Bible kwete kushintula bantu

“Ne mufikie bu mulume ebuwa.”​—RIGOBERT HOUETO

• MUTANDIKUE MU: 1941

• EUMBO DIABO: BÉNIN

• BAADI: NA BAKASHI BEBUNGI, MUSHIKUE BA TEMUE BA YEHOWA

BINAADI KALA:

Ne a mu Cotonou, kibundi kikile bukata kia mu Bénin. Babaadi bankushe na malongiesha a bena Katolike, kadi ntshi naadi nende mu kipuilo misango ibungi nya. Mbalo inadi mushale bena Katolike bebungi babaadi na bakashi bebungi, muanda mu aa mafuku mbulamatadi tabaadi mupele kuibakila bakashi bebungi nya. Ami namu nkuibakila bakashi bananka.

Pabaadi ngoshi ituukie mu kipua kia 1970, nadi munangushene’shi abikuasha eumbo dietu. Nadi mukuatshishene yaya ngoshi na ami nkutuelakana mu mianda ya politike. Bantomboshi tababaadi abakumina ba Temue ba Yehowa muanda tababaadi abatuelakana mu mianda ya politike. Nadi munkatshi mua bantu babaadi abakiengiesha ba Temue. Pabaababingile ba Misionere ba Temue ba Yehowa muiumbo mu kipua kia 1976, nadi mushinkamishe’shi tabaalukila dingi efuku nya.

MUSHINDO UBAADI BIBLE MUALUULE NSHALELO ANDE:

Buabua buntomboshi bubapuile mu kipua kia 1990. Musango umune ba Misionere nkualuka, bibaadi binkanyiishe ngofu. Nambangile kuela binangu’shi pangi Efile Mukulu akuatshishenaa bano bantu. Mu aa mafuku napetele ungi mudimo. Ungi muina mudimo nami baadi Temue a Yehowa, na mafuku apela kunyima babangile kundongiesha mianda ya mu Bible. Baadi mundeshe ma verse a mu Bible aalesha’shi Yehowa nyi Efile Mukulu a kifulo na kululama. (Miiya Ikituulwe 32:4; 1 Yowano 4:8) Yaya ngikashi ibaadi insankishe ngofu. Nadi nakiebe kulonga mianda ibungi pabitale Yehowa, nyi buakinyi nakuminyine kulonga Bible.

Mafuku apela kunyima, nambangile kutuela mu bisangilo bia ba Temue ba Yehowa. Bibaadi bankanyishe ngofu panamuene kifulo kiabadi nakio​—tababaadi na ntondo y’ekoba sunga kuata ba mpeta na muulo kukila balanda. Panadi nanyisha kutuela mu bisangilo bia ba Temue ba Yehowa, bibaamuenekiele patooka’shi mbalongi ba binyibinyi ba Yesu.​—Yowano 13:35.

Natshile kitshibilo kia’shi su nakumina kufubila Yehowa, abitungu ntukie mu Katolike. Pabibaadi bibofule bua kuata kiakia kitshibilo, muanda nadi natshinyi bilombene kuakula bangi bantu. Kunyima kua mafuku ebungi, na bukuashi bua Yehowa nanyingile eshimba ami nkutuka mu Katolike.

Kubaadi ungi muanda ukata autunganga’shi nshintule. Kulonga kuande kua Bible nkunkuashe bua kumona’shi Efile Mukulu takuminaa kuibakila bakashi bebungi. (Kibangilo 2:18-24; Mateo 19:4-6) Ku meso kuaye, anka dibaka diande dia kumpala nyi dikuminyibue. Biabia nadi mufundishe diadia dibaka ku mbulamatadi na ami nkubinga bangi bakashi bande, kadi mulumbule bua kukumbasha nkalo yabo ya ku mbidi. Kunyima, babidi ba ku bakashi bande ba kala babafikile ba Temue ba Yehowa.

MILOO YANDI MUPETE:

Sunga biekala’shi mukashi ande kinka muina Katolike, anemekaa kitshibilo kiande kia kufubila Yehowa. Namonaa’shi namfiki mulume ebuwa, na mukashi ande namu ebimonaa.

