DILONGIESHA 07
Yehowa ekalaa naminyi?
Opuandikisha’shi Yehowa Efile Mukulu ekalaa naminyi? Omumonaa bu muntu a kunemeka kadi e kula nobe, bu luenyenyi lui kula? Su Omumona’shi nta muntu, nyi nkintu ki bukome bu kapandapanda ka mpeshi? Yehowa ekalaa naminyi? Mu Eyi diaye Bible, Yehowa etulesha ngikashi yaye, etulungula dingi’shi ekalakasha buetu.
1. Buakinyi tatui balombena kumona Efile Mukulu?
Muanda “Efile Mukulu nkikudi.” (Yowano 4:24) Yehowa te na mbidi bu yetu nya. E na mbidi ya mu kikudi, na mushalele muiyilu muatushii balombene kumumona.
2. Ingi ngikashi ya Yehowa
Sunga biekala’shi tatui bia kumona Yehowa, tui balombene kumuuka na kumufula muanda nyi muntu a binyibinyi e na ngikashi ibuwa. Bible akula’shi “Yehowa mufule bululame, taasumbushenaa bamulamate nya.” (Misambo 37:28) Dingi, Yehowa e na “eshimba dya kalolo na sha lusa,” bikishekishe kui baaba bakuete kukienga. (Shake 5:11) “Yehowa ee peepi na be na mashimba eenyongole; dingi apashaa be mu mpombo.” (Misambo 34:18) Ouku’shi biatukitshi mbilombene kusankisha Yehowa sunga kumuinyongosha? Muntu asangula bua kukita mianda ibubi, akuatshisha Yehowa buufu na kumuinyongosha. (Misambo 78:40, 41) Kadi muntu akitshi mianda ibuwa, amuikasha na muloo.—Badika Nkindji 27:11.
3. Yehowa alesha’shi muitufule naminyi?
Eyikashi dikata dia Yehowa nkifulo. Biabia, “Efile Mukulu nyi nkifulo.” (1 Yowano 4:8) Yehowa t’alesha kifulo kiaye penda mu Bible nya, kadi akimuenekaa dingi mu bintu biadi mupangie. (Badika Bikitshino 14:17.) Bu kileshesho, banda kutala biadi muitupangie. Muitupangie mu kipaso kia’shi tumone malangi e buwa, kupusha mizike ibuwa na kupusha muenyi wa bidibua bibuwa. Akumiina’shi tuikale na muloo mu nshalelo etu.
TUKIMBUULE BOSO
Tutale bibadi Yehowa mukite bintu bia kukaanya. Na bietulesha ngikashi yaaye i buwa.
4. Kikudi kiselele—nyi mbukome bu’Efile Mukulu
Yehowa afubishaa kikudi kiaye kiselele, nka bu biatufubaa na maasa eetu bua kukita mudimo. Bible etulungula’shi kikudi kiselele nta muntu nya, anka nyi bukome bu’Efile Mukulu buatumikaa nabo. Badika Luka 11:13 na Bikitshino 2:17, Akupu nuisambile ino nkonko ailondo:
Efile Mukulu “apongoolaa” kikudi kiaye kiselele, kui baba abamutekie kianka. Omono’shi kikudi kiselele nyi muntu, su mbukome abufubishaa Efile Mukulu bua kukita bintu? Buakinyi wakula biabia?
Yehowa kuete kufubisha kikudi kiaye kiselele bua kukita bintu bia kukaanya. Badika Misambo 33:6 na 2 Mpyeele 1:20, 21, Akupu nuisambile luno lukonko alulondo:
Yehowa mmufubishe kikudi kiaye kiselele mu ingi mishindo kinyi?
5. Yehowa e na ngikashi ibuwa
Moyiise badi mulanguidi a Efile Mukulu sha lulamato, anka, badi akimbi kuuka mupangi aaye kalolo. Moyiise bambile’shi: ‘Ngukishe mashinda oobe bua’shi nkuukye.’ (Efilu 33:13) Yehowa badi mualule Moyiise, aye nkumulesha ingi ya ku ngikashi yaye. Badika Efilu 34:4-6, Akupu nuisambile ino nkonko ailondo:
Yehowa badi muleshe Moyiise ngikashi kinyi ya bumuntu buaye?
Ngikashi kinyi ya Yehowa aikambaa nkutakula bua kuifubuila kuadi?
6. Yehowa etatshishaa buetu
Bena Ebelu babadi muilo wa Efile Mukulu, babadi abakiengie mu bupika mu Ejiipitu. Yehowa badi apusha naminyi nsaa ibabadi abebakiengiesha Teemesha MAYI AKOBOLE na nulondeshe pamune sunga kubadika Efilu 3:1-10. Akupu nuisambile ino nkonko ailondo.
Nkinyi akikulongiesha uno muisambo pabitale abipushaa Yehowa nsaa ayikienge bantu?—Tala verse 7 na 8.
Mu kobe kumona, onangushenaa’shi Yehowa akuminaa binyibinyi kukuasha bantu, n’ashi e na mushindo wa kuibikita? Buakinyi onangushena biabia?
7. Ngikashi ya Yehowa ayimueneka mu bipangua
Yehowa alesha ngikashi yaye ku bukuashi bua bintu biadi mupangie. Tala VIDEO. Na nubadikie Bena-Loma 1:20, Akupu nuisambile luno lukonko alulondo.
Ngikashi kinyi ya Yehowa yokuete kumona mu bintu biadi mupangie?
BANGI ABAMBA’SHI: “Efile Mukulu ta muntu nyi penda bukome bui mbalo yoso.”
Obe namu onangushena naminyi?
Buakinyi onangushena biabia?
MU KIKOSO
Yehowa nyi muntu a mu kikudi shamuenekaa e na ngikashi ibungi ibuwa, bikishekishe kifulo.
Kuambuula
Buakinyi tatui balombene kumona Yehowa?
Kikudi kiselele nkinyi?
Tubamono ngikashi kinyi ya ku ngikashi ya Yehowa?
TALUULA DINGI
Tamisha mpushisho oobe pabitale Yehowa p’obe kulonga pabitale ngikashi yaye ikata inanka.
Tala bishinkamisho abilesha’shi Efile Mukulu te mbalo yoso sunga mu bintu bioso.
“Efile Mukulu e mbalo yooso, nsaa yooso su?” (Muisambo wi mu Internete)
Tala buakinyi Bible alesha kikudi kiselele bu maasa a Efile Mukulu.
Ungi muntu mpofu badi na mpaka ya kukumina’shi Efile Mukulu ekalakashaa buaye, tala kibadi kishintule binangu biaye.
“Binobino namono shi ne mulombeene kukwasha bangi” (Kitenta kia Mulami, 1/10/2015)