Eshina dy’Efile Mukulu nnanyi?

Nsaa yokyebe kuuka muntu, kintu kya kumpala kyokitshi nyi nkumwipusha’shi: “Eshina dyobe nnobe nnanyi?” Su w’epusha Efile Mukulu lwalwa lukonko, mukumbene nkwalula naminyi?

“Nnami Yehowa. Dyaadya ngi eshina dyande.”​—Yeeshaya 42:8.

Dino eshina ndipya su? Pangi ndipya, mwanda bantu bebungi baluule Bible mbafunde eshina dy’Efile Mukulu mu mishindo ilekene. Misusa ibungi pa mbalo yadyo mbafunde mwasu bu “MWANANA.” Aku namu, eshina dy’Efile Mukulu adisanganyibwa mu ludimi lwa kumpala lubabadi bafunde Bible misusa 7 000. Eshina di na maleta ananka a mu kina Ebelu, epushene na YHWH sunga JHVH, dino eshina mbedifunde mu Kisongye bu “Yehowa”.

Eshina dy’Efile Mukulu adisanganyibwa mu bifundwe bya kina Ebelu na mu ma Bible ebungi

BWAKINYI ESHINA DY’EFILE MUKULU DI NA MUULO?

Eshina di na muulo kwi Efile Mukulu nabene. Takwi muntu muudikye Efile Mukulu eshina nya; nnaye nabene mwiudikye. Yehowa bambile’shi: “Dyaadya ngi Eshina dyande bwa looso; byaabya ngi byaabeedidi kwandi kipungo na kipungo.” (Efilu 3:15) Mu Bible, eshina dy’Efile Mukulu adisanganyibwa misusa ibungi kukila ingi myasu yoso bu Sha bukome boso, Yaya, Mwanana, sunga Efile Mukulu na misusa ibungi kukila mashina a bantu bu Abrahame, Moyiise, Daavide, sunga Yesu. Na dingi, Yehowa akumina’shi baukye eshina dyaye. Bible amba’shi: “Bawukye’shi eshina dyoobe mbuu Yehowa, obe buupenka, sha-kwiyilu kula, pa nsenga ishima!”​—Misambo 83:19.

Eshina di na muulo kwi Yesu. Mu luteko lwabetaminaa bu lwa Yaya etu sunga bu luteko lwa Mwanana, Yesu balungwile balondji baaye bwabadya kuteka Efile Mukulu mu ano mayi: “Eshina dyoobe dyende ntumbo.” (Mateo 6:9) Yesu namwinyi batekyele Efile Mukulu’shi: “Yaya, tumbisha eshina dyobe.” (Yowano 12:28) Yesu batudile kutumbisha kw’eshina dy’Efile Mukulu pa mbalo ya kumpala mu muwa waye, nyi bwakinyi bakwile mu luteko’shi: “Nee mwibaukish’eshina dyoobe, nanyiisha kwibaukisha dyanka dimo.”​—Yowano 17:26.

Eshina di na muulo kwi boso abauku Efile Mukulu. Kala mwilo w’Efile Mukulu ubadi aushinguula’shi bulami na kipandjilo kyabo bubadi bwipushene n’eshina dyaaye. “Eshina dya Yehowa nyi èpata dilamibwe kalolo; muntu mululame ee kusuukilaa bwa kupanda.” (Nkindji 18:10) “Ooso eedidi eshina dya Yehowa akeekala mupaashiibwe.” (Bikitshino 2:21) Bible alesha’shi eshina dy’Efile Mukulu adikalesha kwilekena kwi pankatshi pa abamufubila na bash’abamufubila. “Su miilo yooso ayitambuka ooso mwishina dy’efile aawo, atwe, atutambuka mwishina dya Yehowa Efile Mukulu bwa looso.”​—Mika 4:5; Bikitshino 15:14.

AKILESHA ESHINA

Penda eshina nyi adilesha bi Efile Mukulu. Bantu balongye ngofu abamba’shi eshina Yehowa adipatuula’shi: “Afwishaa.” Yehowa Efile Mukulu badi mupatule kalolo akilesha eshina dyaye nsaa ibadi mwakule bwa’ye kwi Moyiise shi: “Nee akeekala.” (Efilu 3:14) Eshina dy’Efile Mukulu adipatula bibungi kushii penda’shi Mmupangi a bintu byoso. Eshina dyaye adilesha mushindo wadi nao wa kwiyikasha aye na bipangwa byaye kyoso kyakumina bwa kulombasha mpàngo yaaye. Sunga myasu ngilombene kulesha mbalo i nayo Efile Mukulu, matalwa, sunga bukome, anka penda eshina dyaye, Yehowa nyi adilesha kyadi na kyadya kwikala.

Eshina adilesha’shi Efile Mukulu etupasukilaa. Eshina dy’Efile Mukulu adipatula kifulo kyaye kikata kwi bipangwa byaye, mwatudi mpa na atwe. Byabya, mwanda Efile Mukulu e na eshina adiukibwa abilesha’shi akumina tumwiukye. Mu byoso, mwate mpàngo ya kwitulungula eshina dyaye mpa na kumpala kwa’shi twidiukye. Efile Mukulu akumina’shi tatwikalanga atumumono bu Efile e kula kadi bu Muntu a binyibinyi atudi balombene kwifubwila pepi naye.​—Misambo 73:28.

Kufubisha eshina dy’Efile Mukulu akulesha’shi twi naye lukalo. Twate kileshesho, we mulombene kulungula kuuku obe bwadya kwikala akwitamina mwishina dyobe. We kupusha naminyi su yawa muntu atungunuka na kupela nkwitamina mwishina dyobe? Papa we mulombene kwiyipusha su yawa muntu akumina kwikala pepi nobe. Bi nka byabya dingi bw’Efile Mukulu. Yehowa mmulungule bantu eshina dyaye, na etunyingisha bwatudya kwidifubisha. Su tubedifubisha, atulesha Yehowa’shi atukumina kwikala pepi naye. Mwanda, aye apushaa ‘baaba abatshinyi eshina dyaaye’!​—Malaki 3:16, NWT.

Kulonga eshina dy’Efile Mukulu nyi etabula dikata dya kumpala bwa kumuuka. Anka tatwi balombene kwimena papa. Twi na kya kuuka Muntu sha dyadya eshina. Bibuwa tuukye byayikalaa.