“Sha-kalolo asampiibwa”

KUBANGA kala, milambu ibadi na muulo ukata mu lulangwilo lwa binyibinyi. Bena Isaleele abadi abatusha milambu ya nyema, na bena Kidishtu namu abaukibwa ngofu bu bantu abatushaa “milambu ayisangasha Efile Mukulu.” Na dingi, kwi ingi milambu ayisangashaa Efile Mukulu ngofu. (Beena-Ebelu 13:15, 16) Ino milambu ayitupetesha muloo na myabi, nka bu byabebilesha mu kino kileshesho akilondo.

Aana, badi mufubi a Efile Mukulu sha lulamato a kala, badi adidi kupeta mwana n’eshimba dyaye dyoso anka, tabadi na mushindo wa kutanda mwana nya. Mu luteko lwaye, badi mutshipe kwi Yehowa’shi su batanda mwana mulume, badi mulombene ‘kumulambula kwi [Yehowa] bwa mafuku ooso a muuwa waye.’ (1 Samwele 1:10, 11) Kunyima kwa mafuku, Aana bapetele eyimi, na aye nkutanda mwana mulume nkumudika eshina bu Samwele. Kunyima kwa Samwele kuleka koomwa, Aana bamutwadile ku tabernakele, balombeshe mutshipo ubadi mukite. Yehowa badi mwelele Aana mwabi bwa binangu byaye bya kwisumina ingi miloo. Badi mupete mwabi wa kutanda bangi bana batano, na Samwele bafikile mutemuki na umune a ku bafundji ba Bible.—1 Samwele 2:21.

Nka bu Aana na Samwele, bena Kidishitu lelo uno be na mwabi wa kulambula muwa wabo mu kufubila Mupangi aabo. Yesu balayile’shi milambu yooso yatutusha bwa kukwatshishena lulangwilo lwa Yehowa ayiketupetesha myabi ibungi.—Maako 10:28-30.

Mu siekele a kumpala, ungi mwana mukashi mwina Kidishitu abetanyina bu Dorkase badi mwende nkumo bwa “myanda ibungi ibuwa na kupesheena bya pa lusa”—badi mwipaane mu kukwasha bangi. Mwanda wa malwa, “bakumbile, aye nkufwa,” na uno mwanda ubadi winyongoshe bena kakongye booso. Balongi pababapushishe’shi Mpyeele e mu mbalo i pepi na kwabadi, abayile musango umune mu nkamwitanyina. Banda kunangushena muloo ubabapushishe nsaa ibafikile Mpyeele abuusha Dorkase ku lufu—uno ngi musango wa kumpala wabadi babushe muntu mufwe kwi batumibwa! (Bikitshino 9:36-41) Efile Mukulu tamuyilwankane milambu na kwipaana kwa Dorkase nya. (Beena-Ebelu 6:10) Mwanda wa kalolo kaaye mbeufunde mpa na mu Eyi dy’Efile Mukulu bwatudya kwambula kileshesho kyaye.

Mu mushindo umune, Mpoolo mutumibwa mmwitulekyele kileshesho kibuwa kya bu muntu badi atusha na kalolo koso nsaa na binangu byaye. Pabadi mufundjile bakwabo ba mu Kodinda, Mpoolo bambile’shi: “Bwande’mi, na muloo ooso, natuusha byooso na kwipaana ami nabeene na bushima bwande pa mwanda wenu.” (2 Beena-Kodinda 12:15) Mpoolo badi mumone aye nabene’shi kwipaana bwa kukwasha bangi takutwala nka penda muloo kwi muntu nya—kadi mwanda wi na muulo ukata—akupetesha dingi muntu myabi ya kwi Yehowa na kukuminyibwa naye.—Bikitshino 20:24, 35.

Abimweneka kalolo’shi, Yehowa apushaa buwa ngofu nsaa yetumono atufubu na nsaa na bukome bwetu bwa kukwatshishena myanda ya Bufumu na kukwasha bakwetu bena kukumina. Kadi, kwi ingi mishindo yatudi balombene kukwatshishena mudimo wa bulungudi bwa mukandu wa Bufumu su? Oolo! Kukatusha kwa kufuba na nsaa na bukome bwetu, twi balombene kutumbisha Efile Mukulu ku bukwashi bwa bya buntu byetu byatwitushila. Bakwete kufuba nabyo bwa kufubisha mudimo wa kulungula mukandu wibuwa mu nsenga ishima, mwanka abakwasha nabyo ba misionere na bangi bafubi ba mudimo wa nsaa yooso wi pa bwao. Kunyima kwa byabya, bakwete kufuba na bya buntu byatutusha bwa kufubisha midimo bu kwalula mikanda na ma video, kukwasha bakwetu bapete masaku, na kwibakisha Mashibo a Bufumu apya. Twikaleyi bashinkamishe’shi: “Sha-kalolo asampiibwa.” Dingi, nsaa yatupa Yehowa bintu byetu bya muulo, atumutumbisha.—Nkindji 3:9; 22:9.

