Bya kunyisha kulongamishana kusankila kwilongyela kobe kwa Bible

YOOSHWA badi mufumankane na mwanda wi bukopo. Badi na kya kukunkusha mwilo wa Isaleele mu Nsenga ya mulayilo, kadi kumpala kwa kutwela mwanka bibadi abitungu’shi akambile nkalakashi i bungi. Yehowa badi mumushinkamishe’shi akobesha, anka, badi mumukankamikye’shi: “Ikala mukankamane, onyingy’eshimba ngofu. Kita muyile Miiya. Wekale obala mukanda wa miiya ngub’oso; wewunangwile kaanya na bufuku bwa’shi obuule meeso bwa kukita muyiile kyooso kimufunde, mwanda paapa mu byobe byoso wekala na mwabi dingi oobesha.”—Yooshwa 1:7, 8.

Mu bino “bipungo biibukopo” mwatudi, natwe namu tukwete kufumankana na nkalakashi. (2 Timote 3:1) Nka bu Yooshwa, twi balombene kwiyikambila su twalonda elango dibabapeele Yooshwa kwi Yehowa. Twi balombene kubadika Bible efuku dyoso, na kwikitshisha bwa kutumikila mayi a kulonda e mwanka ku myanda yatufumankana nayo.

Anka, bebungi ba kwatudi mbalombene kwamba’shi tatulongaa Bible kalolo na’shi kumulonga ta nkwitubofwile . Kadi, bu bikale’shi kulonga kwa Bible mwanda wi na muulo, banda kutala kashibo akamba’shi: “Tompa ano mayele” bwa’shi omone imo myanda ilombene nkukwasha bodya kunyisha kulongamisha na kusankila kulonga kobe kwa Bible.

Mufundji a Misambo bayimbile’shi: “Nkunkushe mwishinda dya mayi oobe, mwanda ngi mwi muloo wande.” (Misambo 119:35) We kupeta myabi ibungi pa kubadika Eyi dy’Efile Mukulu. Kwi mabwe a muulo ebungi odi mulombene kupeta su bwekala obundula mu Eyi dy’Efile Mukulu bwa kupeta mabwe a muulo a mu kikudi.

Sunga byekala’shi twe na bushito bwa kukunkusha mwilo bu bibadi Yooshwa, we na nkalakashi yokwete kufumankana nayo obe nabene. Byabya, nka bu Yooshwa, kulonga kwa Bible na kutumikila myanda yabadi bafunde mwanka nkulombene nkukwasha. Su bokitshi byabya, nobe namu okoobesha na kukita myanda na binangu.

TOMPA ANO MAYELE

Sambila kumpala kwa kubanga kwilongyela. Mu Bible mwi binangu by’Efile Mukulu sha bukome boso byadi mufundjishe bwa’shi bikukwashe. Byabya nsaa yobadika Bible, mutekye bwa’shi akukwashe bodya kwiyipusha, kwiyilamina, na kwiyitumikila mu muwa oobe.—Esela 7:10.
Eyipushe nkonko nsaa yobadika Bible sunga mikanda ayipatuula myanda ya mu Bible. Eyipushe’shi: ‘Uno verse andongyesha kinyi pabitale Yehowa? Akwatshishena myanda ikata i mu Eyi dyaye naminyi? Ne kufuba na binangu bi mwanka bwa kukwasha bangi bantu naminyi?’
Nangushena ku myanda yolongo. Banda kuleka kubadika, onangushene. Eyipushe’shi: ‘Uno mwanda aumpushisha naminyi? Bwakinyi aumpushisha bino? Ngwipushene na myanda yandi mufumankane nayo mu mafuku ashale, yandi nayo binobino, sunga myanda yandi mulombene kufumankana nayo mu mafuku aafiki naminyi? Ne kufubisha ano mayi a kulonda a mu Bible na dino elango mu muwa wande naminyi?’ (Yoobo 23:5; Misambo 49:3) Tala su we mulombene kupatuula bwakinyi Yehowa badi mulangye mwilo waye bwa kupela kukita ingi myanda sunga bipeta bilombene kutuka mu kukita myanda kampanda ilekene.—Miiya Ikituulwe 32:28, 29.
Fubisha ngyelelo oobe a binangu nsaa yobadika ma verse aapatuula mwanda. Bu kileshesho, we mulombene kumona mu binangu mushindo wi bakwabo na Yoosefe abamupana kwi bena Ismaele su? (Kibangilo 37:18-28) Omono, oteemesha na kupusha eshiko dya kinyi? Etuule pa mbalo ya baba bantu. Bakwete kwela binangu kinyi na kupusha naminyi? Kwela binangu mu uno mushindo akukakutakula bwa kumona myanda yobadika bu ya binyibinyi.
Fubisha bintu abitukwasha bwa kwilongyela byabadi betupe bwa kunyisha kukimbuula myanda ibungi mu kwilongyela koobe. Eubidishene na bintu bi mu ludimi lwenu, bi ku Internete na byabadi batushe mu mikanda. Topushanga bukopo bwa kwipusha bangi bantu balombene nkukwasha bwa kuuka mushindo wa kwibifubisha kalolo. Bu kileshesho, mukanda wa Index des publications des Témoins de Jéhovah sunga Mukanda aukwasha ba Temwe ba Yehowa bwa kukimbuula myanda, ngulombene nkukwasha bwa kuuka myanda yabadi bafunde pabitale mitwe ya mwanda ibungi bwa kupatuula na kupeta mishindo yabadi bapatuule ma verse a mu Bible ebungi. Fubisha ma apandise e mu Bible a Les Saintes Écritures. Traduction du monde nouveau e mu ludimi lowuku kalolo. Ino mikanda i na myanda ibungi itale ma mbalo, kwilondena kwa myanda, bukata na bipimino na ingi myanda.
Funda myanda i na muulo mu mukanda sunga ingi mbalo yodi mulombene kutentekyesha bwa kulamina myanda ibokatuka mu kulonga. Ungi mwanda wi buwa ngofu nguno, eyilungule bangi bantu. Bopete mwanda odi mulombene kufubisha mu bulungudi su? Mu uno mushindo, tolamina nka penda myanda ikata nya anka ofubisha dingi myanda ibolongo bwa kukwasha bangi.