DILONGIESHA 12
Nkinyi ki bia nkukuasha bua kutungunuka na kulonga Bible?
Kulonga Bible nkulombene nkutuadila milo ibungi. Anka ingi nsaa nkulombene kumueneka bu kuibukopo. Pangi we kuiyipusha su wekala na ngobesha ya kutungunuka na kulonga Bible. Buakinyi abitungu kuikitshisha bua kutungunuka na kulonga? Nkinyi kilombene nkukuasha bua kunyingiila sunga opeta nkalakashi?
1. Buakinyi kulonga Bible kui na muulo?
“Mukandu [Eyi dya] Efile Mukulu di na muwa na bukome.” (Bena-Ebelu 4:12, EEM) Bible e na muulo muanda akufumbuila binangu bi’Efile Mukulu na biapusha pabikutale. Takukuasha penda bua kupeta kiukilo nya, anka akukuasha dingi bwa kupeta binangu bya binyibinyi na lukulupilo. Na ki na muulo ukata, Bible akukuasha bodia kuikala kuku a Yehowa. Nsaa yolongo Bible, otadiila bukome bu’Eyi di’Efile Mukulu buashi bulumbule nshalelo oobe.
2. Buakinyi bi na muulo kuuka kinemo kia bia binyibinyi bia mu Bible?
Bia binyibinyi bia mu Bible, bi nka bu mabue a muulo ukata. Nyi buakinyi Bible etunyingisha bua “[kuula bya] binyibinyi kushii kwibipaana.” (Nkindji 23:23) Patutulu mu binangu bietu kinemo kia bia binyibinyi bia mu Bible, atukitshi muetu moso bua kutungunuka na kulonga sunga tuafumankana na bikokoshi.—Badika Nkindji 2:4, 5.
3. Yehowa e nkukuasha bua kutungunuka na kulonga naminyi?
Bu biadi Mupangi na Kuku’obe sha bukome boso, Yehowa mulombene nkukuasha bua kulonga pabimutale. Mulombene nkupa ‘lukalo na bukome bwa kukita muyile abimusangasha.’ (Badika Bena-Fidipe 2:13, Kilombeno kipya 2014.) Biabia, su we na lukalo lua kutungunuka na kulonga, sunga kutumikila biabia biolongo, Yehowa mulombene nkukuasha. Na dingi, nsaa yodi na lukalo lua bukome bua kukambila bikokoshi sunga buluishi, mulombene nkupa buanka. Ikala otekie Yehowa pa kiubishi bua’shi akukuashe bua kutunguka na kulonga Bible.—1 Bena-Tesalonika 5:17.
TUKIMBUULE BOSO
Tutale biodi mulombene kutungunuka na kulonga Bible sunga wekala na mianda ibungi ya kukita sunga buluishi abufiki kui bangi. Akupu, otale bilombene nkukuasha Yehowa bua kuyididila na kulonga.
4. Tuula kulonga kobe kua Bible pa mbalo ya kumpala
Ingi nsaa atumona’shi tatui na nsaa yatudia kulonga Bible, muanda tui na bibungi biatudia kukita mu nshalelo. Biabia nkinyi kilombene nkukuasha? Badika Bena-Fidipe 1:10, akupu nuisambile ino nkonko ailondo:
Nkinyi kiomono’shi ‘nkikile bioso ku [muulo]’ mu nshalelo oobe?
Mbikunyi biodi mulombene kutula kulonga kobe kua Bible pa mbalo ya kumpala?
Su wela lusenga mu kambeketshi, akupu okumbasha mabue, angi mabue aakutua mbalo
Su wela mabue kumpala mu kambeketshi, wekala na mbalo ibungi ya kukumbasha lusenga. Mu mushindo umune, su otuula “bintu bi na muulo ukata” pa mbalo ya kumpala mu nshalelo oobe, wekala na ngobesha ya kuibilombasha na kushala mpa na nsaa ya kukita bingi bintu
Kulonga kua Bible, akulombasha lukalo luetu lua mu kikudi lua kuuka na kulanguila Yehowa. Badika Mateo 5:3, akupu nuisambile luno lukonko alulondo:
Muabi kinyi watupete su atutulu kulonga kua Bible pa mbalo ya kumpala?
5. Nyingiila buluishi
Ingi nsaa bangi balombene kukubofusha bua’shi tolonganga Bible. Tala kileshesho kia Francesco. Tala VIDEO, akupu nuisambile ino nkonko ailondo.
Mu uno video, ba kuku na kifuko kia Francesco abakitshine kinyi pabadi muibalungule mianda ibadi alongo?
Mbikunyi bibadi mupete efuto p’aye kunyingiila?
Badika 2 Timote 2:24, 25, akupu nuisambile ino nkonko ailondo:
Ba kuku bobe na kifuko kiobe abapushaa naminyi pabitale mianda yokuete kulonga?
Muyile ano ma verse, we kukita naminyi su muntu tasangeela kulonga kobe kua Bible? Buakinyi okula biabia?
6. Kulupila’shi Yehowa akukuasha
Patuifubuila pepi na Yehowa, lukalo luetu lua kumusangasha alutama. Anka mbilombene kuituikela bukopo bua kushintula kintu kapanda buashi tuikale na nshalelo muipushene na abikumina Yehowa. Su wepushaa biabia tokokanga. Yehowa akukuasha. Tala VIDEO, akupu nuisambile ino nkonko ailondo.
Mu uno video, nkushintuluka kinyi kubakitshi Jim bua kusankisha Yehowa?
Nkinyi akikukaanyisha pabitale kileshesho kiaye?
Badika Bena-Ebelu 11:6, akupu nuisambile ino nkonko ailondo:
Yehowa akakitshi kinyi bua baba “abamukimbi [mu binyibinyi”] kuamba’shi baba abetatshisha bua kumuiuka na kumusankisha?
Bino abikulongiesha kinyi pabitale abipusha Yehowa nsaa yakumono wetatshisha bua kulonga Bible?
SU MUNTU AKUIPUSHA’SHI: “Buakinyi okuete kulonga Bible?”
We kumualula naminyi?
MU KIKOSO
Sunga biekala’shi kulonga kua Bible takuikala’nka kubofule, nkulombene nkukuasha bua kuikala na muloo bua loso mu nshalelo oobe. Tungunuka na kukulupila mui Yehowa, aye namu akakupa efuto.
Kuambuula
Buakinyi bia binyibinyi bia mu Bible bi na muulo kodi?
We ‘kushinguula kikile bioso ku muulo naminyi’?
Buakinyi abitungu kuteka Yehowa bua’shi akukuashe bua kutungunuka na kulonga Bible?
TALUULA DINGI
Tala mayele ananka akuashe bantu bebungi buabadia kufubisha nsaa yabo kalolo.
“Mushindo wa kutumika kalolo na nsaa yobe” (Pasukayi!, 2/2014)
Tala mushindo ubadi Yehowa mukuashe ungi muana mukashi badi na mulume shibadi apusha buakinyi etatshisha bua kusankisha Yehowa.
Tala kunyingiila kua ungi muana mukashi biakubadi kukuashe mulume aaye.
Bangi bantu abamba’shi ba Temwe ba Yehowa abaluishaa sunga kutshiba bifuko bia bantu. Bino mbia binyibinyi su?
“Ba Temue ba Yehowa abaluishaa sunga kutshiba bifuko bia bantu su?” (Muisambo wi mu Internete)