MIISAMBO YA MBANGILO | BWAKINYI ABITUNGU KWIKALA NA KULULAMA?
Kukutwa kwa kululama nkukutale naminyi?
“Akwikalaa ingi myanda ilombeene kupwa’nka na kukutwa kwa kululama kupeela.”—Samantha, a mu Afrique du Sud.
Okumiina abyakula Samantha su? Nka bu’ye, atwe booso atufumankanaa na myanda ibukopo ingi nsaa. Mushindo watukimbaa bya kupudisha myanda ayitutakula mu kukutwa kululama ngulombeene kuleesha bi mwikeelo wetu. Bu kileshesho, su atukuminaa kudimba bwa kupela kukwatshika buufu, twi kumona kukutwa kululama bu kwi na muulo. Apakauku bangi bya binyibinyi, yaaya nsaa kukutwa kwa kululama akutuusha bipeta bibubi. Tubande kutala ino myanda ayilondo.
KUKUTWA KULULAMA AKULWISHA LUKULUPILO
Bantu bekulupisheene abanyingishaa kipwano kyabo. Mwanda, pabadi bekulupisheene, abepusha mu bulungantu na kwiyikeela. Anka bantu tababangaa kwikulupisheena nka musango umune nya. Kwikulupisheena akutama pabakisha nsaa ibungi pamune, abelungusheena myanda ya binyibinyi na kwituula pa mbalo ya bangi. Kadi, lukulupilo lwi kushimina penda bwa kikitshiino kimune kya kukutwa kululama. Na dingi nsaa ayishimina lukulupilo, bi bukopo bwa kwilwalusha dingi.
Tababapwile nkukitshiina mwanda wibubi kwi muntu oboodi omono bu kuuku e buwa? Su bi byabya, bopushile naminyi? Abimweneka’shi bibaadi bikutape kwishimba. Kushi mpaka, kukutwa kwa kululama kwi kulwisha kipwano kikata.
KUKUTWA KULULAMA KWI LWAMBU
Robert Innes mulongyeshi a myanda ya makuta ku kilongyelo kikata kya mu Californie bapetele’shi, “kukutwa kululama akwambukishenaa.” Kukutwa kululama kwi’nka bu keeshi ka lwambu, mwanda su we na muntu shii mululame, kwi masaku akata bwadya “kukwambukisha” namu kukutwa kwa kululama.
We kusuuka kupona mu muteo wa kukutwa kululama naminyi? Bible mmulombeene nkukwasha. Banda kutala ano mayi a kulonda a mu Bible.