MIISAMBO YA MBANGILO BATEMWE BA YEHOWA MBANTU KINYI?
Makuta a kufubisha midimo yeetu aafikaa kunyi?
Kipwa kyooso, atutushaa na kwabila ma Bible na ingi mikanda ayisambila Bible midiyo nkama. Atwibaka na kufubisha ma biro a ma filiale na byamo abituusha mikanda mu nsenga ishima. Tukongye binunu makumi atwibungaa mu ma mbalo a lulangwilo alombane na ebuwa abetanyinaa bu Mashibo a Bufumu. Nnanyi atuushaa makuta bwa kukitshisha bino byooso?
Midimo yeetu yooso ayikitshikaa ku bukwashi bwa bya buntu. (2 Beena-Kodinto 9:7) Mu 1879, nimero a kabidi a uno jurnale bakwile’shi: “Atushinkamisha’shi ‘Kitenta kya Mulami a Siyoona’ [bibaabadi abetanyina uno jurnale kala] kikwete kupeta bukwashi bwa YEHOWA, na bu byabidi byabya, t’akikyebe kuteka sunga kusendeela muntu bwa’shi ekikwashe na makuta nya.” Na binobino tatwi bashintuule ano mayi eetu nya.
Bya buntu abitumibwaa ku bimune bya ku biro byeetu bya filiale sunga kwibyeela mu kasheete ka bya buntu ke mu Mashibo a Bufumu. Anka tatutekaa ky’ekumi, kwelesha lupungo, sunga kuteka makuta bwa midimo sunga mikanda yeetu nya. Tabetufutaa bwa kwenda mu bulungudi, bwa kulongyesha mu kakongye, sunga bwa kufuba mu lwibako lwa mashibo a lulangwilo nya. Mwanda Yesu bambile’shi: “Nwibapete buntu byaabya paanaayi buntu.” (Mateo 10:8) Bantu booso abafubu ku ma biro eetu a filiale na ku biro byeetu bikata bya nsenga ishima, mpa na baaba be mu Kasaka ka Bakunkushi-Bakulu ka Batemwe ba Yehowa, nyi mbakwetu bash’abapetaa efuto be mu kisaka kya bafubi ba nsaa yooso.
“Nka bu byabidi bwa midimo yooso ya Batemwe ba Yehowa, midimo ya lulangwilo ayikitshikaa ku bukwashi bwa bya buntu, ooso a kwabadi e na bungi bwadi mutshibe aye nabeene bwa kutushanga bwa kukwatshisheena midimo ya lulangwilo.” Cour européenne des droits de l’homme 2011
Makuta aatuuku ku bya buntu atufubaa nao dingi bwa kukwasha bantu abapete masaku. Beena Kidishitu ba kumpala babaadi na muloo wa kukwasha bantu be mu dikyenga. (Beena-Looma 15:26) Mu mushindo umune atukwashaa bakwetu abapete masaku pa kwibakuula mashibo aabo na mashibo a lulangwilo na kwibapa byakudya, bilamba, na manga.