We kulesha lutumbu bwa kya buntu kikata ky’Efile Mukulu mushindo kinyi?

KYA buntu ki na muulo ukata nkilombene kwitutakula mu kwikala na lutumbu. Yesu bashimikile kasele pa dino dilongyesha nsaa ibapashishe bantu ekumi abaadi na mukumbo ushibaadi na bwanga mu aa mafuku. Umune a ku bano bantu ekumi “beealwishe kwadi afwatumbishanga Efile Mukulu n’eyi di bukopo.” Yesu bakwile’shi: “Booso ekumi ntambapande su? A bangi kitema be kunyi?” (Luka 17:12-17) Ndilongyesha kinyi dyatupete? Abitulesha mushindo w’atwilwankanaa kalolo kabadi betukitshine kwi bangi bantu!

Nkuulo nkya buntu kishii bya kupwandjikisha na kingi kintu. Nkilekeene na bya buntu byooso byatudi bapete. Mushindo kinyi, na kinyi kyoodi mulombene kukita pabitale byoso byabadi bakukitshine kwi Efile Mukulu?

• Kimba bya kuuka yawa mwitupe kyanka. Nkuulo tangitwale bantu booso ku muwa wa ikalayika nka bisumanga nya. Anka, Yesu batekyele nshaye’shi: “Muuwa wa looso naamu ngi’shi bantu bakuwukye, obe buupenka Efile a binyibinyi, na yaawa abootumine, Yesu Kidishitu.” (Yowano 17:3) Su bakulungula’shi kwi muntu baadi mupashe muwa oobe pabodi oki mwana mukinga, tokukimba bya kumwiuka, kulonga bibungi pa bimutale, na kuuka bwakinyi baadi mukupashe su? Bikale’shi Yehowa Efile Mukulu batushishe Mwan’aye bwadya kwitupasha kukiila ku nkuulo, tokumina nka penda kumuuka nya, kadi okumina kwikala naye mu kipwano. Bible amba’shi: “Efubwileyi kwi Efile Mukulu, byabya aye namu efubwila peepi neenu.”​—Shake 4:8.

• 

  Ikala na lukumiino mu mulambu wa nkuulo. “Akumiina Mwana ee na muuwa wa iikalaika.” (Yowano 3:36) Kwikala na lukumiino akupushisha kinyi? Akupushisha kulesha bikitshino; kulesha lukummiino mu nkuulo ku bikitshino. (Shake 2:17) Bikitshino bya mushindo kinyi? Bwa’shi kya buntu kikale kyobe, abitungu wekitambule na kwikikumina. Ngi bwakinyi abitungu otambule na kukumina mulambu wa nkuulo. Mushindo kinyi? Longa bwa kuuka nshalelo akumina Efile Mukulu, na kutumikila myanda yolongo.a Teka Efile Mukulu bwa’shi akufwile lusa na kukupa kondo k’eshimba katookye. Efubwile kwi Efile Mukulu na lukulupilo lwa’shi, ku bukwashi bwa nkuulo okapete muloo wa loso, bulungantu, na kufukama bwa booso abalesha lukumino mwadi!​—Beena-Ebelu 11:1.

• 

  Twela mu Kitentekyesho kya lufu lwa Yesu. Yesu babangile kukita mwanda ukata aukitshikaa dimune ku kipwa bwatudya kutentekyeshanga kutushibwa kwa nkuulo. Pabitale kino kitentekyesho, bambile’shi: “Ikalai anukitshi bino mwanda a kuntentekyeshanga.” (Luka 22:19, EEM) Ba Temwe ba Yehowa abakitshi kino Kitentekyesho kya lufu lwa Yesu mu dya Kabidi, 11/4/2017, kunyima kwa nguba batwele. Mu uno programe akitshi penda nsaa umune, abakakitshi mwisambo auleesha akipushisha lufu lwa Yesu na kipaso kyalwitutwadila myabi kubanga binobino na mu mafuku aafiki. Mu kipwa kishale, bantu midiyo 20 mbatwele mu kino Kitentekyesho mu nsenga ishima. Atukwitanyina bodya kwibunga netu pamune bwa kulesha lutumbu ku kino kya buntu kikile bukata kitupe Efile Mukulu.