Ngukisho itale beena kikongeno

BAABA ABAKUKILA BANTU Baaba abakukila bantu be kwanka bwa nkukwasha. Kumiina kulonda kyooso kyabakulungula pabitale mbalo ya kutuula motoka, ntukutuku sunga nkinga, mbalo ya kutwelela na ya kutuukila, kukwatshila bangi bantu mbalo na pabitale ingi myanda.

BUKWASHI BWA BWANGA Tanulubanga’shi bino mbitale nka penda mukumbo ubapulukila muntu ku Kikongeno.

BUKWASHI KU MIDIMO Su we na lukalo lwa kukwasha ku midimo ya ku kikongeno, enda okemonene na bano abafubu mu Departema a ngukisho na a bukwashi ku midimo.

BYA BUNTU Makuta e bungi ngatushiibwe bwa kulumbuula mbalo i buwa ya kushala, bintu bya kutusha nabyo mayi, bintu bya kulesha nabyo video, ingi midimo ayikwasha bwashi kikongeno kikitshikye kalolo na bwa’shi kitukwashe bwatudya kwifubwila peepi na Yehowa. Bya buntu byenu abikwasha bwa kukumbasha ino myanda na bwashi mudimo wa Bufumu aukitshika mu nsenga ishima wende kumpala. Bwa ooso akumiina kutuusha kya buntu, kwi tusheeto twabadi batuule patooka mu ino mbalo ya kikongeno. Nwi balombene dingi kutusha bya buntu ku internete pa kutwela mu site donate.jw.org. Atwinutumbula bikata bwa bya buntu byenu byanukwete kutuusha. Kasaka ka Bakunkushi-Bakulu akenutumbula bwa kalolo keenu kanulesha bwashi mudimo wa Bufumu wende kumpala.

DEPARTEMA A BINTU BISANGULWE Abitungu nkatuula bintu byooso byanusangula ku Departema a bintu bisangulwe. Su boshimisha kintu kampanda, enda okekikimbe ku uno departema. Su bopete mwana e kwibula na bamutande na mushimine, mutwale ku uno departema. Kadi bwa kupela yaya nkalakashi yooso, atwinutekye bwashi nulame bana benu kalolo na kushaala nabo pamune.

LUBATSHISHO Mbalo ilumbulwe bwa bantu ababatshishibwa ayikala kumpala, italeene na yawa akitshi mwisambo. Abitungu shi bantu abakyebe kubatshishibwa bashale pa yaaya mbalo kumpala kwa kubanga mwisambo wa lubatshisho mu dya Mpooso kumpala kwa midi. Muntu ooso afikye na bilamba bibuwa bya kumwina nabyo na kilamba kya kukumuna nakyo meema.

MBALO YA KUSHAALA Kumiina namu kunemeka bangi. Tolubanga shi anka penda muntu oodi mushale naye nshibo imune, anudi bafikye naye pamune sunga uno okwete kulonga naye Bible; ndjo oodi mulombeene kukwatshila mbalo. Tokumanga kutuula bintu pa mbalo i peepi noobe yoshi mukwatshile bantu.

KISANGILO KI PABWAKYO

Kalasa ka balungudi ba Bufumu Ba mbala-mashinda be na bipwa kubanga mu 23 na ku 65, abakumina kutamisha mudimo wabo, mbetaminyibwe bwa kutwela mu kisangilo kitale Kalasa ka Balungudi ba Bufumu akikitshika mu dya Lubingo kunyima kwa midi. Abebalungula mbalo na nsaa ayikitshika kino kisangilo.