Tulonde kileshesho kya batemuki—Yowele
1. Mushindo kinyi watudi balombeene kulonda kileshesho kya Yowele kya kwiyisha mu mudimo wa bulungudi?
1 Mutemuki Yowele baadi muntu kinyi? Aye nabene alesha nkapenda shi baadi “mwana a Petuwele.” (Yow. 1:1) Uno mutemuki sha kwiyisha baadi mwisambe ngofu pabitale mukandu wa Yehowa, kushi kukamba kwisamba pabitale mudimo waye wa bu mutemuki. Bi mumune na’twe namu, mu mudimo wetu wa bulungudi, pamutwe pa kukimba kwitumbisha sunga kukimba bwashi bangi baukye ngobesha yetu, atwalusha ntumbo yooso kwi Yehowa na Bible, Eyi dyaye. (1 Kod. 9:16; 2 Kod. 3:5) Na dingi, mukandu wibuwa watulungula awitunyingisha ku mashimba. Mwanda kinyi wi mu butemuki bwa Yowele ukumbeene kwitupa katshintshi na lukulupilo lelo uno?
2. Kuuka kwa’shi nfudiilo tayidi pepi akwitutumu mu kukita kinyi?
2 “Efuku dya Yehowa tádidi pepi.” (Yow. 1:15): Sunga mbyabidi shi ano mayi abaadi afundjibwe takudi bipwa binunu, lelo uno ano mayi akwete kulombana bwa musango wa nfudiilo. Kulwila kwa myanda pa nsenga na bungi bwa bantu bakwete kupela mukandu wibuwa sunga kwiusenga batukwete kufumankana naabo mu teritware etu abulesha shi twi mu mafuku a nfudiilo a uno ndumbolwilo e bubi a myanda. (2 Tim. 3:1-5; 2 Mp. 3:3, 4) Patumono shi nfudiilo tayidi pepi, twi na kya kutuula mudimo wa bulungudi pa mbalo ya kumpala mu muwa wetu.—2 Mp. 3:11, 12.
3. Bwakinyi mudimo wa bulungudi wi na muulo ukata bikishekishe pano patukwete kwisesele pepi na mpombo ikata?
3 “Yehowa nkifwamino bwa mwilo waye.” (Yow. 4:16): Kusanyishibwa kwabesambila mu uno verse nkutale kiimu kya Yehowa mu kipungo kya mpombo ikata. Akitusamba nyi nkuuka shi Yehowa akyebe kupaasha bafubi baaye basha kululama mu kyakya kipungo. (Bif. 7:9, 14) Patulungula mukandu wibuwa na kumona mushindo ukwete kwitukwasha Yehowa na kwitunyingisha, atwikala na lukumiino na lukulupilo shi akyebe kwitukwasha mu mafuku a mpombo ikata e kumpala.
4. Bwakinyi twi bakumbeene kusangala na kwikala na lukulupilo kushi kutshina pabitale mafuku e kumpala?
4 Sunga mbi bantu bebungi abamba shi Yowele baadi alungula mukandu wa malwa, mukandu waye aupa bafubi b’Efile Mukulu lukulupilo lwa kukuudibwa. (Yow. 2:32) Byabya, twikale na lukulupilo kushi kutshina pabitale mafuku e kumpala na dingi twikale na katshintshi ka kulungula mukandu wibuwa wa Bufumu bw’Efile Mukulu. Patukitshi byabya atulondo mayi e mu Yowele 2:23: “Etumbeeyi, sangulukayi munda mwa Yehowa, Efile Mukulu enu.”