Tulonde kileshesho kya batemuki—Mika
1. Ndukonko kinyi lubaadi mutemuki Mika mwiyipushe, kadi bwakinyi mufubo waye wa bulungudi taubaadi wa bisumanga?
1 ‘Mafuku kinyi aakyebe kulombana nfudiilo ya uno ndumbulwilo ebubi?’ Mutemuki Mika baadi mwipushe lukonko lwi bino pabaadi alungula mukandu wa kiimu kya Yehowa kitale bufumu bwa Isaleele na bwa Yuuda. Na dingi, mufubo waye wa bulungudi taubaadi wa bisumanga nya. Mu 740 ebedi dya Yesu Kidishitu (Eb.Y.K), mu mafuku a Mika, mayi a Yehowa pabitale Samariya abaadi alombane. (Mik. 1:6, 7) Kunyima, abaadi babutule Yelusaleeme mu 607 Eb.Y.K. (Mik. 3:12) Mushindo kinyi watudi balombeene kulonda kileshesho kya Mika bu byatukwete kutengyela kulombana kwa kiimu kya Yehowa mu ano mafuku eetu?
2. Mushindo kinyi watudi balombeene kuleesha lwishinko bu byatukwete kutengyela efuku dya Yehowa?
2 Ikala na lwishinko: Mika bafundjile bino: “Ank’ami, natengyela Yehowa, nanyindjila Efile Mukulu, mupaashi ande.” (Mik. 7:7) Byabya, Mika tabaadi atengyela kulombana kwa nfudiilo na lulengu nya. Baadi mushaale afubu anka bu mutemuki a Yehowa. Bu byatukwete kutengyela efuku dya Yehowa, abitungu twikale “bantu ba mwikeelo wa-kalolo na kineemo ky’Efile.” (2 Mp. 3:11, 12) Lwishinko lwa Yehowa alukwasha bantu bwabadya kwilanga. (2 Mp. 3:9) Byabya, atulama malango a Efile mukulu ku mashimba bwa kwambula mushindo ubaadi batemuki abaleeshe lwishinko.—Ja. 5:10.
3. Bwakinyi twi balombeene kuteka Yehowa bwa kwitupa kikudi kyaye kiselele?
3 Kulupila mu bukome bwa Yehowa: Sunga shi Mika baadi na mufubo wibukopo, baadi mukulupile anka mwi Yehowa bwashi amupe bukome bwa kwiukita. (Mik. 3:8) Ta mbilombeene kwitukalakasha su Eyi dya Yehowa aditutekye bwa kukulupila mu bukome bw’Efile Mukulu. Apa bafubi baaye babofule bukome bwa kulombasha mashito aabo a mu kikudi. (Mis. 84:5, 7; Yesh. 40:28-31) Mu muuwa oobe, tobomwene namu bino pabitale mufubo wiselele su? Okwete kuteka Yehowa misusa yooso bwashi akukwashye na bukome bwaye bwa kikudi kiselele su?—Luk. 11:13.
4. Nshalelo a Mika etupa kileshesho kinyi kibuwa lelo uno?
4 Mu muuwa waye, Mika baadi mutungunukye na kukita akikumiina eshimba dy’Efile Mukulu. Baadi mwate kitshibilo kya kushaala mulamate sunga mbibaadi mwifunyishwe na bantu be na nshalelo mulwile. Mu mushindo umune, bululame bwetu abutompibwa efuku dyooso. Tulameeyi kitshibilo kyetu kya ‘kutambukila mwishinda dya Yehowa Efile Mukulu eetu bwa looso.’—Mik. 4:5.