Ntondo—Ngipalakane mu nsenga ishima

JONATHAN ungi nsongwalume a mu Corée mutandikwe mu Amerique pabaadi kii mwana mukinga tababaadi abamwata na muulo pa mwanda w’ekoba dyaye. Bu bibaadi kwete kukula, bakimbile mbalo yadi mulombeene nkashala yabasha kumwelela binangu bi bubi pabitale ekoba dyaye sunga mpala yaaye. Aye nkwenda mu kufuba bu doktere mu kibundji ki kunundu kwa Alaska mu États-Unis; mwamwa, baadi amweka bu mwifwaneene na baasha maladi bebungi. Baadi akulupila shi pangi kwakwa takwi wawa mwanda wa ntondo nya, anka ntondo ibakapetele kwanka tamwiyobeshe nya, ngikile ya kwakwa kubaadi mufikye.

Lukulupilo lubaadi nalo lubaadi lulwile nsaa ibaadi mubukye ungi mwana mukashi e na bipwa 25. Bu bibaadi yawa mwana mukashi mmukambilwe ngofu, nsaa ibabulwile meeso batadile Jonathan ndjo’ye nkumwakula bishima bi bubi abilesha mushikwa ubaadi mwishimba dyaye pabitale beena Corée. Bwa Jonathan, uno mwanda ubaadi umukalakashe ngofu na ubaadi umutentekyeshe shi, sunga mbibaadi mwitatshishe bwa nkashaala yaaya mbalo yabasha kukamba kumutundula, ta nkumukwashe bwa kusuuka yaaya ntondo nya.

Uno mwanda wa Jonathan awulesha binyibinyi shi ntondo i mu nsenga ishima. Abimweneka shi ntondo i mbalo yooso i bantu.

Sunga ntondo ngipalakane mbalo yooso, bantu bebungi bakwete kwiyitopeka. Uno mmwanda wa kukanya. Mmushindo kinyi ulombeene kupalakana uno mwanda wabadi bashikwe byabya? Bantu bebungi bashikwe ntondo tabobesha kutundula shi abo banabeene be nayo. Uno mwanda ngukutale su? Omono uno mwanda naminyi?

MMWANDA UTALE MUNTU OOSO

Bi bukopo bwa tudya kutundula shi twi na ntondo mwishimba dyetu sunga twekala bashinguule shi ntondo ibubi. Bible apatuula bwakinyi bi byabya nsaa yakula shi: “Ta kwi kikile eshimba dya muntu bulamalama.” (Yeelemiya 17:9, EEM) Byabya, twi balombeene kwidimba nsaa yatwamba shi twibakumiine bantu booso. Sunga kwibingisha shi twi na kya kwelela bantu ba kingi kisamba binangu bi bubi pa mwanda wa myanda kampanda.

Tubande kwata kileshesho akilesha shi bi bukopo bwatudya kutundula ntondo ifwame mwishimba: Okwete kutambuka bupenka bufuku; bomono bansongwalume babidi boshy’ouku bakwete kufika kumpala koobe. Abamweneka balume ba bipambe, umune a kwabadi amweneka bu mukwate kintu ku masa.

We mulombeene kupwandikisha shi bano bansongwalume abakyeba nkukita kintu ki bubi su? Eyendo, myanda itobomwene kala ngilombeene kulesha shi abitungu odimukye, kadi yaaya myanda ayishinkamisha binyibinyi shi bano bansongwalume babidi bebubi su? Lwalulo loobe ku luno lukonko ndulombeene kulesha bi mwishimba dyoobe. Ndulombeene kulesha shi, mu ungi mushindo toboodi mutapikye kwishimba pa mwanda wa ntondo.

Su atutundula bilubilo byetu, abitungu tushinguule shi, ingi nsaa atukitaa myanda ayilesha shi twi na ntondo. Mpa na Bible ashinguula shi kwi mishindo ilekeene ya ntondo nsaa yakula shi: “Bantu abamonâ anka penda bi ku meso kwâbo.” (1 Samwele 16:7, EEM) Bu byabidi shi bino abitufwilaa atwe booso—na kwitutwadila masaku efuku dyooso—twi balombeene kukulupila shi kwi efuku dyatukakatusha ntondo mu mashimba etu su? Na shi kwi efuku adikapu ntondo pa nsenga?