile’shi: ‘Maata, mukuenu asanguka. We na lukumiino mu biankulungula su?’ Aye nkualula’shi: ‘Nauku’shi akasanguka ku lusangukilo.’ Yesu nkumulungula’shi: “Ne lusangukilo na muwa.”

Akupu Maata bayile kui Mariya akamulungula’shi: ‘Yesu e pano.’ Mariya nkuenda lubilo kui Yesu, kibumbu kia bantu kibamulondele. Mariya nkupona ku ngua ya Yesu na kudila. Amulungula’shi: ‘Muanana, su bodia kuikala pano, mukuetu mulume tabadia kufua nya!’ Yesu nkumona bibaabi bukata bua kinyongua kiaye, aye nkubanga namu kudila. Pabamuene kibumbu akutuusha Yesu mpolo, kibakuile’shi: ‘Yesu ekeele mufule Lazare bikata.’ Bangi namu abaadi abealashena’shi: ‘Buakinyi ta mupaashe kuuku’aye?’ Yesu baadia kukita kinyi kunyima?

Yesu bayile ku mashama abaadi n’ebue dikata dishikie ku kituelelo. Aye nkuamba’shi: ‘Katushayi ebue.’ Maata nkuamba’shi: ‘Takudi mafuku ananka n’aye kufua! Baapu kubanga kununka.’ Abakatuishe ebue, akupu Yesu nkuteka’shi: “Yaya, nakutumbula bua bibompushisha. Eyendo nauku’shi ompushishaa misusa yoso, kadi n’akula bua kibumbu kia bantu kinyifunyishe bua’shi kiukie’shi, noobe muntume.” Aye kiapu kuakula biabia, belele musase’shi: “Lazare tuuka!” Kubakitshikile kintu kia kukaanya: Lazare nkutuuka mu mashama, muanyibue mbidi yooso na bilamba. Yesu nkuakula’shi: “Muanguleyi numutadiile ende.”

Bebungi abamuene biabia abaadi bakumiine mui Yesu. Anka bangi abayile mu kulungula Bafadisee. Kubanga nka paapa, Bafadisee abakimbile kuipaa Lazare na Yesu. Umune a ku batumibua 12, Yundase Iskariote, bayile mu bufiefie kui Bafadisee ebepusha’shi: Anumpa makuta bungi kinyi su nenukuasha bua kukuata Yesu? Abo nkumulaa bua kumupa makuta 30 a kiamo arja, Yundase nkubanga kukimba mushindo wa kukuata Yesu bua kumufikisha ku masa kua Bafadisee.