Lulangwilo lwa mu kifuko—Mushindo kinyi wa kukita bwashi lwinupe muloo?

Nshe bana umune mu Brésil amba shi: “Mu Lulangwilo lwetu lwa mu kifuko, su tubabanga kwisamba atutungunukaa na miisambo mpa na abikidi nsaa bufuku su ntshi mwibatshibe mwisambo.” Ungi nshe bana amba shi mwana aaye mulume sha bipwa ekumi tatalaa sunga bungi bwa nsaa yabakitshi mu lulangwilo na akumiina nka’shi batungunukye. Bwakinyi? Amba shi: “Myanda ayimukuma kwishimba ngofu, na byabya abimupeyaa muloo.”

Eyendo shi, ta mbana booso abekalaa na muloo mu lulangwilo lwa mu kifuko, bangi tabakambaa kwilukumiina nya. Bwakinyi talwibapeyaa muloo? Nshe bana umune mu Togo batushile bino binangu: “Lulangwilo lwa Yehowa ta ndulombeene kwikala epampa nya.” Su bi byabya, bi kwikala shi mpa mwanda wa mushindo ukwete kukunkushibwa lulangwilo lwa mu kifuko su? Bifuko bibungi mbimone shi lulangwilo lwa mu kifuko ndulombeene kwikala, nka bu bibambile Yeeshaya pabitale Sabato, efuku dya “muloo.”​—Yesh. 58:13, 14.

Ba nshe bana beena Kidishitu mbamone shi bwashi bifuko byabo bikale na muloo mu lulangwilo lwa mu kifuko, abitungu shi lukitshikye mu mushindo ukumbeene kukwasha bwashi muntu su ngumune tekalanga na moo sunga epampa. Ralf, e na bana basatu bakashi na mwana mulume umune, amba shi lulangwilo lwa mu kifuko lwi bu mwisambo wa kwifuku n’efuku, kushi bu kulonga; muntu ooso esamba. Oolo, kukita bwashi muntu ooso asangale na atwele mu myanda yanulongo ta nkubofule ingi nsaa nya. Nyina bana umune amba shi: “Ntankambaa kobesha kukita bwashi lulangwilo lwa mu kifuko lwitusankishe mu mushindo wankumiina.” We mukumbeene kobesha su?

KUPUSHISHA BANGI NA KUKITA MYANDA ILEKEENELEKEENE

Nshe bana babidi mu Allemagne amba shi: “Abitungu kupushisha bangi.” Natalia, nyina bana babidi amba shi: “Kintu ki na muulo bwa kifuko kyetu, nyi nkushintuula kwa myanda ya kukita.” Bifuko bibungi mbyabuule lulangwilo lwabo lwa mu kifuko mu bipindji bibungi. Cleiton, nshe bana babidi mu Brésil amba shi: “Byabya abikwasha bwashi lulangwilo lwa mu kifuko talwikalanga epampa na bwashi muntu ooso ekale na kya kukita.” Pa’bo kwabuula nsaa ya kulonga mu bipindji bibungi, baledi mbakumbeene kutaluula nkalo ya mwana ooso su kwi bana be na bipwa bilekeenelekeene. Baledi mbalombeene kutaluula nkalo ya mwina kifuko ooso na kwibapushisha pabitale myanda ya kulonga na mushindo wa kwiyisambila.

Bingi bifuko bikwete kukita kinyi bwashi bekale abakitshi myanda ilekeenelekeene? Bangi ababangaa lulangwilo lwa mu kifuko na ngono bwa kutumbisha Yehowa. Juan mu Mexique amba shi: “Bino abikwasha bwa kulumbuula binangu bwa myanda yatukyebe kulonga.” Kifuko kyaye akisangula ngono ipushene na ingi myanda yabakyebe kulonga kyakya kyolwa.

Bingi bifuko bibungi abibadikaa kipindji kya Bible pamune. Bwa kukita myanda ilekeenelekeene, bangi beena kifuko ababadika mayi a bantu belekeene be mu kyakya kipindji akibadikibwa. Nshe bana umune mu Japon amba shi bwaye’ye bibaadi abimweneka “nka bingi namu bwa kubadika mu wawa mushindo.” Kadi bana baaye babidi abaadi na muloo wa kumona shi baledi baabo bakwete kubadika pamune na’bo. Bingi bifuko abikituulaa myanda yababadika mu Bible bu teyatre. Roger, she bana balume babidi mu Afrique du Sud amba shi: “Misango ibungi bana abamonaa bintu bi mu miisambo ya mu Bible yatushy’abobeshaa atwe bebatande.”

