Midimo i bukopo​—Tayikii dingi na muulo su?

Nka bu Alex, bantu bebungi lelo uno tabakwete kusankila midimo i bukopo nya. Aaron ungi muntu alumbulaa myootoka amba shi: “Bantu bebungi abapwandikisha shi kutumika midimo ya ‘maasa’ nkwibayisha milongo.” “Mu binangu mwabo abeamba shi: ‘Nkwete kutumika bino pankya ntengyela mudimo wibuwa.’”

Bwakinyi bantu bebungi abamono shi midimo ibukopo ta ngibalombeene? Pangi abalondo myanda yabamono ku television, kwabamono misusa ibungi abalesha shi nshalelo ebuwa ngyawa e na bintu bibugi shi na nkalakasho. Matthew alumbulaa bintu amba shi: “Bantu abapwandikisha shi su otumika ngofu bwa kulongamisha nshalelo, twe mukumbene kobesha nya.” Shane ungi nsaamo a ku nshibo baadi mushinkamishe n’aye ano mayi. Amba shi: “Mufubo wa kwifuku bwa kupeta efuto dya kwifuku nyi mmwanda wabash’abakuminaa dingi kukita kwi bantu.”

Ku lungi lupese, abimweneka shi bantu bebungi balumbuule nshalelo abasangelaa midimo ibukopo. Daniel ungi nsongwalume e na bipwa 25 afubaa mudimo wa kwibaka mashibo akula shi: “Namono shi mifubo ibukopo ayipetesha efuto dikaamine, bikishekishe su ofubu nadyo bwa kulombasha bitshibilo bibuwa.” Andre e na bipwa 23 ashinkamisha shi: “Nakumina shi, bwa kupeta muloo na disanka abitungu kufuba midimo ibukopo. Kukita midimo ipeelepeele, takutwadilaa muntu muloo wa mafuku e bungi nya​—kadi akumutwadila nkalakasho!”

Nkinyi kikwashe bantu bebungi bwa kupeta mweneno ebuwa a midimo ibukopo bu Daniel na Andre? Mwanda mbatumikile mayi a kulonda a mu Bible mu nshalelo aabo. Pamutwe pa kubepuula midimo ibukopo, Bible akankamika bantu bwa kwikala na katshintshi na kishima ku mudimo. Anka Bible tetulungula nka penda bwa kufuba nya. Etulesha dingi byatudya kusangeela mudimo wetu.

Mmayi a kulonda kinyi a mu Bible alombeene nkukwasha bwa kupeta muloo mu mudimo oobe? Atukutekye bwa kutala amune a ku anka, abadi baleshe mu mwisambo aulondo.