Kalasa ka mudimo wa teokrasi ka kipwa kya 2015 aketukwasha bwa kulongamisha mushindo wetu wa kulongyesha
1 Daavide mwimbi a misambo bafundjile shi: “Bishima bya mukanwa mwande na nkalo i mwishimba dyande, kumiina kwibitambula, Yehowa, Lubwebwe lwande na Munkalwidi.” (Mis. 19:14) Atwe namu, atukumiina shi bishima byetu bikale abisangasha Yehowa mwanda atulama bushito bwetu bwa kwakula bya binyibinyi mu kakongye na mu bulungudi. Kalasa ka mudimo wa teokrasi nyi ngumune wa ku mishindo ikale Yehowa etulongyesha bwa kukita mudimo wa bulungudi. Kuno kulongyeshibwa kukwete kukitshika lubingo looso mu tukongye tukile pa 111000 mu nsenga ishima. Abikwasha bakwetu balume na bakashi be mu nsenga ishima na abatukila ma mbalo elekeenelekeene bwabadya kwikala balombanyinyine bu balungudi ba mukandu wibuwa, basha bukome bwa kulongyesha mu mushindo wa kukuminyisha bantu, kulongyesha na mayele, n’eshimba dinyingye.—Bik. 19:8; Kol. 4:6.
2 Programe a kalasa ka 2015 amwikala miisambo ayituukila mu broshire Myanda i mu Eyi dy’Efile Mukulu, mu Étude perspicace des Écritures, na mu Kitenta kya Mulami. Na dingi, mbashintuule ingi myanda pabitale nsaa ayitungu kukisha bwa mayi akata a mu Bible na Mwisambo No. 1. Yawa nshintulukilo pamune na mayi a kulonda pabitale mushindo wa kukita kipindji kya kalasa mbebileeshe mu ano ma paragrafe aalondo.
3 Myanda ikata ya mu kubadika kwa Bible: Mukwetu mulume abadi bape kyakya kipindji akitshi penda minite ibidi bwa kutuusha mwanda umune wa mu kipindji kya Bible kyatubadika lwalwa lubingo. Kwilumbuula kwi buwa akukwasha bwa kutuusha mwanda wa muulo wa kwiabisheena na kakongye munda mwa nsaa yabadi bakupe. Kunyima, anka bu pa kiubishi, kakongye akekala na minite isamombo bwashi bantu besambe mu kikoso mu sekonde 30 sunga muushi pabitale myanda ibebasankisha mu kipindji kya Bible kyatubadika mu lwalwa lubingo. Abitungu kwilumbuula na kwikitshisha bwa kwakula myanda ayipushika mu sekonde 30, kadi kukita kwa byabya nyi nkulongyeshibwa kukata bwetu. Abilekyela bangi nsaa ilombane bwabadya kwakula byabekalanga balongye mu kukimbuulwa kwabo kwa pa bupenka.
4 Mwisambo No. 1: Nsaa y’abekalanga baleeshe bwa mwisambo wa kubadika kwa Bible abeyipeelesha mu minite isatu sunga muushi na akwikala myanda ipeela. Baaba abapete mudimo wa kubadika abintungu babadikuule misango ibungi, kubadika n’eyi di bukopo na kuteemesha ngofu mushindo wokwete kutuusha bishima na kwibituusha kalolo mu mushindo wa kutwesha binangu abipushika mwi bantu. Mwilo ooso wa Yehowa ngulombeene kwikitshisha bwa kubala kalolo, mwanda kubadika kwina mudimo ukata mu lulangwilo lwetu. Twi na muloo wi kasha bu bi bana beetu bebungi bakwete kubadika kalolo! Baledi mbakukanyisha bwa kwikitshisha kwabo na kifulo kyooso bwa kukwasha bana baabo bwabadya kwikala babadi bebuwa.
5 Mwisambo No. 2: Uno mwisambo wi na minite itano ngwa kupa bakwetu bakashi. Mutwe wa mwanda wabadi bamupe abitungu eutumikile. Su mwisambo ngwatshibwe mu Myanda i mu Eyi dy’Efile Mukulu, abitungu aleshe bya kwibitumikila mu mushindo kampanda wa bulungudi wanukitaa mu teritware eenu. Su mwisambo ngwimeene pa myanda ya muntu a mu Bible i mu Étude perspicace des Écritures, mulongi mmulombeene kupatuula mutwe wa mwanda wabadi bamupe, asangule maverse alombane aadi mulombene kufubisha, na kutuusha dilongyesha dyatupetela ku kileshesho kya yawa muntu a mu Bible. Mulombeene kufuba dingi na maverse epusheene na mutwe wa mwanda. Mukunkushi a kalasa amupa muntu adya kukita naye.