Nadi namono’shi nekulumbula eumbo dietu ku bukuashi bua mianda ya politike, kadi kuakua kuitatshisha koso nkua bisumanga. Binobino namono’shi nka penda Bufumu bu’Efile Mukulu nyi bulombeme kupudisha mianda ya bantu. (Mateo 6:9, 10) Ne na lutumbu lukata kui Yehowa muanda mmundeshe bia kuikala na nshalelo a muloo wa binyibinyi.

“Tabibaadi bibofule buandia kushintuluka.”​—ALEX LEMOS SILVA

• MUTANDIKUE MU: 1977

• EUMBO DIABO: BRÉSIL

• BAADI: PASTERE A MU KIPUILO KIA PENTEKOTE

BINAADI KALA:

Nadi mukudile mu kartie ke kula mu Itu mu São Paulo. Kaka kartie kabaadi akaukibua bikile muanda wa buntomboshi bubaadi muanka.

Nadi na bukielo bui bukopo na nadi nantambuka lusandi. Dingi, nadi mutuelakane mu kupaana kua bintu abikoluanaa. Kunyima namuene’shi yawa nshalelo akantueshe dingi efuku mu lukano sunga kungipasha, biabia ami nkumuleka. Natuelele mu kipuilo kia Pentekote na ami nkufika bu pastere.

Nampushishe’shi ne mulombene kukuasha binyibinyi bantu ku bukuashi bua mudimo wande wa mu kipuilo. Nadi nende ku kisashi bua kulambukisha, nyi buakinyi bantu bebungi babaadi abanguku ngofu. Anka, ku kapela kapela nanfikile mu kukumina’shi mu mianda ibungi, kipuilo takibaadi akipasukila balanguidi​—takibaadi akikalakasha sunga bua kutumbisha Efile Mukulu. Ami nkumona’shi kepatshila kakata ka kipuilo kabaadi ka kupeta makuta. Nyi buakinyi natshile kitshibilo kia kutuka mu kiakia kipuilo.

MUSHINDO UBAADI BIBLE MUALUULE NSHALELO ANDE:

Panambangile kulonga Bible na ba Temue ba Yehowa, namuene musango umune’shi mbelekene na bingi bipuilo. Kui mianda ibidi ibaadi inkanyishe ngofu. Wa kumpala, ba Temue ba Yehowa tabakulaa penda’shi abitungu kufula Efile Mukulu na muntu nobe nya, kadi abebileshaa. Wa kabidi, tabatuelakanaa mu mianda ya politike na mu ngoshi. (Yeeshaya 2:4) Ino mianda ibidi ibaadi inshinkamiishe’shi nampete lulanguilo lua binyibinyi​—eshinda dipela adituala ku muwa wa losoo.​—Mateo 7:13, 14.

Namuene’shi su nankumina kusankisha Efile Mukulu, abitungu nshintule ingi mianda. Abitunganga’shi ntale kifuko kiande ngofu, na nekale na kuiyisha kui bungi. Tabibaadi bibofule bua kushintuluka, anka ku bukuashi bua Yehowa nadi mushintulukie. Kuakua kushintuluka kubaadi kukanyishe mukashi ande ngofu. Babangile kulonga Bible kumpala kuande, kadi binobino babangile kuenda kumpala bukidibukidi mu kulonga kuaye kua Bible. Mafuku apela kunyima atue boso tubamuene’shi atukumina kufika bu ba Temue ba Yehowa. Tubaadi babatshishibue muifuku dimune.

MILOO YANDI MUPETE:

Ami na mukashi ande tui na muloo wa kukuasha bana betu basatu bua’shi bafikie ba kuuku ba Yehowa. Tui mu kifuko ki na muloo. Nantumbula Yehowa bua kunkuasha bua’shi nguukie bia binyibinyi bi muiyi diaye Bible. Bia binyibinyi abishintula nshalelo a bantu! Mbimuenekie patooka mu nshalelo ande.

“Binobino tandi na nshalelo ebuwa na a muloo.”​—VICTORIA TONG

• MUTANDIKUE MU: 1957

• EUMBO DIABO: AUSTRALIE

• BAADI: MUKIENGIESHIBUE KU BUKINGA

BINAADI KALA:

Nemukudile mu kibundi kia Newcastle, mu Nouvelle-Galles du Sud. Ne muana a kumpala mu bana musambobidi, mu kifuko kia papa baadi na bukielo buibungi na baadi akolo malua na mama baadi na bukielo. Mama baadi ankupila na baadi ankaa milomo. Misango ibungi baadi andungula’shi ne muana ebubi na’shi nankakiengie muishiba dia kalo. Biabia bibaadi abintshinyisha ngofu.

