Tulonde kileshesho kya batemuki—Naume
1. Mukanda wa Naume awitulongyesha kinyi?
1 Kabutu ka Niniive a kala akashinkamisha shi anka bu bibabadi batemukye kwi Naume, Yehowa baadi moobole kwi beshikwanyi Naye na shi sunga mwishikwanyi ekala ee bukyelo bwinaminyi ta mulombeene kwimana kumpala Kwaye. (Na. 1:2, 6) Kutaluula butemuki bwa Naume akwitupa malongyesha ebungi mu mudimo wetu wa bulungudi.
2. Mushindo kinyi watudi balombeene kutungunuka na kulungula mukandu wibuwa?
2 Kankamika bangi na kwibapa lukulupilo: Bwa musango wa kumpala, mukanda wa Naume ngwileeshe bupenka bwao awakula pabitale kiimu kya Niniive, epata dikata dya Aasiriya a kala. (Na. 1:1; 3:7) Anka uno ubaadi bu mukandu wibuwa kwi mwilo wa Yehowa. Naume sh’eshina adipatuula shi “Akankamikaa,” baadi anyingisha bakwabo beena Yuda shi beshikwanyi nabo ababutuka binobino! Akupu Naume nkushinkamisha shi Yehowa nyi “nkifwamino mwifuku dya mpombo.” (Na. 1:7) Bu byatukwete kulungula, n’atwe namu tukwete kupalakasha mukandu wibuwa na atukankamika bangi bwa kufwamina mwi Yehowa.—Na. 1:14.
3. Mushindo kinyi watudi balombeene kwambula Naume mu mushindo wa kufuba na bileshesho?
3 Fuba na bilesheesho na biifwanyi: Yehowa baadi muyookyele mwi Naume bwa kupwandjikisha nfudiilo ya Niniiive na ya epata dya bulopwe bwa beena Ejipitu a ku Teèbe (No-amon), dibabadi babutule kumpala kwi beena Aasiriya. (Na. 3:8-10) Bu byatukwete kulungula bantu pabitale nfudiilo ya uno ndumbulwilo a myanda mulwile, twi balombeene kwimeena ngofu pa matemuki a mu Bible aalesha patooka shi Yehowa baadi mulombashe eyi dyaye mpa na ku tuntu tupeela. Bu kileshesho, pabafikile beena Babilone na beena Mediya mwipata dya Niniive mu 632 Eb.Y.K., mpeshi baadi muushe na kupalakasha mwela wa Tigre, nkuponesha kipindji kya mbumbo ibukopo ya musee. Abo nkukwata Niniive musango umune, anka bibabadi bebileeshe kwi Yehowa.—Na. 1:8; 2:6.
4. Mushindo kinyi watudi balombeene kwikala na ngakwilo mupeelepeele na apushika?
4 Ikala na ngakwilo mupeelepeele na apushika: Mu kufunda kwaye Naume baadi akula kantu ku kantu na kufuba na bifwanyi. Myanda yaaye ibaadi ayipushika kalolo. (Na. 1:14; 3:1) Mu mushindo umune, atukumiina kufuba na ngakwilo mubofule bwashi bantu bapushe kalolo. (1 Kod. 14:9) Nsaa y’ofumankana na muntu bwa musango wa kumpala, muleeshe patooka kiboofwila mu nkamutala. Nsaa y’otungunuka na kulonga Bible na bantu, ebakwashe bwabadya kutamisha lukumiino lwabo mwi Yehowa na mu Eyi dyaye na kusankila mushindo wi ino myanda ngibatale abo banabeene pa bupenka.—Lom. 10:14.
5. Nkinyi akitushinkamiisha butemuki bwa Naume?
5 Lukulupilo lwa Naume mu kulombana kwa mayi a Yehowa ashii akwelesha mpaka alumweneka patooka mu mukanda wa mu Bible win’eshina dyaye. Bu bikwete kwifubwila nfudiilo a ndumbulwilo a Satana, atupetela bukome mu dino eyi dy’Efile Mukulu: “Mpombo taayikeekala kwanka dimo nya.”—Na. 1:9.