Tulonde kileshesho kya batemuki—Sofonii
1. Mbalo kinyi ibaadi Sofonii mufube bu mutemuki, na mushindo kinyi wadi bu kileshesho kibuwa bwetu lelo uno?
1 Twi munkatshi mwa siyekele a musambo Ebedi dya Yesu Kidishitu (Eb.Y.K) lulangwilo lwa Baale lubaadi lupalakane mu Yuuda. Binobino abayipaa Nfumu e bubi Amone, na Nfumu mukinga Yosyase babanga kumunana. (2 Mya. 33:21–34:1) Kubanga mu aa mafuku, Yehowa nkwibwesha Sofonii bwa kwakula mukandu wa kiimu Kyaye. Sunga mbyabidi shi Sofonii baadi a mu kifuko kya ba nfumu ba mu Yuuda, tabaadi mupeeleshe kulungula mukata a beena Yuuda myanda ya Yehowa nya. (Sof. 1:1; 3:1-4) Bi mumune, atukitshi mwetu mooso bwa kwambula kileshesho kya kunyinga eshimba kya Sofonii na tulekye kutadiila nkalakasho ya kifuko bwa kulwisha lulangwilo lwetu lwa Yehowa. (Mat. 10:34-37) Myanda kinyi ibaadi Sofonii mwakule, na ibatuushishe bipeta kinyi?
2. Abitungu shi tukite kinyi bwa kupanda kwifuku dya nsungu ya Yehowa?
2 Kimbayi Yehowa: Nka penda Yehowa ndjo mulombeene kupaasha bantu mwifuku dya nsungu yaaye. Byabya, Sofonii atakula mwilo wa beena Yuuda bwabadya kukimba Yehowa, kukimba bululame, na kukimba bya kukokyela pa kukii nsaa. (Sof. 2:2, 3) Bi mumune na ano mafuku eetu. Anka bu Sofonii, tukwete kunyingisha bangi bantu bwabadya kukimba Yehowa, kadi abitungu atwe tubangye kumpala, twikale baate kitshibilo kya kupela ‘kufutaala Yehowa.’ (Sof. 1:6) Pa mutwe pa kufutaala Yehowa, atukulupila mwadi nsaa y’atulongo kalolo Eyi dyaye na kuteka bukunkushi bwaye. Atukimbi bululame nsaa yatudi beesuule mu mwikeelo. Atukimbi kukokyela nsaa yatukitshi mwetu mooso bwa kwikala na kwiyisha na kulonda bukidi bukidi bukunkushi abutuukila ku ndumbulwilo a Yehowa.
3. Mushindo kinyi watudi balombeene kushaala na binangu bibuwa mu bulungudi?
3 Bipeta bibuwa: Mukandu wa kiimu ubaadi Sofonii alambukisha ubaadi ukume bangi beena Yuuda ngofu kadi pangi bikishekishe nsongwalume Yosyase babangile kukimba Yehowa pabaadi kii mukinga ngofu. Kunyima Yosyase baadi mwiutwale na katshintshi kooso sunga bibaadi lulangwilo lwa mankishi mu mbalo ibaadi. (2 Mya. 34:2-5) Lelo uno, sunga mbyabidi shi ingi mbyo ya Bufumu mbeyimyamine ku bukunkula bw’eshinda, mu ma mbalo e mabwe, sunga mu milobo, ingi namu mu nsenga ibuwa ya kumbula bikuba. (Mat. 13:18-23) Twi na lukulupilo shi Yehowa akyebe kutungunuka na kwitwelela myabi ku byooso byatukitshi bu byatukwete kutungunuka na kulungula mukandu wibuwa wa Bufumu.—Mis. 126:6.
4. Bwakinyi twi balombeene ‘kwindjila Yehowa’?
4 Bangi beena Yuuda abaadi abanangusheena shi Yehowa t’akitshi kintu sunga nkimune. Byabya, Yehowa baadi mwibashinkamishe booso shi efuku dyaye dikata tadidi peepi. (Sof. 1:12, 14) Nkapenda baaba bakulupile mwadi ndjo babaadi balombeene kupanda. (Sof. 3:12, 17) Bu byatukwete ‘kwindjila Yehowa,’ twi balombeene kwikala na muloo ukata wa kufuba mu buumune na bangi balangwidi b’Efile Mukulu eetu mukata!—Sof. 3:8, 9.