Bu bibaadi mama akamba kunkupila, bibaadi abinkutshisha bua kuenda mu kalasa misango ibungi. Panadi na bipua 11, bakata ba mbulamatadi babaadi bankashe kui baledi bande bantula mu mbalo yabalamaa bana, akupu bantula mu couvent. Panankumbeshe bipua 14, nansukile mu couvent. Bu bianshanadi nankumina kualukila ku nshibo, nanshalele mu mashinda a Kings Cross, kartie ka mu kibundi kia Sydney.

Panadi mushale mu lupata, nambangile kutoma kabangi, maalua, kubandila pornografi, na kutambuka ki ndumba. Kubaadi muanda umune ubaadi untshinyishe ngofu. Nadi mushale kua ungi muntu baadi na boîte de nuit. Dingi efuku ku kiolua, bana balume babidi babafikile mu kumutala. Baadi muntume bua’shi ngiende mu shambre, kadi nadi nampusha bioso bibaabadi abesamba. Yawa muntu sha boîte de nuit baadi alumbula bua’shi angudishe kuabadi. Babaadi abakiebe kunfia mu masuwa bua’shi nyende mu Japon nkafube mu ungi boîte de nuit kuakua. Nampushishe moo wi bukopo, ami nkuitumba mu balcon, nkusuka bua kukimba muntu akunkuasha.

Nansangene ungi muana mulume baadi mufikie mu kutala kibundi kia Sydney, ami nkumulondela muanda wande mukulupile’shi e kumpa makuta. Anka yawa muntu baadi muende nami kubaadi mushale bua’shi netumpe mema na ndie kantu. Mianda nkushintuluka. Kunyima kua kipua kimune, tubaadi beyibakishene.

MUSHINDO UBAADI BIBLE MUALUULE NSHALELO ANDE:

Panambangile kulonga Bible na ba Temue ba Yehowa, mianda ibungi ibaabangile kunkulakasha. Nadi mupushe nsungu panandongiele’shi Satana nyi afuishaa makienga; aku namu koso’ku babaadi bandongieshe’shi Efile Mukulu nyi etukiengieshaa. Bibaadi binsankishe panandongiele’shi Efile Mukulu takiengieshaa bantu muishiba dia kalo nya, dilongiesha dibaadi adintshinyisha munda mua bipua bibungi.

Mushindo ubaadi ba Temue ba Yehowa abaata bitshibilo muyile mayi a kulonda a mu Bible ubaadi unkanyishe ngofu. Abatumikilaa mianda yabalongiesha. Nadi na mianda ibukopo, anka sunga nankita sunga kuakula kinyi, ba Temue babaadi’nka abankitshina mianda na kifulo na kanemo.

Binangu bibaadi abikamba kunkalakasha mbia kuipusha bu shina muulo. Nadi muishikue ami nabene, na bino binangu bibatungunukile na kunkalakasha mafuku ebungi kunyima kuami kubatshishibua na kufika Temue a Yehowa. Nadi mufule Yehowa, kadi nadi mushinkamishe’shi Yehowa ta mulombene kufula muntu e bu biandi.

Nadi mupete mwanda ubadi ushintuule binangu byande bipwa 15 kunyima kw’ami kubatshishibwa. Panadi nateemesha mwisambo ubabadi abakitshi ku Nshibo ya Bufumu . . . , mukwetu badi akitshi mwisambo badi mubadikishe mukanda wa Shake 1:23, 24. Ano ma verse aapwandikisha Eyi dy’Efile Mukulu na lumweno lwatudi balombene kwimona atwe banabene mu mushindo awitumonaa Yehowa. Nabangile kwiyipusha su mushindo wanemonaa ami nabene ngwilekene na abimonaa Yehowa. Kumpala, nadi mukatushe bino binangu. Natungunukile na kunangushena’shi kuteka Yehowa bwa’shi anfule nkumuteka mwanda ukile bukopo.

