MIISAMBO YA MBANGILO | WE MULOMBENE KWIKALA PEPI N’EFILE MUKULU
Okwete kwipusha pepi n’Efile Mukulu su?
“Kwikala pepi n’Efile Mukulu akukulama, akukupa muloo na nshalelo ebuwa. Bi nka bu’shi Efile Mukulu kwete kukita mwaye mooso bwa nkwikasha biya.”—CHRISTOPHE NSONGWALUME A MU GHANA.
“Efile Mukulu kwete kumona mpombo yoobe yooso, na nkulesha kifulo na kwitatshisha boobe mu mushindo oshw’elela pangi binangu.”—HANNAH NSONGWAKASHI A MU ALASKA, ÉTATS-UNIS, E NA BIPWA 13.
“Kwikala mu kipwano n’Efile Mukulu akukupa kufukama kwishimba mwanda kwi na muloo ukata!”—GINA MWANA MUKASHI A MU JAMAÏQUE, E NA BIPWA 45.
Ta nkapenda Christophe, Hannah na Gina bakwete kupusha byabya nya. Bantu bebungi be mu nsenga ishima abashinkamisha shi Efile Mukulu kwete kwibaata bu bakuuku baye. Kadi obe namu? Wepushaa pepi n’Efile Mukulu su? Sunga shi, okumiinaa kwikala pepi menemene naye su? Pangi okwete kwiyipusha shi: ‘Muntu bu’mi ne mulombene namu kwikala pepi n’Efile Mukulu Sha bukome booso? Su bi byabya, bi kukitshika naminyi?’
WE MULOMBENE KWIKALA PEPI N’EFILE MUKULU
Muyile abilongyesha Bible, mbibofule menemene bwa muntu kwikala mu kipwano n’Efile Mukulu. Bible amba shi Efile Mukulu baadi mwitanyine Abrahame shi: “Kuukw’ande.” (Yeeshaya 41:8) Banda kutala dingi luno lwitamino lwi mu mukanda wa Jaake 4:8: “Efubwileyi kwi Efile Mukulu, byabya aye namu efubwila pepi neenu.” Bibamweka kalolo shi kipwano—sunga bukuku n’Efile Mukulu—mmwanda ubofule. Kadi bu bikale shi Efile Mukulu taamwekaa, mmushindo kinyi wa “kwifubwila” kwadi na kudya naye bukuuku?
Bwa kwaluula lwalwa lukonko, tubande kutala abifikaa bantu babidi mu kwikala bakuuku. Ababangaa na kwipusha eshina dya muntu. Ndjo baate kyubishi kya kwisamba, kwipeshena binangu na pabakitshi byabya, bukuuku bwabo abutama. Na pabaata mpàngo ya kwikitshishena myanda ibuwa, abanyingisha kipwano. Bi pamune na kwikala bukuuku n’Efile Mukulu. Tubande kumona mushindo wabidi bilombene kukitshika.