Mu bukunkushi bw’Efile Mukulu, bipangwa byooso bibadi mu buumune na mu butaale

Bwakinyi twi na lukalo lwa Bufumu bw’Efile Mukulu?

Pababadi bapangye bantu ba kumpala, nka penda Mupangi eetu e n’eshina bu Yehowa ngi baadi Mukunkushi umune. Badi akunkusha na kifulo. Bapangile efuba dya Edene, mbalo i buwa ibatudile bantu bwabadya kwikala na muwa. Bebapeele dingi bidiibwa bibungi. Kukatusha byabya, bapeele bantu mudimo wibuwa wabadya kukita. (Kibangilo 1:28, 29; 2:8, 15) Bantu babadya kwikala na butaale su babashadile na lulamato ku bukunkushi bwa kifulo bw’Efile Mukulu.

Adame mmukwate kikuba kibabadi bebatoshe kibabamupeele kwi Eeva. — Bantu ba kumpala babadi bapele Efile Mukulu bu Mukunkushi aabo

Bible aleesha’shi mwikeyilu batombokyele, ababadi betamine kunyima bu Satana Diabulu, badi mweleshe matalwa a kumunana a Efile Mukulu mpaka. Aye nkwamba’shi bantu be kwikala na muloo su ta be ku buludiki na ku bukunkushi bw’Efile Mukulu. Mbya malwa, mwanda baledi betu ba kumpala, Adame na Eeva abalondele kileshesho kya Satana, abo nkutombokyela Efile Mukulu.—Kibangilo 3:1-6; Kibafumbwilwe 12:9.

Bu bibadi Adame na Eeva bapele Efile Mukulu bu Mukunkushi aabo, abadi bashimishe Mpaladiisu, mbalo ibabadi na lukulupilo lwa kwikala na mbidi ipwidikye. (Kibangilo 3:17-19) Kitshibilo kyabo kibaadi na bukitshishi mpa na kwi bana baabo babaabadya kutanda. Bible akula’shi: Bu bibaadi Adame na Eeva bakite mulwisho, ‘mulwisho ubatwelele pa nsenga . . . na kukiila ku mulwisho, lufu nkutwela.’ (Beena-Looma 5:12, Kilombeno kipya 2014) Mulwisho ubafwishishe kingi kipeta kibubi: “Muntu amunu muntu naaye bwa kumumwesha malwa.” (Mulungudi 8:9) Mu ungi ngakwilo, nsaa ikwete kwikunkusha bantu abo banabeene, akwikalaa’nka bipeta bibubi.

BUKUNKUSHI BWA BANTU BUBABANGA

Nimerode mwimane na kapeesha. Bantu bakwete kwibaka nshibo mu lupese. — Nimerode badi mutombokyele Yehowa

Muntu a kumpala pa nsenga abadi bateemune mu Bible babangile kukunkusha bantu baadi Nimerode. Badi mutombokyele bukunkushi bw’Efile Mukulu. Kubanga’nka mu mafuku a Nimerode, bantu be na matalwa bakwete kufubisha matalwa aabo bibubi. Takudi pangi bipwa 3 000, Nfumu Salomo bafundjile’shi: “Naamono kupombesheena kooso akukitshika muushi a nguba. Talaayi nkalo ya bapombeshwe: Tabee na musambi, bukome bwi lupese lwa abapombesheenaa: tabee na musambi.”—Mulungudi 4:1.

Na lelo uno, myanda tangishitulukye nya. Mu kipwa kya 2009, ungi mukanda wa Nations-Unies ubambile’shi: Bukunkushi bwibubi bukwete kunyisha kwenda na kutama nka bu “mushi wa bubi booso bwatukwete kumona.”

NSAA ILOMBANE BWA KUMUNANA!

Nsenga i na lukalo lwa bakunkushi bebuwa na mbulamatadi ebuwa. Na byabya ngi bitulee Mupangi eetu!

Bifwatulo: Bipeta abitusha mbulamatadi ya bana ba bantu. 1. Mwana mukashi a mu Asie mushale mwishinda di butshaafu mutwale mwan’aye kwete kudila. 2. Muntu mununu e na malaadi mu lupitaalo. 3. Basalayi bakwete kwela ma mputu aabo pa mbalo ya ngoshi. 4. Bantu be na nsungu bakwate tu bilamba tufunde byabapele. 5. Mwana mukashi na ka nsongwakashi kaaye mbemane mu bukunkula bwa nshibo yaabo, abapete mbatanye mweno ya madidishi aabo. 6. Kibundji ki na lupapi lulwile na miishi ki na myoshi ya nsembwe. — Sunga mbulamatadi ikile buwa ya bana ba bantu ngikutwe kapu bwa kupudisha myanda ya bantu

Efile Mukulu mmutuule Bufumu sunga mbulamatadi akyebe kupyana bukunkushi bwa bana ba bantu na kunyima, “abushaala looso.” (Ndanyele 2:44) Buno Bufumu nyi bukwete kuteka midiyo ya bantu. (Mateo 6:9, 10) Kadi Efile Mukulu t’akakunkusha uno mbulamatadi nya. Anka, mmusangule muntu badi na muwa pa nsenga bu Mukunkushi. Nnanyi abadi basangule kwi Efile Mukulu?