Kunyima kwa mafuku apeela, nabadikile verse badi mushintuule nshalelo ande. Uno verse nyi Yeeshaya 1:18, mwi mayi a Yehowa aakula’shi: “Fikayi twisambe. . . . Su milwisho yeenu ii pididi bu [nkula], aifiki itooka selele bu mulemba wa kasàngu.” Napushishe nka bu Yehowa badi esamba nami na kundungula’shi: ‘Vicky, fika twisambe. Nakuuku, nauku bi milwisho yobe, nauku bi eshimba dyobe​—na dingi ne mukufule.”

Ntshinadi mumone tulo bwabwa bufuku. Nadi nka napele’shi Yehowa ta munfule, anka nabangile kunangushena pa mulambu wa nkuulo wa Yesu. Myanda yoso ibadi ishintulukye, naukile’shi Yehowa mmundeshe lwishinko munda mwa mafuku ebungi, na mundeshe kifulo kyaye mu mishindo ibungi. Anka nekalanga nka bu’mi amulungula’shi: ‘Kifulo kyobe nkipeela ta nkilombene kufika kwandi. Mulambu wa Mwan’obe ngupeela ta ngulombene kumbwikila nya.’ Nadi nka bu’mi kwete kwalwisha Yehowa mulambu waye. Anka, ku nfudilo a byoso, pa’mi kunangushena ku kino kya buntu kya nkuulo, ne mubangye kupusha bi kifulo kya Yehowa.

MILOO YANDI MUPETE:

Binobino tandi na nshalelo ebuwa na a muloo. Nshalelo a mu dibaka diande mmulumbulukie ngofu, na ne na muloo wa kufubisha mianda yandi mufumankane nayo bua kukuasha bangi bantu. Nemufikie mukuipusha pepi na Yehowa ngofu.

“Luno lubaadi lualulo lua ku luteko luande.”​—SERGEY BOTANKIN

• MUTANDIKUE MU: 1974

• EUMBO DIABO: RUSSIE

• Baadi: MUFULE MIZIKE YABETANYINA BU HEAVY-METAL

BINAADI KALA:

Nadi mutandikue mu Votkinsk, mu kibundi kibaabatandile ungi muntu baadi afundu misambo muende nkumo, abetanyina bu Pyotr Ilich Tchaikovsky. Mu kifuko kietu tubaadi balanda. Papa baadi na ngikashi ibungi ibuwa, anka baadi akolua maalua, nyi buakinyi ku nshibo kubaadi’nka bilumbu misango ibungi.

Ntshinadi na binangu bibungi mu kalasa nya, na pabaadi bipua abiende na kukila nambangile kumona’shi bangi mbankile mu mianda yoso. Nambangile kusuka bantu na kuibelela binangu bibubi. Kuenda mu kalasa takubaadi akuntshinyisha ngofu. Bu kileshesho, su babaantekie bua kuisamba kumpala kua bantu, ntshinadi nobesha bua kuisamba sunga mianda ibofule inaadi mulombene kuisamba ingi mbalo nya. Panadi mupudishe kalasa ka kananka ka primere, babafundile ku bulletin biande’shi: “Toobesha kuakula na kupatula bi binangu biaye.” Ano mayi abaadi antape kuishimba ngofu a anyisha kuntukula mu kuipusha bu shina muulo. Nambangile kuiyipusha bua kuuka kepatshila ka muwa wande.

Pambandi nsongua, nambangile kutoma maalua. Ku mbangilo, kutoma kubaadi akukitshi bia’shi nepushe bibuwa. Anka panambangile kutoma maalua ebungi, kondo kande k’eshimba kabaadi akankalakasha. Nambangile kumona’shi muwa wande tawi na muulo. Dingi, binangu bibabangile kunkalakasha ngofu, na ingi nsaa naadi nakitshi mafuku kushi kutuka paasha. Nambangile kuela binangu bia kuiyipaa.

Panankumbeshe bipua 20, kui muanda upia ubaadi unyingishe bua kapindi kapela. Nanfikile mu kutundula mizike yabetanyina bu heavy-metal. Yaya mizike ibaadi impe bukome na ami nkukimba bangi bantu babaadi abeyitemesha. Nadi mukushe nyene ila, netubusha matui, na nadi nafuala bu bantu abayimba yaya mizike banadi mufule. Ku kapelakapela nanfikile na bukielo na ntshi naadi natshinyi kintu, na misango ibungi nadi nekakena na bakuetu.