Mishindo Yabatushaa Bya Buntu Bwa Kukwatshishena Mudimo Wa Mu Nsenga Ishima

Nka bu mu mafuku a Mpoolo mutumibwa, bantu bebungi lelo uno bakwete ‘kutula pa lupese byabo bintu,’ sunga makuta, na kwibyeela mu kashete ke mu kakongye kabo kabadi bafunde’shi: “Mudimo wa nsenga ishima.” (1 Beena-Kodinda 16:2) Ku mweshi ooso, tukongye atutumaa bino bya buntu ku biro bya filiale bya ba Temwe ba Yehowa abikunkusha mudimo mu eumbo dyabo. N’obe namu we na mushindo wa kutuma bya buntu byobe musango umune ku biro bya ba Temwe ba Yehowa bi mu eumbo dyodi mushale. Bwa kuuka biro bya ba Temwe bya mu eumbo dyodi mushale, itanyina biro bya filiale. We kupeta adrese mu www.jw.org. Muyile miya ya mu eumbo dyanudi bashale, bya buntu byodi mulombene kutuma mbino:

KUTUSHA BYA BUNTU BYATUDI NABYO

We kutumina ndumbulwilo a ba Temwe ba Yehowa makuta kukidila ku banke, sunga ku bukwashi bwa karte ka ku banke, sunga kutuma chèque. Mu angi ma filiale bino abikitshikaa ku bukwashi bwa jw.org sunga bwa site Internete kampanda.
We kutuusha makuta e ku maboko; na kwela mukanda bwa kulesha’shi ano makuta nyi nkya buntu kibotusha.

BYA BUNTU BIPWE KULUMBUULWA

Kukatusha bya buntu bya makuta, kwi ingi mishindo ya kukwatshishena mudimo wa Bufumu mu nsenga ishima. Mbeyileshe pano. Kumpala kwa kufubisha mushindo kampanda, esambe na biro bya filiale abikunkusha mudimo mu teritware eenu bwa kuuka mushindo wakusangula bwa kutusha bya buntu. Bu byabidi’shi miiya itale bitadi ngilekene, bibuwa kutala muntu auku miiya ya bitadi kalolo kumpala kwa kusangula mushindo wa kutusha makuta.

Makuta a Assurance sunga a pasio: We kutumina ndumbulwilo a ba Temwe ba Yehowa makuta mwishina adiukibwa ku mbulamatadi mu dyadya eumbo bwa’shi aate makuta oobe a Assurance sunga a pasio.

Konte a ku banke: We kufungula konte a banke na kufundjisha’shi ndumbulwilo a ba Temwe mulombene kufubisha makuta muyiile abilesha miiya ya ma banke a mwiumbo dyenu kunyima kwa lufu lobe.

Matalwa a kwata makuta: Muntu mulombene kupa ndumbulwilo a ba Temwe ba Yehowa matalwa a kwata makuta bu kya buntu kyadi nakyo sunga kufunda mukanda aupa ndumbulwilo matalwa a kwata makuta kunyima kwa lufu lwaye.

Kutusha nshibo sunga lupango: Muntu mulombene kutusha nshibo sunga lupango bwa kupa ndumbulwilo a ba Temwe ba Yehowa bu kya buntu, sunga’shi su nshibo yadi mushale, e kushaala mwanka pa kii na muwa su bafu ndumbulwilo e kwikala na matalwa a kwata yanka.

Testama: Muntu mulombene kulekyela ndumbulwilo a ba Temwe ba Yehowa lupango sunga makuta ku bukwashi bwa mukanda aupa ndumbulwilo matalwa wabadi bakumiine ku mbulamatadi aulesha’shi yawa ndumbulwilo e na matalwa a kwata makuta sunga lupango. Yaaya nsaa mbulamatadi mulombeene kwisha muulo wa kitadi kya byabya bintu.

Mwaku “bya buntu bipwe kulumbuulwa,” aulesha’shi bwa kutusha bino bya buntu abitungu’shi muntu ekale mupwe kwibilumbuula kumpala. Mu kufubisha kwa ino mishindo ya kutusha bya buntu, bantu bebungi mbakwatshishene midimo yetu ya lulangwilo na ya kukwasha bantu mu nsenga ishima na kwisha kwa muulo wa bitadi.

Bwa kuuka myanda ibungi, fitshina pa mbalo ifunde shi “Kutusha bya buntu” kunundu kw’esaki dya mu jw.org, sunga kufundjila biro bya filiale.