Ungi mushindo wa kukita myanda ilekeenelekeene nyi kutumika pamune bwa kukita kintu kampanda, bu kileshesho kusola sunga kukita bwato bwa Nowa sunga ntempelo a Salomone. Bwa kukita myanda i byabya abitungu kwata nsaa ya kukimbuula mu mikanda; bino byooso bi muloo wi kasha! Bu kileshesho, mu nshibo ya kushaleela ya kifuko kimune mu Asie mubaadi kana kakashi ke na bipwa bitano na baledi baako na nyina kulu. Abaadi abakitshi maasha a kulonga bintu pabitale nyendo ya Mpoolo mutumibwa. Mu bingi bifuko abakitaa maasha a kulonga bintu aalesha myanda i mu mukanda wa Efilu. Donald, e na bipwa 19 mu Togo bambile shi kukita myanda ilekeenelekeene “akutweshaa ungi muloo mu lulangwilo lwa mu kifuko mpa na mu kifuko akyo kinabeene.” We kwela binangu pabitale kintu kampanda kyanudi balombeene kusola sunga kwibaka bwashi lulangwilo lwa mu kifuko lwikale alwinupa muloo?

ABITUNGU KWILUMBUULA

Sunga byekala shi kupushisha bangi na kukitanga kwa myanda ilekeenelekeene nkulombeene kukita bwa kusankila lulangwilo lwa mu kifuko, bwashi lwikale na malongyesha ebungi, abitungu shi bantu booso belumbuule. Bangi bana abakookaa, byabya ba nshe bana be na kya kwela binangu kalolo kumpala bwa kusangula myanda ayitungu kulonga na kwilumbuula kalolo. Nshe bana umune amba shi: “Pandi mwilumbuule, muntu ooso alongaa kalolo.” Nshe bana umune mu Allemagne alungulaa kifuko kyaaye kumpala myanda yabakyebe kulonga mbingo ayifiki. Su basangula bwashi batale DVD a myanda ya mu Bible mu lulangwilo lwabo lwa mu kifuko, nshe bana umune e na bana basamombo bakinga mu Bénin alumbuulaa nkonko kumpala. Byabya, kwilumbuula akulongamishaa mushindo aukitshikaa lulangwilo lwa mu kifuko.

Nsaa i kifuko akiuku kumpala myanda yabakyebe kulonga, mbalombeene kwikala abeyisambila munda mwa lubingo, byabya abekala na muloo wa kwibilonga. Na su muntu ooso e na mudimo wa kukita, akyebe kumona shi nyi ndulangwilo lwaaye lwa mu kifuko.

ETATSHISHEYI BWA KWILUKITA LUBINGO LOOSO

Bwa bifuko bibungi, ta mbibofule kukita lulangwilo lwa mu kifuko lubingo looso nya.

Ba nshe bana bebungi abatumika ngofu bwa kupeta ekuta dya kudisha kifuko. Bu kileshesho, nshe bana umune mu Mexique akatukaa ku nshibo mu nsaa a kasamombo ku nakashika na kwalukiila nka bufuku mu nsaa ya mwanda. Ingi misango, abitungu kushintuula nsaa ya Lulangwilo lwa mu kifuko su kwi ingi myanda ya mu kikudi ayitungu kukita lwalwa lubingo.

Sunga mbyabya, abitungu twate kitshibilo kya kwikala atukitshi lulangwilo lwa mu kifuko lubingo looso. Loïs, nsongwakashi a mu Togo e na bipwa ekumi na kimune amba bino pabitale kitshibilo kya kifuko kyabo: “Sunga byekala shi ingi misango atubanga lulangwilo lwetu lwa mu kifuko nsaa ikile su kubakitshika mwanda kampanda dyadya efuku, tatukishaa dyadya efuku nya.” Pangi nyi bwakinyi bingi bifuko mbikite programe a kukita lulangwilo lwa mu kifuko ku mbangilo kwa lubingo. Su kubakitshika mwanda kampanda awibakutshisha, mbalombeene kusangula dingi efuku ku nfudiilo kwa lubingo.

Anka abilesha eshina dyalo, “lulangwilo lwa mu kifuko” nyi nkipindji kya lulangwilo lwenu lwa Yehowa. Bantu booso ba mu kifuko kyenu balambule Yehowa ‘bishima bya mukanwa mwabo pa mbalo ya ngombe’ ku lubingo looso. (Os. 14:2) Ino nsaa ya lulangwilo ikale nsaa ya muloo bwa mwina kifuko ooso, “mwanda muloo wa Yehowa nyi bwenu bukome.”​—Ne. 8:9, 10.