Mulami a lukano balongo bia binyibinyi

Mu Fidipe, mubaadi ungi nsonguakashi mpika baadi na demo. Yawa demo baadi amupa kikudi kia lubuko na baadi apetesha ba nfumuaye makuta ebungi. Pabaadi Mpoolo na Silase bafikie mu Fidipe, yawa nsonguakashi baadi ebalondo munda mua mafuku ebungi. Demo baadi eele musaase muadi’shi: “Bano bantu mbapika b’Efile Mukulu Mukile Bukata a Kuiyilu.” Nfudiilo a bioso, Mpoolo balunguile demo’shi: ‘Muishina dia Yesu tuuka muadi!’ Demo batukile mui yawa nsonguakashi.

Pabaadi ba nfumua’ye bamone’shi tabaadi dingi bia kuibapetesha makuta, abafiitshile munda bikata. Abatuadile Mpoolo na Silase kui bakata ba kibundi na kuakula’shi: ‘Bano bantu tabanemeka muiya, bakuete kutuesha kafutakanyi mu kibundi kioso!’ Bakata ba kibundi abatushishe eyi bua’shi bakupile Mpoolo na Silase na kuibeela mu lukano. Mulami a lukano bebatueshele munkatshi mua lukano na kuibeela mu miomba.

Mpoolo na Silase abaadi abayimbi bua kutumbisha Yehowa, bangi bena lukano abaadi abebapusha. Musango umune munkatshi mua bufuku, nsenga ibaadi itshinkie nshibo ya lukano nkuinyunya bikata. Biibi bia ku lukano nkufunguka na nkano na miomba bioso nkufunguka. Mulami a lukano bafikile lubilo munda aye nkumona’shi biibi bibaadi binfungukie. Bamuene’shi bena lukano booso abatuuku, aye nkukimba lupete bua kuiyipaa.

Nka paapa, Mpoolo nkumuitamina’shi: ‘Tuekitshinanga bibubi muanda, atue boso tui panka!’ Mulami a lukano bayiile lubilo aye nkukunama kumpala kua Mpoolo na Silase. Bebatekiele’shi: “Abitungu nkite kinyi bua kupaashibua?” Abamulunguile’shi: ‘Abitungu obe na ba mu nshibo yoobe nukumiine mui Yesu.’ Akupu Mpoolo na Silase nkuibalongiesha eyi dia Yehowa, mulami a lukano na ba mu nshibo yaye abaadi babatshishibue.