6 Mwisambo No. 3: Mwisambo wabakitshi mu minite itano kwi mukwetu mulume sunga mukashi. Su babeupa mukwetu mukashi, mmulombeene kwiukita mu mushindo wabadi baleeshe bwa Mwisambo No. 2. Su babeupa mukwetu mulume, myanda y’akwila ayituukila mu mukanda wa Étude perspicace mulombeene kwiyikita bu mwisambo wakitshi kumpala kwa bena kakongye. Abitungu shi mulongi apatuule kalolo mutwe wa mwanda wabadi bamupe, asangule maverse aadi mulombeene kufubisha na aleshe mushindo watudi balombeene kulonda kileshesho kya yawa muntu a mu Bible.
7 Ungi mushindo wa kukita mwisambo wa 3 kwi bakwetu balume: Su mwisambo autuukila mu Myanda i mu Eyi dy’Efile Mukulu, abitungu kwiukita bu kileshesho kya lulangwilo lwa mu kifuko sunga kya mu bulungudi. Bi buwa mukunkushi a kalasa atuushe muntu akukita naye na mushindo wabakyebe kwibikita. Yawa muntu mmulombeene kwikala mwina kifuko kya yawa mulongi sha mwisambo sunga ungi mukwetu mulume a mu kakongye. Angi maverse aatuusha mayi akata a kulonda a mu Bible epusheene na mutwe wa mwanda nwi balombeene kufuba nawo. Misango ibungi, abitungu kupa mukulu umune bwa kukita kino kipindji. Bakulu mbalombeene kwisangwila muntu abakyebe kukita naye na mushindo wabakyebe kwibikita. Kushi mpaka, nsaa i bakulu abakitshi bileshesho bya kulongyesha kalolo na mwina kifuko kyaye sunga ungi mukwetu mulume, abinyingisha kakongye ngofu nsaa yabamono byabya.
Enda kumpala p’oobe kukumiina na kutumikila elango
8 Malango: Mukunkushi a kalasa akitshi minite ibidi kunyima kwa mulongi kupwa kukita mwisambo bwa kumutumbula, na kumupa malango aebaka muyiile abyamba mukanda wa Tirez profit de l’École du ministère théocratique. Nsaa i mukunkushi a kalasa ayitanyina mulongi, tatemunanga mwanda wabadi bamutekye bwa kutumikila. Kunyima kwa kipindji kyooso, abitungu mukunkushi a kalasa atumbule mulongi n’eshimba dyaye dyooso, ateemune dilongyesha dibabafubila kwi mulongi na aleeshe bwakinyi mulongi batumika kalolo pa yaaya mbalo sunga kupatuula kalolo bwa kinyi mbilombeene kwikala buwa bwashi mulongi atuule binangu byaye ngofu ku wawa mwanda.
9 Nwi balombeene kupeta elango dya mulongi mwisaki dya 79 na ku 81 dya mukanda wa mulongi wa École du ministère. Kunyima kwashi mulongi baapu kukita mudimo waye, mukunkushi a kalasa a fundu myanda itale mulongi mu mukanda waye na akyebe kuteka mulongi pa bupenka bwa kwikitshisha bwa kutumikala dyadya elango dimutale. Kutumbula mulongi na kumukwasha na ingi myanda we mulombeene kwibikita kunyima kwa bisangilo sunga ingi nsaa. Kwitatshisha bwa kukwasha mulongi eese mu kalasa nkulombeene kumweka bu mushindo wa ku mukwasha bwa kwenda kumpala mu kikudi.—1 Tim. 4:15.
10 Su yawa akitshi mwisambo bakisha nsaa, mukunkushi a kalasa sunga yawa amukwashaa mmulombeene kukita kantu bwa kumupasula, bu kukupila kikufi, sunga kusheeta mukoolo paashi, bwa kuleesha mulongi mu bufyefye shi nsaa ibalombana. Abitungu mulongi aukye kyabamuleesha, afudiishe wawa mwaku wakwete kwakula na akatukye kumpala.—Tala mukanda wa École du ministère, esk. 282, par. 4.
11 Atutekye booso abalombasha myanda itekibwe bwabadya kwifundjisha mu Kalasa ka mudimo wa teokrasi. (Tala mukanda wa École du ministère, esk. 282, par. 6.) Kano kalasa akakwasha mwilo wa Yehowa bwabadya kulambukisha na kulongyesha mukandu wi buwa wa Bufumu kushinkamisha kooso, kaneemo, na kifulo. Kushii mpaka, Yehowa asangala ngofu bwa ntumbo ikwete kumupa bano booso be mu kalasa ka teokrasi!—Mis. 148:12, 13; Yesh. 50:4.