Tulongamishe mudimo wetu wa bulungudi—Mushindo wa kwaluula muntu akula myanda bwa kutshiba mwisambo

Bwakinyi bi na muulo: Banda kunangusheena shi abakulungula shi akukyebe kutuuka masaku akata aafiki ku bintu byabadi bapangye kwi Efile Mukulu. Bantu abakyebe kufwa, bwa kupanda be na kya kusuuka mbalo ibuwa. Bwende kwa ungi muntu bwashi okamudimushe, kadi akutshibi mwisambo mususa umune shi te na nsaa nya. Binyibinyi, twe mulombeene kuleka kumukwasha nka mususa umune nya! Bantu bebungi ba mu teritware eetu abetubingi, kushii kuuka muulo wa mukandu wetu aupaasha miuwa. Nsaa yatwende mu kutala bantu, pangi mbepaane ku ingi myanda. (Mat. 24:37-39) Sunga shi mbapwe kwibadimba na myanda ya madimi. (Mat. 11:18, 19) Mbalombeene kumona bu’twe bashii belekeene na bantu ba mu byabya bipwilo bituushe bikuba bi bubi. (2 Mp. 2:1, 2) Su sha-nshibo etutshiba mwisambo nka mususa umune shi ta mbimutale, tatukatukanga nka bukidibukidi nya.

Mushindo wa kwibikita:

Kumpala kwa kwenda mu kulungula mukandu wibuwa ku nshibo na nshibo, ata nsaa ipeela bwa kunangusheena pabitale muntu akula myanda bwa kutshiba mwisambo oodi mulombeene kufumankana naye na kutaluula byoodi mulombeene kumwaluula.
Su sha-nshibo abuusha mwanda bwa kutshiba mwisambo, na kalolo kooso tompa kutungunuka na kwisamba naye. Pangi wemulombeene kwibikita na kumukanyisha kooso. Bu kileshesho, su akulungula shi e na kyaye kipwilo, we mulombeene kumwalula shi: “Nakulupilanga shi nafumankana na muntu bu’be epaana namu mu myanda ya mu kikudi.” Ingi nsaa kuuka abipusha sha-nshibo sunga nshalelo aadi naye, nkulombeene nkukwasha bwa kutungunuka na kulambukisha mukandu wibuwa. Byabya, su yawa muntu amba shi te na nsaa, we mulombeene kwamba shi: “Bibuwa napusha. Kadi kumpala kwashi twilekeene, nakyebe nkupa uno mukanda.” Ungi mushindo oodi mulombeene kukita nyi nkwipusha lukonko su sha-nshibo amba shi nta nsangeelaa wawa mwanda okyebe kundungula. We mulombeene kwamba shi: “Mbande nkwipusha, kyoshosangeelaa mBible su nkipwilo, su nkwamba shi mbipwilo byooso bish’abikusangashaa?”
Ikala na ngyeelo a binangu ebuwa. Tentekyesha shi Yehowa takitshisha bantu pa bukopo bwa kuteemesha nya. (Miy. 30:19) Muntu na muntu atwala kiita kyê kya mashito aaye a mu kikudi. (Gal. 6:5) Su sha-nshimbo takumiina, mbikile buuwa kumutadiila. Nsaa y’atunemeka mmweneno aaye, atufungula kiibi bwashi ungi mulungudi a mukandu wibuwa amulambukishe ungi mususa aufiki.—1 Mp. 3:15.

Ebitompeyi munda mwa wawa mweshi:

Nsaa y’anufumankana na muntu akula mwanda bwa kutshiba mwisambo, kunyima kwa kwilekeena na yawa muntu, esambe na mwinobe oolambukisha naye by’oodi mulombeene kumwaluula mu mushindo wibuwa.