Nadi munangushene’shi kutemesha mizike ya heavy-metal akumpa muloo, anka tabibaadi biabia nya. Nadi nende’nka na kuluila! Kadi panadi mupushe mianda ibubi ibaadi bantu abayimba yaya mizike banadi mufule abakitshi, bibaadi bimbofushe ngofu.

Nambangile dingi kuela binangu bia kuiyipaa, na uno musango bibaadi bukopo. Kadi muanda ubaadi aunkutshisha bua kuiyipaa mpanadi nele binangu pabitale bibaadi mama mulombene kuinyongola. Baadi munfule ngofu, na baadi munkitshine mianda ibungi. Wawa muanda ubaadi aunkalakasha bikile. Tankuminanga dingi kuikala na muwa nya, anka ntshi nadi bia kuiyipaa.

Bua kukisha nsaa, nambangile kubadika mikanda ya mu ludimi lua Russe. Ungi muisambo unandi mubadikie ubaadi wa ungi muntu baadi afubu mu kipuilo. Musango umune ami nkupeta lukalo lua kufubila Efile Mukulu na kukuasha bangi bantu. Ami nkuteka Efile Mukulu n’eshimba diande dioso, muanda wanshibadi mubande kukita kashaa. Nantekiele Efile Mukulu bua’shi andeshe bia kuikala na nshalelo ebuwa. Panadi nantekie, napushishe bibuwa ngofu. Kintu kibaadi kikambe kunkanyisha mmuanda ubaadi ukitshikie kunyima. Penda kunyima kua nguba ibidi, Temue a Yehowa bokookiele ku kiibi kiande, aye nkunteka bua kulonga Bible. Namuene’shi luno lubaadi lualulo ku luteko luande. Dino dibaadi efuku dia kumpala dibabangile nshalelo ande mupia a muloo.

MUSHINDO UBAADI BIBLE MUALUULE NSHALELO ANDE:

Sunga biekala’shi bibaadi bukopo, nadi musumbule bintu bioso binandi nabio bibaadi mu kuipushena na mizike ya heavy-metal. Anka, yaya mizike yabashidile mu binangu biande munda a mafuku ebungi. Nsaa yoso inadi nanfiki mbalo yabayimbi yaya mizike, nadi nantentekiesha mianda yande ya kala musango umune. Ntshi naadi nankumina kusanga yaya mianda ya kala na mianda ipia ibuwa ibaadi ayituele mu binangu na muishimba diande nya. Biabia, ami nkupela kukidila mu ma mbalo ebiabia. Na su nadi nantentekiesha nshalelo ande a kala, nadi nasambila ngofu. Kukita biabia akunkuasha bua kupeta “kufukama kw’Efile Mukulu, kwakwa kusubukile kiwukilo kioso.”​—Bena-Fidipe 4:7, Kilombeno kipya 2014.

Mu kulonga kuande kua Bible namuene’shi bena Kidishitu be na muiya wa kulungula bangi pabitale lukumino luabo. (Mateo 28:19, 20) Nadi mushinkamishe’shi ntshi mulombene kukita biabia nya. Kadi yaya mianda ipia inadi nandongo ibaadi impe muloo ukata na butaale bua muishimba. Nandi nauku’shi bangi namu be na lukalo lua kulonga yaya mianda ya binyibinyi. Sunga mbiangikalanga na moo, nambangile kulungula bangi mianda inandi nandongo. Muanda ubaadi unkanyishe ngua’shi, kulungula bangi mianda ya mu Bible kubaadi kunkuashe bua kuiyata na muulo. Kubaaadi dingi kukite bia’shi aa malongiesha apia ashale muishimba diande’mi nabene.

MILOO YANDI MUPETE:

Lelo uno ne na muloo wibungi mu dibaka diande, na nemukuashe bantu bebungi bua kuuka bia binyibinyi bia mu Bible, mpa nka na mama na muinande mukashi. Kufubila Efile Mukulu na kukuasha bangi bua’shi bamuukie, nkukite bia’shi nshalelo ande ekale na kepatshila.